ސައިބާ އެކްސްޕޯގެ ބޭންކިން ޕާޓްނަރަކީ އެމްއައިބީ

މި މަހު މޯލްޑިވްސް ޕޮލިސް ސާވިސްއިން ބާއްވާ "ސައިބާ އެކްސްޕޯ" ގެ ބެންކިން ޕާޓްނަރުގެ ގޮތުގައި މޯލްޑިވްސް އިސްލާމިކް ބޭންކުން ސޮއިކޮށްފި އެވެ.

އާންމުން ސައިބަ ސެކިއުރިޓީ އަށް އަހުލުވެރިކުރުވައި ރައްކާތެރި ޑިޖިޓަލް މާހައުލެއް ގާއިމުކުރުމުގެ ގޮތުން ފުލުހުން ބާއްވާ މި އެކްސްޕޯ އޮންނާނީ މާދަމާއިން ފެށިގެން ހުކުރު ދުވަހުގެ ނިޔަލަށެވެ.

ބެންކިންގެ ގިނަ ހިދުމަތްތަކެއް އޮންލައިންކޮށް ދެމުންދާ އެމްއައިބީއިން ވަނީ މިފަދަ ހަރަކާތެއްގެ މުހިންމުކަން ފާހަގަކޮށްފަ އެވެ. އަދި ގިނަ ހިދުމަތްތަކެއް އެ ބެންކުން ޑިޖިޓަލްކޮށް ދެމުންދާއިރު، އެ ހިދުމަތްތަކަކީ ރައްކާތެރި ހިދުމަތްތަކަކަށް ހެދުމަށް ގިނަ މަސައްކަތްތަކެއް ކޮށްފައި ވާނެ ކަމަށް ބުންޏެވެ.

އެމްއައިބީ މޯބައިލް އެޕްލިކޭޝަން އަދި އިންޓަނެޓް ބޭންކިން އަކީ ރައްކާތެރި، ސަލާމަތީ ފިޔަވަޅު ވަރުގަދަ އެޕްލިކޭޝަނެއް ކަމަށް އެ ބެންކުން ބުންޏެވެ. އެ ޕްލެޓްފޯމުތަކުގައި ޓޫ ފެކްޓާ އޯތެންޓިިކޭޝަން އާއި ބަޔޮމެޓްރިކް އަންލޮކިން ފަދަ ރައްކާތެރިކަމުގެ ގިނަ ފީޗާތަކެއް ހިމެނެ އެވެ. ސައިބާ އެކްސްޕޯގައި މިފަދަ އެކި މައުލޫމާތުތަކާއި ބެންކުން ދޭ ހިދުމަތްތައް ދިނުމަށް ހާއްސަ ސްޓޯލެއް ހުންނާނެ އެވެ.

އެ އެކްސްޕޯގައި ސައިބާ ސެކިއުރިޓީއާ މެދު ހޭލުންތެރިކަން އިތުރުކުރުވުމުގެ ގޮތުން ބާއްވާ މި އެކްސްޕޯގައި އެކަމާ ގުޅޭ މައުލޫމާތުތައް ދާއިރާގެ ތަޖުރިބާކާރުން ހިއްސާކުރާނެ އެވެ. އަދި އެކަމާ ގުޅޭ އެކި މައުލޫމާތުތައް ދޭނެ ސްޓޯލްތައް ހުންނާނެ އެވެ.

މި އެކްސްޕޯ އޮންނާނީ ހުޅުމާލެ ސެންޓްރަލް ޕާކުގަ އެވެ.