ރާއްޖެ ބަލިކޮށް ނޭޕާލަށް ލީގު ބުރުގެ އެއް ވަނަ

ބަންގްލަދޭޝްގައި މިހާރު ކުރިއަށްދާ އޭވީސީ ސީނިއާ ވިމެންސް ސެންޓްރަލް ޒޯން ވޮލީބޯލް ޗެމްޕިއަންޝިޕްގައި މިއަދު ކުޅުނު މެޗުން ރާއްޖޭގެ ގައުމީ އަންހެން ޓީމުގެ މައްޗަށް ފަސޭހަކަމާ އެކު ސީދާ ތިން ސެޓުން ކުރި ހޯދައި ނޭޕާލުން ލީގު ބުރުގެ އެއް ވަނަ ހޯދައިފި އެވެ.

ހުރިހާ މެޗަކުން މޮޅުވެގެން މުބާރާތުގެ ފައިނަލުގެ ފުރުސަތު ހޯދި ނޭޕާލް މާދަމާގެ ފައިނަލުގައި ވެސް ނުކުންނާނީ ރާއްޖެއާ ދެކޮޅަށެވެ. ރާއްޖޭން ވަނީ ކުޅުނު ފުރަތަމަ ތިން މެޗުން މޮޅުވެ ފައިނަލުން ފުރުސަތު ހޯދައިފަ އެވެ. މިއީ މިހާތަނަށް ރާއްޖޭގެ އަންހެން ވޮލީ ޓީމަށް މުބާރާތެއްގައި ލިބުނު އެންމެ ރަނގަޅު ކާމިޔާބީ އެވެ. މާދަމާ ކުޅޭ ފައިނަލް ފަށާނީ ރާއްޖެ ގަޑިން މެންދުރު ދޭއް ޖަހާއިރު އެވެ.

ޑާކާގެ ޝަހީދު ސުރަވާރުދީ އިންޑޯ ސްޓޭޑިއަމްގައި މިއަދު ކުޅުނު މެޗުގައި ދެ ޓީމުގެ ފަރާތުން ވެސް މާ ވަރުގަދަ ކުޅުމެއް ނުފެނެ އެވެ. އެއީ މާދަމާ ފައިނަލް މެޗު އޮތުމުން ކަމަށް ބެލެވެ އެެވެ. މެޗުގެ ސެޓުތައް ނޭޕާލުން ގެންދިޔައީ 25-14، 25-05 އަދި 25-13 އިންނެވެ. މި މެޗުގައި ނޭޕާލާއި ރާއްޖޭން ވެސް ބަދަލުތައް ގެނެސްގެން ކުޅުނުއިރު، ނޭޕާލުގެ އެޓޭކްތައް ފެނުނީ މާ ވަރުގަދަކޮށެވެ.

ރާއްޖޭގެ މައްޗަށް ނޭޕާލުން ކުރިހޯދުމުގައި މި މެޗުގައި ވެސް މޮޅު ކުޅުމެއް އެ ޓީމުގެ ތަރި ޕްރަތީބާ މާލީ އެވެ. ޕްރަތީބާގެ އިތުރުން ނޭޕާލުގެ ގިނަ ކުޅުންތެރިންނަކީ ރާއްޖޭގެ މުބާރާތްތަކުގައި ކުޅެން އަންނަ ކުޅުންތެރިންނެވެ. އެހެންކަމުން ރާއްޖޭގެ ކުޅުންތެރިން ކައިރީގައި ކުޅެން ޖެހޭ ގޮތް ވިސްނައިގެން ނޭޕާލުން ނަތީޖާ ނެރެ އެވެ.

މާދަމާގެ ފައިނަލަށް ނުކުންނައިރު މިއަދުގެ މެޗުން ލިބުނު ފިލާވަޅުތަކުގެ އަލީގައި ގައުމީ އަންހެން ޓީމު ރަނގަޅަށް ތައްޔާރުވާނެ އެވެ. އެ ޓީމުން މި ފަހަރުގެ މުބާރާތަށް އަމާޒުހިފީ މެޑަލަކަށް ޓާގެޓްކޮށްގެންނެވެ. މިހާރު ވެސް މަދުވެގެން ރިހި މެޑަލެއް ކަށަވަރުވެފައިވާއިރު، ޓީމުން ބޭނުންވަނީ ރަން މެޑަލެއް ހޯދުމަށެވެ. އެހެން ކަމުން މި މެޗަށް ވުރެ ރަނގަޅަށް މާދަމާގެ ފައިނަލަށް ތައްޔާރުވާނެ އެވެ.

ފަސް ޓީމު ވާދަކުރާ މި މުބާރާތުގެ ފުރަތަމަ މެޗުން ރާއްޖެ މޮޅުވީ ކިރްގިސްތާނާ ވާދަކޮށް ފޯރިގަދަ ކުޅުމަކަށް ފަހު 3-2 ސެޓުންނެވެ. އެ އަށް ފަހު މުބާރާތް ބާއްވާ ބަންގްލަދޭޝްގެ އިތުރުން އަފްގާނިސްތާންގެ މައްޗަށް ރާއްޖޭން ކުރިހޯދީ ސީދާ ތިން ސެޓުންނެވެ.

ގައުމީ ޓީމު މި މުބާރާތަށް ތައްޔާރުވީ ކޯޗު އަހުމަދު އަދީލް (ބޭބެ)ގެ އިރުޝާދުގެ ދަށުންނެވެ. އެކަމަކު މުބާރާތުގައި ޓީމަށް ބެންޗުގައި އިރުޝާދުދެނީ ބޭބެގެ އެހީތެރިކަމާ އެކު އެސިސްޓަންޓް ކޯޗު މުހައްމަދު ފައިސަލް އެވެ. ބޭބެ އަށް ބެންޗުގައި އިނދެ ޓީމަށް އިރުޝާދު ނުދެވެނީ މުބާރާތަށް ފޮނުވި ދެ ޓީމު ލިސްޓުގެ ތެރެއިން އޭވީސީން ބަލައިގަތް ޓީމު ލިސްޓުގައި ކޯޗެއްގެ ގޮތުގައި ބޭބެގެ ނަން ނެތުމުންނެވެ. އެހެން ނަމަވެސް ބޭބެ އަންނަނީ ބެންޗު ބޭރުގައި އިނދެ ވެސް ޓީމަށް އިރުޝާދުދިނުމުގައި އެހީތެރިކަން ފޯރުކޮށްދެމުންނެވެ.