މަހުލޫފު މިނިވަންވެއްޖެ

ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފަށް އިއްވި 10 މަހާއި 24 ދުވަހުގެ ޖަލު ހުކުމަކަށް ފަހު މީގެ އިރުކޮޅެއް ކުރިން އޭނާ މިނިވަންކޮށްފި އެވެ.

މަހްލޫފުގެ ޖަލު ހުކުމް ރޭ ދަންވަރު 12:00 އާ ހަމައަށް ތަންފީޒުކޮށް ނިމުމުން އޭނާ ދޫކޮށްލީ މިއަދު ހެނދުނު އެވެ.

"ދެންމެ [ހެނދުނު 8:30 ހާއިރު] މީހަކު ދޮރުގައި ޓަކި ތަޅައިގެން، ބެލިއިރު ބޭރުގައި ހުރީ މަހްލޫފް. ދޫކޮށްލިކަން ކުރިން ނާންގައި އެކަނި ގެ އަށް އައިސް ހުއްޓާ ފެނުނީ،" މަހްލޫފްގެ އަނބިކަނބަލުން ނަޒްރާ ނަސީމް (ނަޒޫ) "މިހާރު" އަށް ވިދާޅުވި އެވެ.

މަހްލޫފް ވިދާޅުވީ މިއީ ވަރަށް އުފާވެރި ވަގުތުކޮޅެއް ކަމަށާއި މިރެއިން ފެށިގެން އަނެއްކާވެސް ސިޔާސީ ދާއިރާގައި ފެންނަމުންދާނެ ކަމަށެވެ.

"ސިޔާސީ އިސްލާހީ މަސައްކަތް އަނެއްކާވެސް މިފެށީ. ދޫކުރުމެއް ނެތް. ކުރިއަށް ވުރެ ބޮޑަށް ކުރިއަށް އޮތްތަނުގައި މިކަމުގައި ދެމިހުންނާނަން،" އޭނާ ވިދާޅުވި އެވެ.

މަހްލޫފު މިނިވަންވުމުގެ އުފަލުގައި ޚާއްސަ ޖަލްސާއެއް އެމްޑީޕީގެ ހަރުގޭގައި މިރޭ ބޭއްވުމަށް އެ ޕާޓީން ވަނީ ނިންމައިފަ އެވެ. ތަރާވީހަކާ އެކު ބާއްވާ މި ޖަލްސާގައި މަހްލޫފު ބައިވެރިވެވަޑައިގެން ވާހަކަ ދައްކަވާނެ އެވެ.

ސިޔާސީ އިދިކޮޅު ހަރަކާތުގައި ފަހަކަށް އައިސް ސަރުކާރަށް ބޮޑެތި ޕްރެޝަރުތަކެއް ކުރަމުން އައި މަހްލޫފު ޖަލުން މިނިވަންކުރިއިރު، ކްރިމިނަލް ކޯޓުން އޭނާ އަށް އިއްވި ދެ ހުކުމުގެ ތެރެއިން ހަ މަހުގެ ޖަލު ހުކުމަށް ހައި ކޯޓުން ތާއީދުކުރީ އިއްޔެ އެވެ. ފުލުހުންގެ ދައުރު އަދާކުރަން ހުރަސް އެޅިކަން ސާބިތުވެ، މަހްލޫފަށް ދަށު ކޯޓުން އިއްވި އެ ހުކުމަށް ހައި ކޯޓުން އިއްޔެ ތާއީދު ކުރިއިރު، މި ހުކުމް އޮތީ ތަންފީޒުކޮށް ނިމިފަ އެވެ.

މަހްލޫފް ޖަލުން އެއްކޮށް މި މިނިވަންވީ ހަތަރު މަހާއި 24 ދުވަހުގެ ޖަލު ހުކުމް ތަންފީޒުކޮށް ނިމުމުންނެވެ.

މަހްލޫފް ވަނީ ޖަލުގައި ހޭދަކުރެއްވި މުއްދަތުގެ ތެރޭގައި ދެ ފަހަރެއްގެ މަތިން އިންޑިއާ އަށް ވަޑައިގެން ބޭސްފަރުވާ ކުރައްވައިފަ އެވެ. އަދި ޖަލުގައި ހުންނަވަނިކޮށް އޭނާ އަށް ލިބިވަޑައިގަންނަވަން ޖެހޭ ބައެއް ހައްގުތަކުން މަހްރޫމް ކުރި ކަމަށް ވިދާޅުވެ، ބަނޑުހައި ހޫނު ކަމުގެ ހަޅުތާލެއް ވެސް ކުރެއްވި އެވެ.

ފުލުހުންނަށް ހުރަސް އެޅުމުގެ ދެ ދައުވާއެއް ސާބިތުވެ، މަހްލޫފް ޖަލަށްލުމާ ގުޅިގެން، އދ. ގެ ވޯކިން ގްރޫޕް އޮން އާބިޓްރަރީ ޑިޓެންޝަނުން މިދިޔަ ބުދަދުވަހު ނިންމާފައި ވަނީ އޭނާއާ މެދު އެ ފިޔަވަޅު އެޅީ ބައިނަލްއަގްވާމީ މުއާހަދާތަކާ ޚިލާފަށް ކަމަށާއި ވަގުތުން ދޫކޮށްލަންޖެހޭ ކަމަށެވެ.

މަހްލޫފްގެ ފަރާތުން ވޯކިން ގްރޫޕަށް ހުށަހެޅި މައްސަލަ ބެލުމަަށް ފަހު ނިންމި ނިންމުމުގައިވަނީ މަހްލޫފް ޖަލަށްލާފައި ވަނީ އިންސާނީ ހައްގުތަކާ ބެހޭ ބައިނަލްއަގްވާމީ މުއާހަދާ އާއި އދ. ގެ މަދަނީ އަދި ސިޔާސީ ހައްގުތަކާ ބެހޭ މުއާހަދާއާ ޚިލާފަށް ކަމަށެވެ. އެހެންވެ، އެންމެ ރަނގަޅު ހައްލަކީ މަހްލޫފް ވަގުތުން ދޫކޮށްލުން ކަމަށާއި އަދި އެކަމުން އޭނާއަށް ލިބުނު ގެއްލުމުގެ ބަދަލު ގާނޫނުތަކާ އެއްގޮތަށް ދިނުން ކަމަށް އެ ނިންމުމުގައިވެ އެވެ.