އަދާލަތު ޕާޓީގެ ރައީސް ކަމުގެ ޝަރުތުތަކުން "ފިރިހެނަކަށްވުން" އުނިކުރަނީ

އަދާލަތު ޕާޓީގެ ރައީސްގެ މަގާމަށް އަންހެނަކަށް ކުރިމަތިލެވޭ ގޮތަށް އެ ޕާޓީގެ އަސާސީ ގަވައިދު އިސްލާހުކުރަން ހުށަހަޅާފައިވާ ކަމަށް އެ ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.

އަދާލަތު ޕާޓީގެ އަސާސީ ގަވައިދުގެ 42 ވަނަ މާއްދާގެ (ޅ) ބުނާ ގޮތުން، ޕާޓީގެ ރައީސް އަދި ނައިބު ރައީސްގެ މަގާމަށް ކުރިމަތިލެވޭނީ ހަމައެކަނި ފިރިހެނުންނަށެވެ.

އެކަމާ ގުޅިގެން ފާޑު ކިޔުން އަމާޒުވެފައި ވަނިކޮށް، އިމްރާން މިއަދު ކުރެއްވި ޓުވީޓެއްގައި ވިދާޅުވީ އަދާލަތު ޕާޓީގެ ރައީސްގެ ކިބައިގައި ހުރުން ލާޒިމް ޝަރުތުތަކުގެ ތެރޭގައި ފިރިހެނަކަށްވުން ހިމަނާފައި އޮތީ ދީނީ ގޮތުން ލާޒިމްކުރާ ކަމަކަށް ނުވިޔަސް ޕާޓީ އުފެދުނުއިރު ޕާޓީގެ މެންބަރުން އެގޮތަށް ބޭނުންވާ ކަމަށް އޭރުގެ ލީޑާޝިޕަށް ފެނުމުން ކަމަށެވެ.

ނަމަވެސް ރައީސްގެ ކިބައިގައި ހުރުން ލާޒިމް ޝަރުތުތަކުގެ ތެރެއިން "ފިރިހެނަކަށްވުން" އުނިކުރަން މިހާރު އިސްލާހެއް ހުށަހަޅާފައިވާ ކަމަށް އިމްރާން ވިދާޅުވި އެވެ. އެއީ މިވަގުތު އަދާލަތު ޕާޓީ ކުރިޔަށް ގޮސްފައިވާ މިންވަރަށް ބަލައި ޕާޓީ އިތުރަށް ހުޅުވާލައި އެންމެ އިސް ސަފުގައި އަންހެނުންނަށް ހަރަކާތްތެރިވުމަށް އޮތް ފުރުސަތު ފަހިކުރުމަށްޓަކައި ކަމަށް އިމްރާން ވިދާޅުވި އެވެ.

"މިގޮތަށް އަޅުގަނޑު އިސްވެ ހުރެ އިސްލާހު ހުށަހެޅީ ޕާޓީގެ އިސް ސަފުގައި ހަރަކާތްތެރިވާ ފަރާތްތަކާއި ޕާޓީގައި ހިމެނޭ ދީނީ އިލްމުވެރިންނާ ވެސް މަޝްވަރާ ކުރުމަށް ފަހު މަޝްވަރާ މަޖިލީހުގެ ހަތް މެންބަރުންގެ ސޮޔާއެކީ،" އިމްރާން ވިދާޅުވި އެވެ.

އަދާލަތު ޕާޓީން ދާދި ފަހުން ވަނީ އެ ޕާޓީގެ ނައިބު ރައީސްގެ މަގާމަށް ވެސް އަންހެނަކަށް ކުރިމަތިލެވޭ ގޮތައް އަސާސީ ގަވައިދު އިސްލާހުކޮށްފަ އެވެ. އެ ޕާޓީން އަސާސީ ގަވައިދަށް މި އިސްލާހުތައް ގެނެސްފައި ވަނީ އެ ޕާޓީގެ އެތެރޭގެ އިންތިހާބު މި މަހު 23 ގައި ބާއްވަން ތައްޔާރުވެފައި ވަނިކޮށެވެ.

އެ މައްސަލާގައި އަދާލަތު ޕާޓީގެ ބައެއް މެންބަރުން ވަނީ އިލެކްޝަންސް ކޮމިޝަން (އީސީ)އަށް ޝަކުވާތައް ހުށަހަޅާ ބައެއް އިސްލާހުތައް ބާތިލު ކުރުމަށް ޕާޓީއަށް އަންގަން އެދިފަ އެވެ. އެ މެންބަރުންގެ ކަންބޮޑުވުމަކީ ވަކި ބޭފުޅެއްގެ މުށުތެރެއަށް ބާރުތައް ދާ ގޮތައް ޕާޓީގެ އަސާސީ ގަވައިދު ބަދަލު ކުރަން އުޅުން ކަމަށް އެ ކޮމިޝަނުން އީސީން ބުނެއެވެ.