މި ކޯޗު ރާއްޖޭގެ ޗެލެންޖް ނެގީ އުފަލާ އެކު!

ތަޖުރިބާ އާއި ކާމިޔާބަށް ބެލިޔަސް ރާއްޖޭގެ ގައުމީ ފިރިހެން ވޮލީބޯޅާ ޓީމަށް ހަމަޖެއްސި ކޯޗު ސާބިއާގެ މިލޮރަޑް ކިޔާޗް އަކީ ދުނިޔޭގެ ފެންވަރުގައި ވެސް ފާހަގަކޮށްލެވޭނެ ކޯޗެކެވެ. އެ ފަދަ ވަނަވަރަކާ އެކު އޭނާ އަށް ފަސޭހައިން ކޮންމެ ގައުމެއްގައި ވެސް މަސައްކަތް ކުރެވޭނެ އެވެ. އެކަމަކު އޭނާ ރާއްޖޭގެ ފިރިހެން ވޮލީ ޓީމުގެ ކޯޗުކަމާ ހަވާލުވާން ނިންމީ މި ޗެލެންޖާ މެދު ހުރި ޝައުގުވެރިކަމެއްގެ ބޮޑު ކަމުންނެވެ.

"ތެދެއް އަހަރެން ބަލްގޭރިއާ، ސާބިއާ އަދި އީރާނަށް ވެސް ކޯޗުކޮށްދީފިން ކުރިން. އެކަމަކު އެ ހުރިހާ ކަމަކީ ކުރިންވެފައި ހުރި ކަންތައް. އަހަންނަކީ އަބަދުވެސް ޗެލެންޖް ނަގާ މީހެއް. ރާއްޖޭގެ ވޮލީ ޓީމާ ހަވާލުވީ ވެސް މި ޗެލެންޖާ މެދު އަހަރެންގެ ޝައުގުވެރިކަން ބޮޑުވުމުން،" ޔޫގޯސްލާވިއާ ޓީމު ގޮވައިގެން 1996 ވަނަ އަހަރު ވޯލްޑް ލީގުގެ ތިން ވަނަ ހޯދި މިލޮރަޑް ބުންޏެވެ.

"އަހަންނަށް ލިބިފައި ހުރި ވޮލީގެ އިލްމާއި އެހެނިހެން ކަންތައްތައް ވީ އެންމެ ފުޅާކޮށް މީހުންނަށް ހިއްސާކުރެވުމަކީ ލިބޭ އެންމެ ބޮޑު ހިތްހަމަޖެހުން. ރާއްޖޭގައި މި ޗެލެންޖް ނަގައިގެން ހުރެ މި އެންމެނަށް ވެސް މި ކަންތައްތައް ކިޔައިދެވޭތީ ވަރަށް ހިތްހަމަޖެހޭ."

އޮކްޓޫބަރު މަހު މިލޮރަޑާ ގައުމީ ފިރިހެން ޓީމުގެ ކޯޗުކަން ހަވާލުކުރިއިރު، އޭނާ ޓީމުގެ ޒިންމާއާ ހަވާލުވީ ނޮވެމްބަރު މަހު ތެރޭގަ އެވެ. ފިރިހެން ޓީމާއި ހަވާލުވުމުގެ ކުރިން މިލޮރަޑް ވަނީ މި މަހު ބަންގްލަދޭޝްގައި ކުރިއަށްދިޔަ އޭވީސީ ސީނިއާ ވިމެންސް ސެންޓްރަލް ޒޯން މުބާރާތުން ރިހި މެޑަލް ހޯދި ގައުމީ އަންހެން ވޮލީ ޓީމުން މާލޭގައި ކުރިއަށްދިޔަ ޓްރެއިނިންތަކުގައި އެހީތެރިކަން ފޯރުކޮށްދީފަ އެވެ. އަންހެން ޓީމަށް ވެސް އެހީވުމަށް ފަހު މީގެ ދެ ހަފްތާއެއްހާ ދުވަސް ކުރިން މިލޮރަޑް ވަނީ ފިިރިހެން ޓީމުގެ މަސައްކަތް ފަށައިފަ އެވެ. މިލޮރަޑަށް އެހީތެރިވުމުގެ ގޮތުން ސާބިއާގެ ޓްރެއިނަރު ކިޔަޗް ރަޑޯވަން ވެސް އަންނަނީ ވޮލީ ޓީމުގައި މަސައްކަތް ކުރަމުންނެވެ.

"ޔަގީނުން ވެސް އަހަންނަށް އެނގޭ ކަމަކީ ރާއްޖޭގެ އަންހެން އަދި ފިރިހެން ކުޅުންތެރިންގެ ކިބައިގައި ވެސް ހުނަރު އެބަހުރި. އަދި ކުރިއެރުމަށް ވެސް ވަރަށް ބޮޑު ޖާގައެއް އެބައޮތް. އެ ކުޅުންތެރިން ކުރިއެރުވުމުގައި އަހަރެން ވެސް އެ ކުޅުންތެރިން ވެސް މަސައްކަތްކުރަން ޖެހޭނެ. މީގެ ދެކޮޅުން ވެސް އެއް ފޯކަސް އެއްގައި މަސައްކަތް ކޮށްފިއްޔާ މިއީ އުނދަގޫ ކަމަކަށްނުވާނެ،" މިލޮރަޑް ބުންޏެވެ.

މި ފަހަރުގެ ސައުތު އޭޝިއަން ގޭމްސް އަށް މަހަކަށް ވުރެން ވެސް ކުޑަ ދުވަސްކޮޅެއް އޮއްވައި މިލޮރަޑަށް ޓީމުގެ މަސައްކަތްތައް ފެށުނުއިރު، މިހާރު އޭނާ އަންނަނީ ސްރީ ލަންކާގައި ޓްރެއިނިން ކޭމްޕެއް ފުރިހަމަކުރަމުންނެވެ. މި ޓްރެއިނިން ކޭމްޕްގެ ތެރޭގައި އަންހެން ޓީމަށް ވެސް މިލޮރަޑްގެ އެހީތެރިކަން ފޯރުކޮށްދޭނެ ކަމަށް ގައުމީ އަންހެން ޓީމުގެ ކޯޗު އަހުމަދު އަދީލް (ބޭބެ) ވަނީ ބުނެފަ އެވެ.

މި މަހު 27 ވަނަ ދުވަހަށް ތާވަލުކޮށްފައިވާ ސައުތު އޭޝިއަން ގޭމްސްގެ ވޮލީބޯޅަ އިވެންޓުގައި ފިރިހެން ޓީމު ހިމެނެނީ ޕާކިސްތާނާއި ލަންކާއާ އެކު ގްރޫޕް ބީގަ އެވެ. މި މުބާރާތުގައި ވެސް މެޑަލެއްގެ އަމާޒުގައި މަސައްކަތްކުރާއިރު، ހަގީގަތުގައި ފިރިހެން ވޮލީ ޓީމާ އެކު މިލޮރަޑްގެ ބޮޑު މަސައްކަތަށް ވެގެންދާނީ އަންނަ އަހަރުގެ ސެންޓްރަލް ޒޯން މުބާރާތެވެ.

"ޔަގީނުން ވެސް އެންމެން ވަރަށް ރަނގަޅަށް މަސައްކަތް އެބަކުރޭ. އަހަރެމެންގެ އެންމެ ބޮޑު ޓާގެޓަކީ އަންނަ އަހަރު އޮތް ސެންޓްރަލް ޒޯން މުބާރާތް. އޭރަށް މި ޓީމު އޮންނާނީ ވަރަށް ރަނގަޅަށް ތައްޔާރުވެފައި،" މިލޮރަޑް ބުންޏެވެ.

ސައުތު އޭޝިއަން ގޭމްސް އަށް އަމާޒުކޮށް މިލޮރަޑްގެ ބެލުމުގެ ދަށުން ބޭއްވި ގައުމީ ޓީމުގެ ޓްރަޔަލްގެ ތެރެއިން ޓީމުގެ ސްކޮޑަށް ވަނީ އާ ތިން ކުޅުންތެރިން އަރައިފަ އެވެ. އެއީ މެދުކެނޑުމަކަށް ފަހު ފުރުސަތު ލިބުނު އަޝްފާގު އާދަމް (އައްކަޅޭ) އާއި މުހައްމަދު ޝާއިން (ޝާއިންޓެ) އަދި މުޅިން އަލަށް ޓީމުން ފުރުސަތު ހޯދި ދިވެހި ސިފައިންގެ ކްލަބްގެ ސެޓަރު ހުސެއިން ޝާހިދު (ޝާޑު) އެވެ.