ކުޅިވަރު / އިންގްލިޝް ޕްރިމިއާ ލީގް

ލީޑުފުޅާކުރަން ލިބުނު ފުރުސަތު ލިވަޕޫލުން ނަގާލައިފި

31 ޑިސެމްބަރ 2020 - 10:36

1 comments
happy icon 67%

ލަންޑަން (ޑިސެމްބަރު 31) - އިނގިރޭސި ޕްރިމިއާ ލީގުގައި ރޭ ރަށުން ބޭރުގައި ނިއުކާސަލް ޔުނައިޓެޑާ ލަނޑެއް ނުޖެހި އެއްވަރުވެ، ލީގުގެ އެއް ވަނައިގައި ފަސް ޕޮއިންޓަށް ލީޑުފުޅާކުރަން ލިބުނު ފުރުސަތު ލިވަޕޫލުން ނަގާލައިފި އެވެ.

ރޭގެ ނަތީޖާއާ އެކު ލިވަޕޫލް އެއް ވަނައިގައި އޮތީ 16 މެޗުން 33 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ޔުނައިޓެޑަށް 15 މެޗުން 30 ޕޮއިންޓް ލިބިފައިވާއިރު، އެ ޓީމު ހުކުރު ދުވަހުގެރޭ އަމިއްލަ ދަނޑުގައި އެސްޓަން ވިލާއާ ދެކޮޅަށް ކުޅޭ މެޗުން މޮޅުވެގެން ލިވަޕޫލާ ޕޮއިންޓުގެ ގޮތުން އެއްވަރުކުރެވޭނެ އެވެ.

ލިވަޕޫލްގެ ކޯޗު ޔާގެން ކްލޮޕް ބުނީ އެހެން މެޗެއް ނަމަ މިއީ ލިވަޕޫލުން މަދުވެގެން ދެ ގޯލެއް ޖަހާނެ މެޗެއް ކަމަށާއި ތަފާތު ސަަބަބުތަކާ ހުރެ ނަމަވެސް މި މެޗުގައި ލަނޑެއް ޖެހުމުގެ ނަސީބު ނެތީ ކަމަށެވެ.

"މި ވަގުތު އަހަންނަށް ޓޭބަލް މުހިއްމެއް ނޫން. އެކަމަކު އެއް ވަނައިގައި އޮތުމަކީ ކުޅުންތެރިންގެ އިތުބާރަށް ރަނގަޅުކަމަކަށް ވެދާނެ،" ކްލޮޕް ބުންޏެވެ.

ނިއުކާސަލް ދަނޑުގައި ރޭ ކުޅުނު މެޗު ފަށައިގެން އެ ޓީމުގެ ކަލުމް ވިލްސަން ޖެހި ޝޮޓެއް ލިވަޕޫލްގެ ފަބީނިއޯ ވަނީ ބްލޮކްކޮށްފަ އެވެ. ލިވަޕޫލް މޮޅުވިޔަނުދީ ހިފެހެއްޓުމުގައި އެންމެ ބޮޑު ކްރެޑިޓެއް ހައްގުވަނީ ނިއުކާސަލްގެ ކީޕަރު ކާލް ޑާލޯ އަށެވެ. މުޅި މެޗަށް ބަލާއިރު އޭނާ ވަނީ ލިވަޕޫލުން ފޮނުވާލި ގިނަ ހަމަލާތަކެއް ހުއްޓުވައިފަ އެވެ. ފުރަތަމަ ހާފުގައި ރޮބާޓޯ ފިރްމީނޯ ބޮލުން ޖެހި ދެ ބޯޅައެއްގެ އިތުރުން މުހައްމަދު ސަލާހު ފޮނުވާލި ހަމަލާއެއް ވެސް އޭނާ ވަނީ ހުއްޓުވައިފަ އެވެ.

ދެ ވަނަ ހާފުގައި ބަދަލުތަކެއް ގެނެސްގެން ވެސް ލިވަޕޫލުން ލަނޑެއް ޖަހަން ކުރި މަސައްކަތް ކާމިޔާބެއްނުވި އެވެ. މިއީ މި ފަހަރު ލީގުގައި ލިވަޕޫލް ކުޅުނު މެޗެއްގައި އެ ޓީމުން ލަނޑެއް ނުޖެހި ނިންމާލަން ޖެހުނު ފުރަތަމަ ފަހަރެވެ. ދެ ވަނަ ހާފުގައި ވެސް ފިރްމީނޯ އަށް ރަނގަޅު ދެ ފުރުސަތެއް ލިބުނުއިރު، ސަޑިއޯ މާނޭ އާއި ސަލާހު އަށް ވެސް ރަނގަޅު ބޯޅަތަކެއްގެ ބޭނުމެއް ނުހިފުނެވެ.

ލީގުގައި ރޭ ޓޮޓެންހަމް ދަނޑުގައި ފުލަމްއާ ދެކޮޅަށް ކުޅެން ތާވަލުކޮށްފައި އޮތް މެޗު ވަނީ ކޮވިޑުގެ ސަބަބުން ފަސްކޮށްފަ އެވެ. އެ މެޗު ފަސްކުރަން ނިންމީ މެޗު ފަށަން ނިންމާފައި އޮތް ވަގުތުގެ ހަތަރު ގަޑިއިރު ކުރިންނެވެ. މި ހަފްތާގައި އެވަޓަން އާއި މެންޗެސްޓާ ސިޓީ ކުޅެން އޮތް މެޗު ވެސް ވަނީީ ކޮވިޑާ ހެދި ފަސްކޮށްފަ އެވެ.

1 ކޮމެންޓް, 11 ރިއެކްޝަންސް

icon happy icon happy 73%
icon sad icon sad 27%
icon angry icon angry 0%
icon wow icon wow 0%
icon inlove icon inlove 0%
The name is already taken The name is available. Register?

ކޮމެންޓްތައް

އެންމެ ފަސް މަގުބޫލް

ރުޒައިނާ

31 December 2020

މަރުހަބާ ރަދީފް. ރަދީފްގެ 10ވަނަ ކްލަބުން ތިޔަ ހޯދީ ވަރުގަދަ ކާމިޔާބީއެއް

The name is already taken The name is available. Register?

އިތުރު ލިޔުންތައް

މަގްބޫލް ލިޔުންތައް

Daily News Digest

Deliver popular news headlines to your inbox!

Subscribe

Download Mihaaru News App

Offline Alerts

SMS 'sub mihaaru' to 5454