ހަމަނުޖެހުންތަކާ އެކު ޓްރަމްޕުގެ ޓްވިޓާ އެކައުންޓް ސަސްޕެންޑު

އެމެރިކާގެ ރައީސް ޑޮނަލްޑު ޓްރަމްޕުގެ ސަޕޯޓަރުން ކޮންގްރެސްގެ އިމާރާތުގައި ހަމަނުޖެހުން ހިންގުމާއި އެކަމާ ބެހޭގޮތުން ޓްރަމްޕު ކުރެއްވި ޓްވީޓްތަކަކާ ގުޅިގެން އޭނާގެ ޓްވިޓާ އެކައުންޓް 12 ގަޑި އިރަށް ސަސްޕެންޑްކޮށްފި އެވެ.

ރިޔާސީ އިންތިޚާބުން ބަލިވެވަޑައިގެންނެވިކަން ގަބޫލު ނުކުރައްވައި، ވޯޓު އޮޅުވާލާފައިވާ ކަމަށް ވިދާޅުވަމުން ގެންދަވާ ޓްރަމްޕުގެ ސަޕޯޓަރުން ކެޕިޓަލް ބިލްޑިންގައި ހަމަނުޖެހުން ހިންގަން ފެށުމުން ޓްރަމްޕު ކުރެއްވި ތިން ޓްވީޓެއް މީހުންނަށް ނުފެންނާނެ ގޮތް ވެސް ޓްވިޓާ އިން ވަނީ ހަދައިފަ އެވެ. އަދި ޓްރަމްޕު އެ ތިން ޓްވީޓް ޑިލީޓް ނުކުރައްވާހާ ހިނދަކު ސަސްޕެންޝަން ދެމިއޮންނާނެ ކަމަށް ވެސް ޓްވިޓާ އިން ބުންޏެވެ.

އޭގެ އިތުރުން، ޓްވިޓާގެ ގަވާއިދުތަކާ ޓްރަމްޕު ދެން ޚިލާފު ވެވަޑައިގެންފި ނަމަ ދާއިމަށް އެކައުންޓް ސަސްޕެންޑްކުރާނެ ކަމުގެ އިންޒާރު ވެސް ޓްވިޓާ އިން ދިނެވެ.

ޓްރަމްޕުގެ އެކައުންޓާ މެދު ފިޔަވަޅު އެޅީ، ޓްވިޓާ އިން ބުނިގޮތުގައި، އެ ޕްލެޓްފޯމުގެ ސިވިކް އިންޓެގްރިޓީ ސިޔާސަތާ ތަކުރާރުކޮށް އަދި ވަރަށް ބޮޑަށް ޚިލާފުވެވަޑައިގެންފައި ވާތީ އެވެ.

މިއީ މީގެ ކުރިން ޓްރަމްޕުގެ ޓްވީޓްތަކާ މެދު ސަމާލުވާން އިންޒާރުތައް ހިމަނާފައިވާ ޓްވިޓާ އިން އޭނާގެ އެކައުންޓާ މެދު މިހާތަނަށް އެޅި އެންމެ ހަރުކަށި ފިޔަވަޅެވެ.

ޓްވިޓާ އިން ނަގަން ޓްރަމްޕަށް އެންގި ޓްވީޓްތަކުގެ ތެރޭގައި ހަމަނުޖެހުންތަކާ ގުޅިގެން އޭނާ ދެއްވި ވީޑިއޯ މެސެޖު ހިމެނެ އެވެ. އޭގައި އެ ސަޕޯޓަރުން ގެއަށް ދާން އެދިވަޑައިގެންނެވި ނަމަވެސް އެ މީހުންނަކީ "ޚާއްސަ" ބައެއް ކަމަށާއި އެ މީހުން ދެކެ ލޯބިވާ ކަމަށް ވިދާޅުވި އެވެ.

ހަމަނުޖެހުން ހިންގީ ޓްރަމްޕުގެ ފަރާތުން ހިތްވަރު ލިބިގެން ކަމަށް ބުނެ އެތައް ބަޔަކު ދަނީ އޭނާ ކުށްވެރިކުރަމުންނެވެ.

ވޮޝިންގްޓަންގެ ކެޕިޓަލް އިމާރާތުގެ ހަމަނުޖެހުންތަކުގެ ތެރޭގައި ބަޑި ޖެހި އަޑު އިވުނެވެ. ވަޒަން އެރި އަންހެނަކު ވަރަށް ބޮޑަށް ޒަޚަމްވެފައިވާ އިރު، ބައެއް ރިޕޯޓުތައް ބުނާ ގޮތުގައި، އޭނާ މިހާރު މަރުވެއްޖެ އެވެ. އެ ހާދިސާ ހިނގި ގޮތެއް އަދި ސާފެއް ނުވެ އެވެ.

ޓްރަމްޕުގެ ސަޕޯޓަރުން އިމާރާތުގެ ތެރެއަށް ވަދެގަންނަން ދިޔަ އިރު ކޮންގްރެސްގެ މެމްބަރުންނާއި މުވައްޒަފުން ޖެހުނީ އެކި ތަންތަނަށް ވަދެ ފިލާށެވެ.

އެ މީހުން ކެޕިޓަލް އަށް ވަދެގެން ދިޔައީ ފުލުހުން ވެސް ތިއްބާ، އެއްވެސް ޖެހިލުމެއް ނެތި އެވެ. އެ ދިޔަ ގޮތަށް ގޮސް ކޮންގްރެސްގެ ޖަލްސާ ބާއްވާ މާލަމަށާއި މެމްބަރުންގެ އޮފީސްތަކަށް ވަދެ މޭޒުތައް ދޮށުގައި އިށީނދެލައި ވަރަށް ހަމަޖެހިލައިގެން ތިބި މަންޒަރު ފޮޓޯތަކުން ފެނެ އެވެ. އޭގެ ތެރެއިން ބައެއް މީހުންނަކީ ވައިޓް ސުޕްރިމެސިސްޓުންކަން އެނގެ އެވެ.

ވޮޝިންގްޓަން މި ހާލަތަށް މި ވެއްޓުނީ، ދުވަހަކު ވެސް ބަލި ގަބޫލު ނުކުރައްވާނެ ކަމަށް ވިދާޅުވެ އެތަކެއް ހާސް ސަޕޯޓަރުންނާ ޓްރަމްޕު ވާހަކަދެއްކެވި ފަހުންނެވެ. ޑިމޮކްރެޓިކް ކެންޑިޑޭޓް ޖޯ ބައިޑަން އިންތިޚާބު ކާމިޔާބުކުރެއްވިކަން ރަސްމީކޮށް ކަނޑައެޅުމުގެ ބަހުސް ކޮންގްރެސްގައި ހިނގަމުން ދަނިކޮށް އެތައް ސަތޭކަ ބަޔަކު ކެޕިޓަލްގެ އިމާރާތް ވަށާލީ އެކަން ހުއްޓުވާށެވެ. އެ ބަހުސްގައި ބައެއް ރިޕަބްލިކަން މެމްބަރުން ވެސް ވަނީ ބައިޑަން އިންތިޚާބުވީ ކަމަށް ނިންމުމާ ދެކޮޅު ހައްދަވައިފަ އެވެ. ހަމަނުޖެހުންތަކަށް ފަހު މިހާރު ބަހުސް އަލުން ވަނީ ފަށައިފަ އެވެ. ބަހުސް ފެށުމާ އެކު ނާއިބު ރައީސް މައިކް ޕެންސް ވަނީ ހަމަނުޖެހުންތައް ކުށްވެރިކުރައްވައިފަ އެވެ. އެހެން މެމްބަރަކު ސިފަކުރެއްވި ގޮތުގައި ކެޕިޓަލް ތެރެއަށް ވަދެގަނެ ހަމަނުޖެހުން ހިންގީ ހައްދުފަހަނަޅާފައިވާ ޓެރަރިސްޓުންތަކެކެވެ.

އެމެރިކާގެ ޓީވީ ޗެނަލްތަކުން މިކަން ސިފަކުރަމުންދަނީ އެ ގައުމުގެ ތާރީޚުގައި ވެސް ފެނިފައި ނުވާ ފަދަ ދުވަހެއްގެ ގޮތުގަ އެވެ. ހަމަނުޖެހުންތަކާ ދޭތެރޭ ހިތާމަކޮށް، އެކި ފަރާތްތަކުން ބުނަމުންދަނީ މިއީ ދުނިޔޭގެ ކުރިމަތީގައި އެމެރިކާގެ އަގު ވެއްޓިގެންދާނެ، ލަދުގަންނަން ޖެހޭ ވަރު ކަމެއް ކަމަށެވެ.