ރައީސްގެ ތަފާތު ފޮޓޯ؛ މާނަ ކުރެވެނީ ކިހިނެއް؟

ރައީސް އިބްރާހިމް މުހައްމަދު ސޯލިހް، ރަސްމީ މޭޒުކޮޅު ކައިރީގައި ހުންނަވަނިކޮށް ނަގާފައިވާ ފޮޓޯ ތަފާތެވެ. ރާއްޖޭގައި ރައީސްކަން ކުރެއްވި ބޭބޭފުޅުންގެ މިފަދަ ފޮޓޯތައް މަދު ފަހަރެއްގައި ނޫނީ އާންމުކޮށްފައި ނެތުމަކީ ފޮޓޯ ހާއްސަވި އެއް ސަބަބެވެ. ރައީސް އޮފީހުން މި ފޮޓޯ އިއްޔެ އާންމުކުރުމާ އެކު މައްސުނި ހިޔާލުތަކަކާ އެކު އެ ފޮޓޯ ވައިރަލްވި އެވެ.

ފޮޓޯގައި އެ މަނިކުފާނު ހުންނެވީ ލުއި ހިނިތުންވުމެއްގައި، މިނިމަމް ވޭޖް ކަނޑައެޅުމުގެ ރިޕޯޓް ދިރާސާ ކުރައްވާށެވެ. އެއީ، މަސައްކަތްތެރިންގެ ކުރިމަގު އަދި ދިގު އިންތިޒާރަކާ ގުޅިފައިވާ މުހިއްމު ރިޕޯޓެކެވެ. އެންމެ ދަށް އުޖޫރައިގެ ގޮތުގައި ކަނޑައަޅަން އެމަނިކުފާނު ނިންމަވާނެ އަދަދު ރައްޔިތުންނަށް މުހިއްމެވެ.

ހުދު ގަމީސްކޮޅުގައި ރީނދޫ ޓައީއެއް ތުރުކުރައްވައި އެއް އަތްޕުޅުން ރިޕޯޓްގައި ހިފަހައްޓަވައި ބައްލަވަން ހުންނެވީ އަނެއް އަތްޕުޅުން ދަތްދޮޅީގައި ހިފަހައްޓަވައިގެންނެވެ. އެމަނިކުފާނަށް ޚާއްސަ ގޮނޑިކޮޅު ކައިރީގައި ދިވެހި ދިދަ ހުއްޓެވެ.

އާއްމުންނަށް، އެ މަނިކުފާނުގެ މޭޒުކޮޅު މި ފެނުނީ އަދި އަލަށެވެ. އަދި މިއީ މިފަދަ ފޮޓޯއެއް އާއްމު ކުރެއްވި ފުރަތަމަ ފަހަރު ވެސް މެ އެވެ.

ރާއްޖޭގެ އެހެން ރައީސުންގެ ވެސް މި މަންޒަރު އެހާ އާއްމެއް ނޫނެވެ. ރަސްމީ މޭޒުކޮޅުގައި ނަންގަވާފައިވާ ފޮޓޯއެއް ފެންނާނީ ވަރަށް މަދު ފަހަރަކު އެވެ.

ރައީސް އޮފީހުގެ ރަސްމީ، ސޯޝަލް މީޑިއާ އެކައުންޓްތަކުން އެ ފޮޓޯފުޅު އާއްމުކުރުމާ އެކު، އެމެރިކާގެ ރައީސް ބަރަކް އޮބާމާއާ ގުޅުވީ އެހެންވެ ކަމަށް ވެދާނެ އެވެ. މުހިއްމު ދުވަސްތައް ނުވަތަ ނިންމުންތަކާ ގުޅުވައި، އޮބާމާގެ އެފަދަ ފޮޓޯފުޅުތައް ވައިޓް ހައުސް އިން އާއްމުކޮށްފައިވެ އެވެ. ރަސްމީ މަސައްކަތްޕުޅުގެ އިތުރުން މުވައްޒަފުންނާ އެކު ހުސް ވަގުތު ހޭދަކުރައްވާ ގޮތް ފޮޓޯ އިން ސިފަކޮށްދީފައި ހުރެ އެވެ.

ރާއްޖޭގެ ރައީސްގެ ވެސް އެއީ އެފަދަ ފޮޓޯ އެކެވެ. އެ މަންޒަރު ރައީސް އޮފީހުން އާއްމުކުރީ މަސައްކަތްތެރިންގެ އިންތިޒާރުގައި ރައީސް އުއްމީދީ ކުލަ ޖައްސައިދެއްވާނެ ކަމުގެ ޔަގީންކަން ދެއްވުމުގެ ގޮތުން ކަމަށް ވެދާނެ އެވެ. އެކަމަކު އެއް ބަޔަކު ހިތްހަމަނުޖެހުނީ އެވެ. ފޮޓޯ ނަންގަވަން ޝައުގުވެރިވެވަޑައިގަންނަވާ އަދި އަމިއްލަ ފުޅަށް ވަރަށް ރީތި ފޮޓޯފުޅުތަކެއް ނަންގަވާ ރައީސް، ފޮޓޯ އަށް ހުއްޓިވަޑައިގެން ހުންނެވި ޕޯސް ވެސް ކަމުނުދިޔައީ އެވެ.

އެކަކު ބުނީ އަސްލެއް ނޫން ކަމަށާއި ރައީސް ހުންނެވީ މާބޮޑަށް ފޮޓޯ އަށް ހުއްޓިވަޑައިގެން ކަމަށެވެ. އެހެން މީހެއްގެ ހިތްހަމަނުޖެހުން އަމާޒުކުރީ ފޮޓޯގްރާފަރަށެވެ. ރައީސްގެ އެފަދަ ފޮޓޯ ނަގާނެ ގޮތުގެ ހިޔާލުތަކެއް ވެސް ބައެއް މީހުން ދީފައިވެ އެވެ.

އެހެން މީހަކު ބުނިގޮތުގައި ރައީސްގެ ރަސްމީ ގަޑީގެ ފޮޓޯ އާއްމުންނަށް ހިއްސާ ކުރުމަކީ މައްސަލައެއް ނޫނެވެ. އޮބާމާގެ ސީރިއަސްކަން ފެންނަ ގިނަ ފޮޓޯތަކަކީ ވެސް އެކަަމަށް ތައްޔާރުވެ ނަގާފައިވާ ފޮޓޯތަކެއް ކަން އޭނާ ހަނދާންކޮށްދީފައިވެ އެވެ.

އެންމެ ބޮޑު ހިތްހަމަނުޖެހުމަކީ ރައީސް އިބްރާހިމް މުހައްމަދު ސޯލިހްގެ އެ ތަފާތު ފޮޓޯ، މިނިމަމް ވޭޖާ ގުޅުވުމެވެ.

ޓުވިޓާގައި ކޮމެންޓްކުރި އެއް ބަޔަކު އެދިފައި ވަނީ ވީ އެންމެ އަވަހަށް މިނިމަމް ވޭޖް ކަނޑައެޅުމަށެވެ. އެ މީހުން ދެކޭ ގޮތުގައި އެއީ މާބޮޑަށް މިހާރު ވެސް ލަސްވެފައި އޮތް ކަމެކެވެ.

ފޮޓޯއާ މެދު އެއްބަޔަކު ވަރަށް ސީރިއަސްކޮށް ހިޔާލު ފާޅުކުރި ނަމަވެސް އަނެއް ބަޔަކަށް މި ފޮޓޯ ވީ "މީމް" ހަދަން އެއް ވަނައިގެ ފޮޓޯއަކަށެވެ. ރައީސް ހުންނެވި ގޮތަށް އެއްބަޔަކު ފޮޓޯ ނަގައި އެކި ކެޕްޝަންތައް ޖެހި އެވެ. އަދި ރައީސްގެ ފޮޓޯގެ ވާތް ފަރާތުން ފެންނަން ހުރި ގޮނޑީގައި އެކި މީހުން އަދި ކާޓޫން ކެރެކްޓާތައް އިށީނދެ ތިބި ގޮތަށް ފޮޓޯތައް އެޑިޓްކޮށްގެން ވެސް އެބަ އުޅެ އެވެ.

ރައީސުންގެ ރަސްމީ ފޮޓޯތަކަކީ އާއްމުންނާ އޮންނަ ގުޅުމުގެ ބައެކެވެ. އެކަމަކު މިފަދަ ތަފާތު ފޮޓޯތައް ދިވެހިންނަށް އަދި އަލެވެ.