މިދިޔަ ހުކުރު ދުވަހުގެ ރޭ މާލޭގައި އަންހެނަކު ރޭޕް ކުރި މައްސަލައެއް ފުލުހުން ތަހުގީގު ކުރަމުން އަންނައިރު، އެ އަންހެން މީހާ މަގުމަތިން ދަމާފައި ގޯޅިގަނޑެއްގެ ތެރެއަށް ވައްދަން އުޅޭ މަންޒަރު ފެންނަ ވީޑިއޯއެއް "މިހާރު" އަށް ލިބިއްޖެ އެވެ.
މި ހާދިސާ ހިނގާފައި ވަނީ މާފަންނު ލެމަން ގްރާސް ރެސްޓޯރަންޓް ހުންނަ މަގުގައި އެ ރޭ 8:20 ހާއިރެވެ. މިހާރަށް ލިބިފައިވާ ވީޑިއޯ އިން ފެންނަ ގޮތުގައި އެ ހާދިސާ ހިނގި ވަގުތު ލެމަން ގްރާސްއާ ޖެހިގެން ހުންނަ އީދު މިސްކިތުން ބޭރުގައި ގިނަ ބަޔަކު ސަފުތައް ހަދައިގެން ނަމާދަށް ތިއްބެވެ.
ދެން ފެންނަނީ ފިރިހެނަކު އެއް އަތުން ސިނގިރޭޓެއް ބޮމުން، އަނެއް އަތުން އަންހެން މީހާގެ އަތް ކޮނޑަށް އަރުވާ ލައިގެން ގަދަ ބާރުން ދަމާ ހަދާފައި ގެންދާ މަންޒަރެވެ. އަންހެން މީހާ ސަލާމަތް ވާން އަތް ދަމައިގަންނަން ވަރަށް މަސައްކަތް ކުރެ އެވެ. ނަމަވެސް ފިރިހެން މީހާ އިތުރަށް ދަމަމުން ގަދަ ބާރުން ކުރިޔަށް ހިނގަ އެވެ. އޭނާއާ އެކު އަންހެން މީހާގެ ފަހަތުގައި އިތުރު ފިރިހެނަކު ވެސް ހުއްޓެވެ.
ގޯޅިގަނޑާ އަރާ ހަމަވިތަނާ އަންހެން މީހާ ސަލާމަތް ވާން އަތް ފޮޅާލައި، ދަމައިގަތުމާ އެކު އޭނާ ބިންމައްޗަށް ވެއްޓެ އެވެ. އަންހެން މީހާ ވެއްޓުނީ ސައިކަލެއް ކައިރީ ހުއްޓިލައިގެން ވާހަކައިގައި ތިބި އެހެން ދެ ފިރިހެނެއްގެ ފައި ބުޑަށެވެ. ނަމަވެސް އެ ދެ މީހުން އެއްވެސް ކަމެއް ނުކޮށް ބަލަހައްޓައިގެން ތިއްބެވެ.
ދެން ފެންނަނީ ރޭޕް ކުރަން އުޅުނު ކަމަށް ތުހުމަތު ކުރެވޭ ދެ މީހުން، އަންހެން މީހާގެ ކޮނޑާއި ދެ ފައިގައި ހިފާ ބިން މަތިން އުފުލާލައިގެން ގޯޅިގަނޑަށް ވައްދާ މަންޒަރެވެ.
މި ހާދިސާ ހިނގި މަންޒަރު ދުށް މީހަކު "މިހާރު" އަށް ކިޔައިދިން ގޮތުގައި އަންހެން ކުއްޖާ ގޯޅިގަނޑަށް ވެއްދުމުން އޭނާ ސަލާމަތް ކުރަން އަވަސްވެ ގަތީ އެ ވަގުތު ނަމާދުން ފޭބި މީހުންނެވެ. މުސައްލަތައް ހިފައިގެން އެ މީހުން ގޯޅިގަނޑަށް ވަދެގަނެ، ވާނުވާ ބަލަން ފެށުމުން ދެތިން މިނެޓު ތެރޭގައި ދެ ފިރިހެނުންނާއި އަންހެން މީހާ ވެސް އެތަނުން ނިކުތެވެ.
މަގުމަތީ ގިނަ ބަޔަކު ތިއްބާ ގަދަކަމުން ގޯޅިގަނޑަކަށް ވައްދަން ދެ މީހަކު މަސައްކަތް ކުރިއިރު އަންހެން މީހާ ވަރަށް ބާރަށް ހަޅޭއްލަވަމުން ދިޔަ ކަމަށް މަންޒަރު ދުށް މީހާ ބުންޏެވެ.
"އެ ކުއްޖާ ވަރަށް ބާރަށް ހަޅޭއްލެވި. އެ ގެ އަށް ވެއްދި އިރު ވެސް ހަޅޭކުގެ އަޑު ނުކެނޑޭ،" އޭނާ ބުންޏެވެ.
ރޭޕްގެ ތުހުމަތުގައި ފުލުހުން ވަނީ އެ ސަރަހައްދުން އުމުރުން 18 އަހަރާއި 23 އަހަރުގެ ދިވެހި ދެ ފިރިހެނުން ހައްޔަރު ކޮށްފަ އެވެ. ބެލެވޭ ގޮތުގައި އެއީ މި ވީޑިއޯ އިން ފެންނަ ދެ މީހުންނެވެ.