ސާލިމް ބުނީ މަހްމޫދު މަރާލީ ޝައިތޯނާ ބޮލަށް ވަދެގެން ކަމަށް

މިދިޔަ އަހަރުގެ އޮކްޓޫބަރު މަހު އދ. ދަނގެތީގައި އެ ރަށު ވިޔަފާރިއެއް ކަމަށްވާ މަހްމޫދު އަބޫބަކުރު މަރާލި މައްސަލާގައި ހައްޔަރުކުރި ބަންގްލާދޭޝް މީހާ ކަމަށްވާ ޝާ އަލޮމް މިއާ (ސާލިމް) ގެ މައްޗަށް އުފުލާފައިވާ ގަސްތުގައި މީހަކު މެރުމުގެ ދައުވާ އާއި މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ އަށް އޭނާ ޝަރީއަތުގައި އިއުތިރާފްވެއްޖެ އެވެ.

ސާލިމްގެ އިއުތިރާފަށް ފަހު، އޭނާ އަށް ދައުލަތުން ހަމަޖައްސައިދީފައިވާ ވަކީލް މަޖީދު އަލީ ވިދާޅުވީ ސާލިމް ވަނީ މިއީ ޝައިތޯނާ ބޮލަށް އެރިގެން ކުރެވުނު އަމަލެއް ކަމަށާއި އެކަމަށް މާފަށް އެދޭ ކަމަށް ތަހުގީގުގައި ސާލިމް ބުނެފައިވާ ކަމަށެވެ. އެހެންވެ މި މައްސަލާގައި އިއުތިރާފް އެއްބަސްވުމަކަށް އެދިފައި ވާނެ ކަމަށް ވިދާޅުވި އެވެ.

މި މައްސަލާގައި މިއަދު ބޭއްވި އިބްތިދާއީ އަޑުއެހުމުގައި ދައުލަތުން ދައުވާ އިއްވުމުން، ތަރުޖަމާނެއްގެ އެހީގައި ވާހަކަ ދައްކަމުން ބުނީ ތަހުގީގުގައި އިއުތިރާފްވި ގޮތަށް މިހާރު ވެސް އިއުތުރާފްވާ ކަމަށާއި އިތުރަށް ދައްކާނެ ވާހަކައެއް ނެތް ކަމަށެވެ. އަދި ދައުވާގައި، ސާލިމާ ދެކޮޅަށް ހުރި ހުރިހާ ވާހަކަތަކަށް އޭނާ އެއްބަސްވި އެވެ.

ދައުވާ ލިބޭ ފަރާތަށް އޮތް ހައްގުތައް އިސް ގާޒީ އަހްމަދު ޝަކީލް ސާފުކޮށްދެއްވުމުން ސާލިމް ބުނީ އަމިއްލަ އަށް ވަކީލެއް ހަމަޖައްސަން ފައިސާ ނެތް ކަމަށާއި ދައުލަތުން ހަމަޖައްސާފައިވާ ވަކީލާ އެކު ކުރިއަށް ދާން ބޭނުންވާ ކަމަށެވެ. މިގޮތަށް އެއްބަސްވަނީ އެއްވެސް މަޖުބޫރީ ހާލަތެއް އޮވެގެންތޯ އެހުމުން ބުނީ އޭނާ ކުށްތަކަށް އިއުތިރާފް ވަނީ އެއްވެސް މީހަކު އެގޮތަށް ބުނެގެން ނޫން ކަމަށާއި މިއީ އަމިއްލަ ނިންމުމެއް ކަމަށެވެ.

ސާލިމްގެ ދިފާއީ ވަކީލް މަޖީދު އަލީ ވިދާޅުވީ ސާލިމް އައީ ތަހުގީގު މަރުހަލާއިން ފެށިގެން ވެސް އިއުތުރާފްވަމުން ކަމަށާއި ސާލިމް ބޭނުންވާ ނަމަ އޭނާ ހުންނެވީ ޝަރީއަތުގައި ވެސް އޭނާ އަށް އެހީވާން ތައްޔާރަށް ކަމަށެވެ.

މި މައްސަލާގައި އިއުތިރާފް އެއްބަސްވުމެއް ހަދަން ހުށަހަޅާފައިވާ ވިޔަސް ދައުލަތުގެ ވަކީލް އައިޝަތު މުނާ ޝަމީމް ވިދާޅުވީ މިއީ މަރުގެ މައްސަލައެއް ކަމަށް ވާތީ އެކަމުގައި ވާރިސުންގެ ބަސް ހޯދި އިރު، ސާލިމްގެ މައްޗަށް ކުށް ސާބިތުވެއްޖެ ނަމަ މަރަށް މަރު ހިފަން ބޭނުންވާ ކަމަށް ހުރިހާ ވާރިސުން ވެސް ބުނެފައިވާ ކަމަށެވެ. އެހެން ސާލިމާ އެކު އިއުތިރާފްގެ އެއްބަސްވުމެއް ނުހަދަން ނިންމާފައިވާ ކަމަށް ވިދާޅުވި އެވެ.

ދިފާއީ ވަކީލް ވިދާޅުވީ މި މައްސަލާގައި ވެސް އިއުތިރާފް އެއްބަސްވުމެއް ހެދުމުގެ އިހްތިޔާރު އޮންނާނެ ކަމަަށް ދެކެވަޑައިގަންނަވާ ކަމަށެވެ. އިއުތިރާފްވެ ސާލިމް ވަނީ އެއީ ޝައިތާނާ ބޮލަށް ވަދެގެން ކުރެވުނު ކަމެއްގެ ގޮތުގައި ދެކޭ ކަމަށާއި ކުރެވުނު ކުށް ގަބޫލުކޮށް މާފަށް އެދިފައި ކަމަށް ވަކީލް ވިދާޅުވި އެވެ.

ދައުވާގައި ބުނެފައި ވަނީ ސާލިމް މަހްމޫދު މަރާލީ ވަޅިންނާއި ކޮޅު ތޫނުކޮށްފައިވާ ދެ ދަގަނޑުބުރިން މަހްމޫދުގެ މެޔާއި ކަރަށް ހަމަލާދީގެން ކަމަށެވެ. މަހްމޫދުގެ ހަށިގަނޑުގެ ބޮލާއި ފަޔަށް ގޯންޏެއް ލައްވައިގެން ގެންގޮސް ފެންވަޅަކަށް ބޯކޮޅުވަތަށް ވައްޓާލި ކަމަށެވެ. މި ކަންކަމަށް ސާލިމް އިއުތިރާފް ވިޔަސް ދައުލަތުން އެދުނީ މިއީ މަރުގެ މައްސަލައަކަށް ވާތީ ހެކި ހުށަހަޅަން ބޭނުންވާ ކަމަށެވެ. ދައުލަތުގެ މި ހުށަހެޅުމާ ގުޅިގެން ސާލިމްގެ ވަކީލް ވިދާޅުވީ ކުށަށް އިއުތިރާފް ވުމުން އަމަލުކުރާނެ ގޮތް ޖިނާއީ އިޖުރާއާތުގެ ގާނޫނުގައި އެބަ އޮތް ކަމަށާއި އެހެންވެ ދެން ބާއްވަން ޖެހޭނީ އަވަސް ނިއާގެ ޝަރީއަތެއް ކަމަށް ދެކެވަޑައިގަންނަވާ ކަމަށެވެ. ސާލިމް އިއުތިރާފުން ރުޖޫއަވާ ހާލަތުގައި ދެން އަމަލުކުރެވޭނެ ގޮތް ވެސް އެބަ އޮތް ކަމަށާއި އެހެންވެ އިއުތިރާފުވުމުން ވެސް ހެކި ހުށަހަޅައިގެން ކުރިއަށް ގެންދިއުން އެއީ ގާނޫނުގައި ނެތް ކަމެއްގެ ތެރެއަށް ވަނުން ކަމަށެވެ.

މައްސަލަ ބައްލަވާ ގާޒީ ޝަކީލް ވެސް ވިދާޅުވީ ދެން މި މައްސަލަ ކުރިއަށް ގެންދަން ޖެހޭނީ އަވަސް ނިއާގެ މައްސަލައެއްގެ ގޮތުގައި ކަމަށެވެ. އެހެންވެ މި މަހުގެ 26 ވަނަ ދުވަހުގެ ހެނދުނު 9:30 އަށް ޝަރީއަތުގެ އަޑުއެހުމެއް ހަމަޖެއްސެވުމަށް ފަހު މިއަދުގެ އަޑުއެހުން ނިންމަވާލެއްވީ އެވެ.

ފުލުހުން ބުނެފައިވަނީ، ދަނގެތީގައި އުމުރުން ދުވަސްވީ މީހަކު ބަލަން ގެނެސް ހުރި ސާލިމް، މަހްމޫދަށް ހަމަލާދީ މަރާލީ އޭނާ އަތުން ފައިސާ ހޯދަން އުޅުމުގެ ތެރޭގައި ކަމަށެވެ. މަރާލުމަށް ފަހު ހަށިގަނޑު އެއްލާލާފައި އޮތީ ފަޅު ގެއެއްގައި ހުންނަ ވަޅެއްގެ ތެރޭގަ އެވެ. މަހްމޫދު މަރާލީ ސާލިމް އުޅޭ ގެޔަށް ރޭނގަނޑުގެ ވަގުތެއްގައި ގެންގޮސް، ވަޅިން ހަމަލާ ދީގެންނެވެ. އޭނާގެ ހަށިގަނޑު ވަޅަށް ވައްޓާލާފައި އޮތީ ގޯންޏަކަށް ލުމަށް ފަހުގަ އެވެ. މި ހުރިހާ ކަމެއް ވެސް ސާލިމް ކުރީ އެކަނި ކަމަށާއި މި ކަމުގައި އިތުރު މީހެއްގެ ބައިވެރިވުން އޮތްކަން އެނގެން ނެތް ކަމަށް ވެސް ފުލުހުން ވަނީ ބުނެފަ އެވެ.