ހަމާސް އިން ބުނަނީ ހަމަލާތައް ހުއްޓާލަން ތައްޔާރު ކަމަށް

ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓާލުމަށް ގޮވާލައި އެމެރިކާގައި މުޒާހަރާކުރަނީ. -- ފޮޓޯ: އޭއެފްޕީ

17 ނޮވެމްބަރ 2024 - 06:03

ފަލަސްތީނުގެ ޣައްޒާގައި ހަމަލާތައް ހުއްޓާލަން ތައްޔާރަށް އޮތް ކަމަށާއި އިޒްރޭލުގެ ހަމަލާތައް ހުއްޓުމަކަށް ގެނައުމުގައި އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް އިޒްރޭލަށް ޕްރެޝަރުކުރަން ޖެހޭނެ ކަމަށް ހަމާސް ޖަމާއަތުން ހުކުރު ދުވަހު ބުނެފި އެވެ.

ހަމާސް އިން މިހެން ބުނެފައިވަނީ އިޒްރޭލާއި ހަމާސް ސުލްހްކުރުމަށް މެދުވެރިއެއްގެ ދައުރު އަދާކުރާ ގަތަރުން ހަމާސް އާއި އިޒްރޭލުގެ ވެސް ރަނގަޅު ނިޔަތް ނެތް ކަމަށް ބުނެ މެދުވެރިއެއްގެ ރޯލު އަދާކުރުން މެދުކަނޑާލާފައި ވަނިކޮށެވެ.

ހަމާސްގެ ޕޮލިޓިކަލް ބިއުރޯގެ ގިނަ މަސައްކަތްތަކެއް ގަތަރުގައި ހިންގަން ފުރުސަތު ދީފައި އޮންނަ އިރު ގަތަރަކީ ހަމަލާތައް ހުއްޓުމަކަށް ގެނައުމުގައި މެދުވެރިއެއްގެ ދައުރު އެންމެ ފުޅާކޮށް އަދާކުރާ ގައުމެެވެ.

"ހަމާސް އިން ޣައްޒާގައި ހަނގުރާމަ ހުއްޓާލުމުގެ ހުށަހެޅުމެއް ހުށަހަޅައިފި ނަމަ އަދި އިޒްރޭލުން ޝަރުތުތަކަށް އިހުތިރާމްކުރާ ނަމަ ހަމަލާތައް ހުއްޓާލަން ތައްޔާރު،" ދޯހާގައި ހުންނަ ހަމާސްގެ ޕޮލިޓިކަލް ބިއުރޯގެ މެމްބަރު ބާސިމް ނާއިމް އޭއެފްޕީއަށް ވިދާޅުވި އެވެ.

"އިޒްރޭލުގެ އަނިޔާވެރިކަން ހުއްޓުމަކަށް ގެންނަން އެމެރިކާ ސަރުކާރާއި [އިންތިހާބީ ރައީސް ޑޮނަލްޑް] ޓްރަމްޕް ވެސް އިޒްރޭލަށް ޕްރެޝަރު ކުރުމަށް ގޮވާލަން."

މިދިޔަ ހަފްތާގެ ހޮނިހިރު ދުވަހު ގަތަރުން ވަނީ އިޒްރޭލާއި ހަމާސް ސުލްކުރުމަށް މެދުވެރިއްގެ ގޮތުގައި ކުރަމުން އައި މަސައްކަތް މިހާރު މެދުކަނޑާލާފައިވާ ކަމަށެވެ. ގަތަރުން ބުނީ ދެން އަލުން އެ ދައުރު އަދާކުރަން ފަށާނީ އިޒްރޭލާއި ހަމާސް އިން ވެސް މަޝްވަރާއިން ނަތީޖާއެއް ނެރުމުގެ ނިޔަތުގައި ސީރިއަސްކަމާ އެކު ވާހަކަ ދައްކަން ފެށުމުން ކަމަށެވެ.

މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އިޒްރޭލަށް ހަމާސް އިން ދިން ވަރުގަދަ ހަމަލާތަކެއްގައި ހާހަކަށް ވުރެ ގިނަ މީހުން މަރާލުމާ އެކު އިޒްރޭލުން ޣައްޒާއަށް ދޭން ފެށި ހަމަލާތަކުގައި މިހާތަނަށް 43،700 އަށް ވުރެ ގިނަ މީހުން ފަލަސްތީނުން ވަނީ ޝަހީދުވެފަ އެވެ.