ރުޅިއައިސް ނުކުމެގެން ދިޔަ އައްފާން މިރޭ އަލުން އަތުވެދާނެތަ؟

މޯލްޑިވިއަން އައިޑޮލްގެ ސީޒަން ދޭއްގެ މިދިޔަ ހަފުތާގެ ޝޯތައް ވެގެން ދިޔައީ ޑްރާމާގަނޑު ބޮޑު ދެ އެޕިސޯޑަށެވެ. މީގެ ކުރިން އައިޑޮލް އިިން ފެނިފައި ނުވާ ފަދަ ކަމެއް ފުރަތަމަ ހިނގީ ތިން ޖަޖުން ހިމެނޭ ޕެނަލާ މި ފަހަރު އަލަށް ގުޅުނު އިސްމާއިލް އައްފާން ރުޅި ގަދަވެގެން ސެޓުން ނިކުމެގެން ދިއުމާ އެކު އެވެ.

އޭނާ ހަމައެކަނި ނުކުމެގެން ދިޔައީކީ ވެސް ނޫނެވެ. ޝޯގައި މިހާރު ތިބި ލަވަކިއުންތެރިން ވަރަށް ދަށު ދަރަޖައަކަށް ވެސް ވައްޓާލި އެވެ. އަދި ދެން ތިބި ދެ ފަނޑިޔާރުންނާ މެދު އޮތް ހިތްހަމަނުޖެހުންތައް ވެސް ބޭރުކޮށްލި އެވެ. އެގޮތުން އޭނާ ބުނީ ބައިވެރިންނަށް އަބަދު ސަނާ ކިޔަން ނުޖެހޭ ކަމަށެވެ.

މޯލްޑިވިއަން އައިޑޮލްގެ ސީޒަން ދޭއްގެ ފެންވަރާ މެދު ހިތްހަމަނުޖެހިގެން އައްފާން އެ ޝޯ ކުއްލިއަކަށް ދޫކޮށްލުމުން ބެލުންތެރިން ވެސް ތިބީ ވާނުވާ ނޭނގިފަ އެވެ.

އެ ހައިޖާނުގަނޑުގެ ތެރެއިން މިދިޔަ ހަފުތާގެ ހޮނިހިރު ދުވަހުގެ ރޭ ދެއްކި އެލިމިނޭޝަން ޝޯގައި ސީޒަން އެކެއްގެ ޖަޖު އަހުމަދު އިބްރާހީމް (އައްމަޑޭ) އެނބުރި ޝޯ އަށް އަ އެވެ. އެކަމަކު މި ބަދަލު ގިނަ ބެލުންތެރިންނަށް ނަގައިގެނެވުނީ ބޮޑު ޑްރާމާއެއްގެ ގޮތުގަ އެވެ. އަނެއް ބަޔަކު ގަބޫލުކުރީ ޝޯގެ މަގުބޫލުކަން ގެއްލެމުން ދާތީ އާއި އައްމަޑޭ ނެތްތަން ފޫނުބެއްދުމުން، އޭނާ އަލުން ގެންނަންވެގެން ކުރި ކަމެއްގެ ގޮތުގަ އެވެ.

ޝޯގެ ދެން އޮތް ބައިތަކުގައި އައްފާންގެ ގޮނޑި ފުރާނީ އައްމަޑޭތޯ ވެސް ބައެއް މީހުން ސުވާލު އުފައްދަ އެވެ.

އެކަމަކު އޭނާ އެރޭ ދެއްކި ވާހަކައަކުން މިކަމުގައި ބޮޑު ޓްވިސްޓެއް އޮތް ކަމަށް ބެލެވެ އެވެ. އައްމަޑޭ ބުނީ ބަޔަކު ކޮންމެ އެެއްޗެކޭ ކިޔަސް އައިޑޮލްގައި މިހާރު ތިބީ ވަރަށް މޮޅެތި ލަވަކިޔުންތެރިން ކަމަށާއި އެ މީހުން އައްމަޑޭމެންނަށް ވުރެ ވެސް މޮޅު ކަމަށެވެ.

އެެއާ ވިއްދައިގެން ދެން އޭނާ ބުނީ "ބައިވެރިންނަށް އިޝާރާތްކޮށް އެއްޗެެއް ބުނެވޭނީ ޝޯ އަށް މިހެން އާދެވޭ ފަހަރެއްގައި" ކަމަށެވެ. އެހެންކަމުން ދެން ހުރި ހުރިހާ އެޕިސޯޑަކުން އޭނާ ފެނިދާނެކަމާ މެދު އެ އަމިއްލަ އަށް ވެސް އެ އޮތީ ސުވާލު އުފައްދައިފަ އެވެ.

އައްފާން އަލުން ޖަޖުން ޕެނަލުން މިރޭ އަނެއްކާވެސް ފެންނާނެކަމާ މެދު ސޯޝަލް މީޑިއާގައި ވަނީ ބަހުސް ފެށިފަ އެވެ.

އެއް ބަޔަކު ބުނާ ގޮތުގައި އަލުން އައްފާން އައުމަކީ އެރޭ ނުކުމެގެން ދަމުން ދެއްކި ވާހަކަތަކުގައި އޮއްޓަރެއް ނެތްކަން ހާމަކޮށް ދޭނެ ކަމެކެވެ. މިހާރު ތިބި ބައިވެރިންނަށް ލަވަކިޔަން ނޭނގޭ ކަމަށް ބުނެ ނުކުމެގެން ދިޔަ ފަނޑިޔާރަކު އަލުން އެނބުރި އަންނަންވީ ކީއްކުރަންތޯ ވެސް ބައެއް މީހުން ސުވާލުކުރެ އެވެ.

އެކަމަކު އެއީ ޑްރާމާގަނޑެއް ނަމަ އަލުން ނާންނަންވީ ސަބަބެއް ވެސް ނެތެވެ.