ޔޫއޭއީން ވެސް ވުހާން ވައިރަސް ފެނިއްޖެ، ދިވެހިން އެމްބަސީގައި ރަޖިސްޓްރީވާން އެދެފި

ޔުނައިޓެޑް އަރަބް އެމިރޭޓްސް (ޔޫއޭއީ) އިން ވެސް ވުހާން ވައިރަސް ފެނި، އެ ގައުމުގައި ތިބި ހުރިހާ ދިވެހިން އެ ގައުމުގައި ހުންނަ ރާއްޖޭގެ އެމްބަސީގައި ރަޖިސްޓްރީވާން އެދެފި އެވެ.

އެންމެ ފުރަތަމަ ޗައިނާ އިން ފެނި މިހާރު ހަލުވިކަމާ އެކު ފެތުރެމުންދާ ކޮރޯނާ ވައިރަސް ނުވަތަ ވުހާން ވައިރަސްއާ ގުޅިގެން، ބޭރު ގައުމުތަކުގައި ތިބި ދިވެހިން އެ ގައުމުތަކުގައި ހުންނަ ރާއްޖޭގެ އެމްބަސީތަކުގައި ރަޖިސްޓްރީވާން ކުރިން ވެސް އޮތީ އެދިފަ އެވެ.

ދިވެހިން ގިނަ އަދަދަކަށް އުޅޭ މެލޭޝިއާ އާއި ސްރީ ލަންކާ އިން އެ ވައިރަސް ހުރި މީހުން ފެނިފައި ވާއިރު، އެ ވައިރަސް ހުރި ޗައިނާ މީހަކު ޔޫއޭއީ އިން ވެސް ފުރަތަމަ ފަހަރަށް މިއަދު ވަނީ ފެނިފަ އެވެ.

އެ ގައުމުގައި ހުންނަ ރާއްޖޭގެ އެމްބަސީން ބުނީ ރައްކާތެރިކަމުގެ ފިޔަވަޅެއްގެ ގޮތުން، ޔޫއޭއީގައި ތިބި ހުރިހާ ދިވެހިން ވެސް އެ އެމްބަސީގައި ރަޖިސްޓްރީވާން އެދޭ ކަމަށާއި އޮންލައިން ޕޯޓަލެއް ހަދައި، އެ ޕޯޓަލް މެދުވެރިކޮށް މިހާރު ރަޖިސްޓްރީ ކުރެވޭނެ އިންތިޒާމް ހަމަޖައްސާފައިވާ ކަމަށެވެ.

ވުހާން ވައިރަސް ހުރި މީހުންގެ އަދަދު އިތުރުވަމުން ދާއިރު، މަރުވި މީހުންގެ އަދަދު 100 އަށް ވުރެ މައްޗަށް މިހާރު ވަނީ އަރައިފަ އެވެ.

ރާއްޖެއިން މިހާތަނަށް އެ ވައިރަސް ހުރި މީހަކު ފެނިފައި ނުވިޔަސް، ސަރުކާރުން މިހާރު ވަނީ ރައްކާތެރިކަމުގެ ފިޔަވަޅުތައް އަޅަން ފަށައިފަ އެވެ. އެގޮތުން ރާއްޖެ އަންނަ ހުރިހާ މީހުން އެއާޕޯޓުގައި ސްކްރީން ކުރެވޭނެ އިންތިޒާމް ހަމަޖައްސައި، ވައިރަސް ހުރި މީހުން ކަރަންޓީން ކުރެވޭނެ އިންތިޒާމް ވެސް ވަނީ ހަމަޖައްސައިފަ އެވެ.