ވަކީލުކަމުގެ ހުއްދައަށް ބޭނުންވާ ތަމްރީނު އޭޖީ އޮފީހުގައި ފުރިހަމަ ކުރެވޭނެ އިންތިޒާމް ހަމަޖައްސައިފި

ވަކީލުކަމުގެ ހުއްދަ ހޯދުމުގައި ފުރިހަމަ ކުރަންޖެހޭ ތަމްރީނު ޕްރޮގްރާމް އެޓާނީ ޖެނެރަލްގެ އޮފީހުގައި ފުރިހަމަ ކުރެވޭނެ އިންތިޒާމް އެ އޮފީހުން ހަމަޖައްސައިފި އެވެ.

ގާނޫނީ ފަންނުގެ ގާނޫނުގެ ދަށުން ބާ ކައުންސިލުން އެކުލަވާލި ވަކީލު ކަމުގެ ހުއްދަ ދިނުމުގެ ގަވާއިދު އޮންނަ ގޮތުން ވަކީލުކަމުގެ ހުއްދަ ދެވޭނީ ބާ ކައުންސިލުން ކަނޑައަޅާ ތަންތަނެއްގައި އެއް އަހަރުގެ ތަމްރީން ޕްރޮގްރާމެއް ފުރިހަމަ ކުރުމުންނެވެ. އެކަމަށް ބާ ކައުންސިލުން ގަބޫލުކުރާ ތަންތަނުގެ ތެރޭގައި އެޓާނީ ޖެނެރަލްގެ އޮފީސް ވެސް ހިމެނެ އެވެ.

އެޓާނީ ޖެނެރަލްގެ އޮފީހުން ކުރި ޓްވީޓެއްގައިވަނީ ގާނޫނީ ދާއިރާއިން މަތީ ތައުލީމް ހާސިލް ކުރުމަށް ފަހު ވަކީލުކަމުގެ ހުއްދަ ހޯދަން ބޭނުންވާ ތަމްރީން ޕްރޮގްރާމް އެ އޮފީހުގައި ފުރިހަމަ ކުރެވޭނެ އިންތިޒާމް މިހާރު ހަމަޖައްސާފައިވާ ކަމަށެވެ.

އެކަމާ ގުޅިގެން އެޓާނީ ޖެނެރަލް އިބްރާހިމް ރިފްއަތު ކުރެއްވި ޓްވީޓެއްގައިވަނީ ބާ ކައުންސިލުން އެކުލަވާލި ގަވާއިދުގައި ބުނާ ތަމްރީން ޕްރޮގްރާމް ފުރިހަމަ ކުރަން އެހީވުމުގައި އެޓާނީ ޖެނެރަލްގެ އޮފީހުގެ ފުރިހަމަ އެއްބާރުލުމާއި އެހީތެރިކަން ލިބޭނެ އެވެ.

އެޓާނީ ޖެނެރަލްގެ އޮފީހުން އެގޮތަށް ހަމަޖެއްސިއިރު، ބާ ކައުންސިލުން އިއްޔެ ވަނީ ތަމްރީން ޕްރޮގްރާމް ފުރިހަމަ ކުރުމުގައި ކުރިއަށް ވުރެ ބޮޑެތި ލުއިތަކެއް ލިބޭ ގޮތަށް އާ ގަވާއިދެއް އެކުލަވާލައި، އަމަލުކުރަން ފަށައިފަ އެވެ. އެގޮތުން ތަމްރީން ޕްރޮގްރާމްގައި އެއްފަހަރާ ސުޕަވައިޒް ކުރެވޭ މީހުންގެ އަދަދު ވެސް ވަނީ އިތުރުކޮށްފަ އެވެ.