ރެއާލަށް މޮޅެއް، ބާސެލޯނާ ފަހު ވަގުތު އެއްވަރު

މެޑްރިޑް (ޖެނުއަރީ 5) - ސްޕެނިޝް ލީގުގައި ރޭ ރެއާލް މެޑްރިޑުން 3-0 އިން ގެޓަފޭ ބަލިކުރިއިރު، ބާސެލޯނާ ކުޅުނު މެޗުގައި ފަހު ވަގުތު އެސްޕަންޔޯލުން ޖެހި ގޯލާ އެކު 2-2 އިން އެއްވަރުވެއްޖެ އެވެ.

ރޭގެ ނަތީޖާތަކާ އެކު ބާސެލޯނާ އެއް ވަނައިގައި އޮތީ ޕޮއިންޓުގެ ގޮތުން ރެއާލާ އެއްވަރުވި ނަމަވެސް ލަަނޑުގެ ތަފާތުން ކުރި ލިބިގެންނެވެ. ބާސެލޯނާ އާއި ރެއާލަށް ވެސް 19 މެޗުން 40 ޕޮއިންޓް ވަނީ ލިބިފަ އެވެ. ބާސެލޯނާގެ ފައިދާ 26 ގޯލު އޮތްއިރު، ރެއާލުގެ އޮތީ 24 ގޯލެވެ.

ގެޓަފޭ ދަނޑުގައި ރޭ ކުޅުނު މެޗުގައި ރެއާލްގެ ފުރަތަމަ ދެ ގޯލު ޖެހީ ފްރާންސްގެ ޑިފެންޑަރު ރަފައެލް ވަރާން އެވެ. މެޗުގެ އިތުރު ވަގުތުގައި ރެއާލްގެ ފަހު ގޯލު ޖެހީ ލޫކަ މޮޑްރިޗް އެވެ. މި މެޗުގައި ލަނޑު ޖަހާނެ ރަނގަޅު ފުރުސަތުތަކެއް ރެއާލުން ވަނީ ތަނަސްކޮށްފަ އެވެ. ރޭގެ މެޗުގައި ސަސްޕެންޝަނުގެ ސަބަބުން ރެއާލްގެ ޑިފެންޑަރު ސާޖިއޯ ރާމޯސް ނުކުޅެ އެވެ.

މެޗަށް ފަހު ރެއާލްގެ ކޯޗު ޒިނެދިން ޒިދާން ބުނީ ރާމޯސް ފަދަ މުހިއްމު ކުޅުންތެރިޔަކު ނުލައި ކުޅެން ޖެހުމުން ލިބުނު މާޔޫސްކަން ދިޔައީ ވަރާންގެ ފަރާތުން ފެނުނު މޮޅު ކުޅުމުގެ ސަބަބުން ކަމަށެވެ. އަދި ވަރާން އަށް ރެއާލްގެ ޑިފެންސް ލައިން ލީޑުކުރުމުގެ ޒިންމާ ނެގޭނެ ކަމުގެ ޔަގީންކަން މިހާރު އެންމެނަށް ވެސް ބޮޑުވެފައިވާ ކަމަށް ޒިދާން ބުންޏެވެ.

ކެޓަލޫނިއާ ސަރަހައްދަށް ނިސްބަތްވާ އެސްޕަންޔޯލް، ސްޕެނިޝް ލީގުގެ އެންމެ ފުލުގައި އޮތް ނަމަވެސް ރޭ އެ ޓީމުން ވަނީ ބާސެލޯނާ ކައިރީގައި ރަނގަޅު ކުޅުމެއް ދައްކައިފަ އެވެ. މެޗުގެ 23 ވަނަ މިނިޓްގައި އެސްޕަންޔޯލުން ލީޑު ނެގީ ޑޭވިޑް ލޮޕޭޒް ބޮލުން ޖެހި ގޯލުންނެވެ. ދެ ވަނަ ހާފްގެ ކުޅުން ފަށައިގެން ނުވަ މިނިޓް ތެރޭ ބާސެލޯނާ އިން ނަތީޖާ އަނބުރާލީ ލުއިސް ސުއަރޭޒް އާއި އާޓޫރޯ ވިޑާލް ޖެހި ގޯލުތަކުންނެވެ.

ބާސެލޯނާ އަށް މެޗުގައި މައްސަލަ ދިމާވީ ދެ ވަނަ ރީނދޫ ކާޑާ އެކު ޒުވާން މިޑްފީލްޑަރު ފްރެންކީ ޑި ޔޯން އަށް ރަތް ކާޑު ދެއްކުމުންނެވެ. ބާސެލޯނާގެ އެއް ކުޅުންތެރިޔަކު މަދުވުމުގެ ފައިދާ ނަގައި، މެޗު ނިމެން ދެ މިނިޓަށް ވެފައި ވަނިކޮށް އެސްޕަންޔޯލަށް އެއްވަރުކޮށްދިނީ ޗައިނާގެ ފޯވާޑް ވޫ ލޭއި އެވެ. މިއީ ޗައިނާ އަށް ނިސްބަތްވާ ކުޅުންތެރިޔަކު ބާސެލޯނާ ކޮޅަށް ޖެހި ފުރަތަމަ ގޯލެވެ.

އެތުލެޓިކޯ މެޑްރިޑުން ވަނީ ރޭ 2-1 އިން ލެވަންޓޭ ބަލިކޮށް ލީގުގެ ތިން ވަނަ އަށް ޖެހިލައިފަ އެވެ. ތިން ވަނައިގައި އޮތް އެތުލެޓިކޯ އާއި ހަަތަރެއްގައި އޮތް ސެވިއްޔާ އަށް 19 މެޗުން ވަނީ 35 ޕޮއިންްޓް ލިބިފަ އެވެ.