އެ މީހަކު ބޭނުންވާ ކަމަކަށް އެ މީހަކަށް ކަމުދާ އުމުރަކުން ގަޔާވާ ސިފަޔަކުން މީހުން އިހްތިޔާރުކުރަންވީ އެވެ. އެ ހުންނަނީ އެ ހުރިހާ ތަފްސީލަކާ އެކު އިޝްތިހާރުކޮށްފަ އެވެ. ކޮންމެ ޖިންސަކުން ވިޔަސް އެ ހުރީ ލިބޭށެވެ. އެއްބަސްވާންވީ އެ ކިޔާ އަގަކަށެވެ. މިއީ ޖިންސީ ވިޔަފާރީގައި އުޅޭ ދިވެހިން ގަނެވިއްކާ ބާޒާރެކެވެ.
މިއީ މިހާރު ސިއްރުން ކުރާ ކަމެއް ނޫނެވެ. ސޯޝަލް މީޑިއާގެ އެކި ވަސީލަތްތައް ބޭނުންކޮށްގެން އަދި ހާއްސަކޮށް ޓެލެގްރާމްގައި ގްރޫޕްތައް ހަދައިގެން ދިވެހިން ހަށިވިއްކުން އާންމުވެއްޖެ އެވެ؛ ޖެހިލުމެއް ނެތެވެ.
ލިބޭ ދައުވަތަކަށް ނުވަތަ އެ ނޫން ވެސް ގޮތަކަށް މީގެ ގްރޫޕަކަށް ވަނުމުން މި ވިޔަފާރީގައި ލިބެން ހުރި ހިދުމަތްތައް ހުންނަނީ ފެންނާށެވެ. އެކަމަކު މީގެ އެންމެ ފުރަތަމަ މަރުހަލާ އަކީ ވަކި މީހެއްގެ ނަމެއް ފޮޓޯއެއް ނެތި އެހެން ތަފްސީލްތައް ދިނުމެވެ. ވަކި އުމުރެއްގެ ވަކި ޖިންސެއްގެ މީހަކު އެވެނި މިވެނި ކަމެއް ކޮށްދޭ ކަމަށް ބުނެފައި އޮވެދާނެ އެވެ. އެކަން ބޭނުންވާ މީހާ އެކަމަށް އެދި ހުށަހެޅުމާ އެކު ދެން އެ މީހަކު ދާނީ ޕްރައިވެޓް ޗެޓަކަށެވެ. ފޮޓޯ ފޮނުވައި ޑީލް ނިންމާލާނީ މި ހިސާބުންނެވެ.
ކޮންމެ މީހަކަށް ވެސް ވަދެވޭ ގޮތަށް ހުރި މީގެ ގްރޫޕްތަކާއި އިންވިޓޭޝަނަށް ނޫނީ ނުވަދެވޭ ބައެއް ގްރޫޕްތައް އަހަރެމެން ބެލީމެވެ.
ޖިންސީ ވިޔަފާރީގައި އާންމުކޮށް މި ކިޔައި އުޅޭ ހުރިހާ ކަމެއް މީގެ ތެރޭގައި ހުއްޓެވެ. ޖިންސީ އެކި އަމަލުތަކުގެ ވާހަކަ އާއި ގްރޫޕް ހަދައިގެން ކުރާ އެކި ކަންކަމުގެ ވާހަކަ އާއި އެސްކޯޓުންގެ ވާހަކަ އެވެ. ދުވަހަށް، ގަޑިއިރަށް އަގު ކިޔާފައި ހުރެ އެވެ.
މޫނު ނުފެންނަ ގޮތަށް ބައެއް މީހުންގެ ފޮޓޯތަކާ އެކު އަގުތައް ޖަހާފައި ހުއްޓެވެ. ހަށިވިއްކާ ދިވެހިން އުޅޭ އެއް ގްރޫޕެއް ބެލި އިރު އުމުރުން 18 އިން ފެށިގެން އެކި އުމުރުގެ ޒުވާން އަންހެނުން އޭގައި ވިއްކަން ޖަހާފައި ހުއްޓެވެ.
އެ ގްރޫޕްތަކުން ފާހަގަވި ގޮތުގައި މިއިން މީހެއްގެ ބުކިން ފީއަށް ވެސް ފުރަތަމަ އަގު ކިޔަނީ 500ރ. އިން މަތިންނެވެ. ދެން އޭގެ ފަހުން ހިންގާ ކަންކަމަށް ހާހުން އަގުތައް ހުރެ އެވެ.
މި ފާހިޝް ވިޔަފާރީގައި ބިދޭސީންނަށް ވުރެ ދިވެހިން އުޅެނީ މާ ކުރީގަ އެވެ.
"އަހަރެމެން ހީނުކުރާ މީހުން ވެސް މި ކަމުގެ ތެރޭގައި އެބަ އުޅޭ. މަށަށް ލިބުނު ތީގެ ދައުވަތެއްގައި ބުނީ ހުޅުމާލޭގައި ހުންނަ ގެޔަކަށް ދާން. އެކަމަކު ބުނީ އެއްވެސް މައުލޫމާތެއް ނުދެވޭނެ ކަމަށް. އެ މީހުން ބުނާ ވަގުތެއްގައި، ބުނާ ތަނެއްގައި ގޮސް މަޑުކޮށްލައިގެން ހުރީމާ ކާރެއްގައި ބަލައި ދާނެ ކަމަށް،" އަހަރެމެންނާ ވާހަކަ ދެއްކި މީހަކު ކިޔައިދިނެވެ.
އޭނާ ކިޔައިދިން ގޮތުގައި މި ބުނި ގްރޫޕްގައި އުޅެނީ ހަމައެކަނި އަންހެނުންނެވެ. ބުނާ ތަނަކަށް ގޮސް ހަށިވިއްކާ މީހުންނާ ހިލާފަށް މިއީ އެ މީހުން އެކަމަށް ހާއްސަކޮށްފައިވާ ތަނެއްގައި އެކަން ކުރާ ބައެއް ކަމަށްވެ އެވެ.
"މީގެ ތެރޭގައި އުޅޭ ހީނުކުރާ ކަހަލަ މީހުން. މި ގްރޫޕަށް ކޮންމެ ކޮންމެ މީހަކަށް ދައުވަތެއް ވެސް ނުލިބޭނެ. ވަރަށް އިތުބާރު އުފައްދާފައި، ވަކި ފެންވަރެއްގެ މީހުންނަށް ނޫނީ މި މީހުން ކައިރިއަކަށް ނުދެވޭނެ."
"މީގެ ތެރޭގައި އުޅޭ ހީނުކުރާ ކަހަލަ މީހުން. މި ގްރޫޕަށް ކޮންމެ ކޮންމެ މީހަކަށް ދައުވަތެއް ވެސް ނުލިބޭނެ. ވަރަށް އިތުބާރު އުފައްދާފައި، ވަކި ފެންވަރެއްގެ މީހުންނަށް ނޫނީ މި މީހުން ކައިރިއަކަށް ނުދެވޭނެ،" އޭނާ ކިޔައިދިނެވެ.
އަހަރެމެންނަށް ކުރިން ގަބޫލުކުރެވިފައި އޮތީ ދިވެހިންގެ ތެރެއިން ހަށިވިއްކާ މީހުންނަކީ މަސްތުވާތަކެތީގެ ތެރޭގައި އުޅޭ މީހުން އެކަނި ކަމަށެވެ. މަސްތުވާތަކެތީގެ ތެރޭގައި އުޅޭ އަންހެނުންގެ އިތުރުން ފިރިހެނުން ވެސް ހަށި ވިއްކާކަން މީގެ ކުރިން ހާމަކޮށްފައިވާ އެކި ދިރާސާތަކުގައިވެ އެވެ. މީގެ ތެރޭގައި އެއްޖިންސުން ގުޅުން ހިންގުން ވެސް އެހާ އާންމެވެ. އަހަރެމެން މީގެ ކުރިން މަސްތުވާތަކެއްޗާ ބެހޭ ގޮތުން ހެދި "މެދު ސަފުހާ" އަށް ހޯދި ހޯދުންތަކުން މަސްތުވާތަކެތީގެ ބޭނުމުގައި އެއްޖިންސުން ގުޅުން ހިންގާ ފިރިހެނުން އުޅޭ ސޯޝަލް މީޑިއާ ގްރޫޕެއް ވެސް ފެނިފައިވެ އެވެ.
އެކަމަކު މަސްތުވާތަކެތި ބޭނުން ނުކުރާ އަދި ވަޒީފާތަކުގައި އުޅޭ ބައެއް މީހުން ވެސް މިިކަމުގެ ތެރޭގައި އުޅެ އެވެ. އެކި ގޮތްގޮތުން މަޝްހޫރުވެފައިވާ ބައެއް މީހުން ވެސް އުޅެ އެވެ.
ރިސޯޓްތަކާއި ގެސްޓް ހައުސްތަކަށް ގޮސްގެން ހަށިވިއްކުމުގައި އުޅޭ މީހުންނާއި ރާއްޖޭގެ އެކި ރަށްރަށަށް ދަތުރުކޮށްގެން މިކަން ކުރާ މީހުން ވެސް މަދުން ނަމަވެސް އުޅެ އެވެ. ދާދި ފަހުން ވެސް މީގެ ބަޔަކު ފަޅާއަރައި ރަށަކުން ބާލުވާފައިވެ އެވެ.
ރާއްޖޭން ބޭރަށް ދާއިރު "ބައިވެރިއެއް" ގޮތަށް ދިއުމަކީ ވެސް ކުރަމުން އަންނަ ކަމެކެވެ. ބޮޑު އަގެއް ދިނުމުން މިކަން ކޮށްދޭ މީހުންނާއި ހަމަ އެކަނި ދަތުރު ހަރަދު ދިނުމުން އެކުގައި އުޅެލަން އެއްބަސްވާ މީހުން ވެސް އުޅޭ ކަމަށް އަހަރެމެންނާ ވާހަކަ ދެއްކި މީހަކު ބުންޏެވެ.
ދަތުރު ހަރަދާއި ބާޒާރުކޮށްލަން ފައިސާކޮޅެއް ދިނީމާ ވެސް ކަންކަން އެބަ ހަމަޖެހޭ. އެކަމަކު މި ފަހުން މިކަން ބަދަލުވަމުން ދަނީ ހަމަ އެސްކޯޓް ސާވިސްގެ ގޮތުގައި. ފައިސާވެރިން އެބަ ގެންދޭ ވަރަށް މަޝްހޫރު މީސްމީހުން. އެ މީހުން އެކި ކަންކަމަށް ކިޔާނީ އެކި އަގު.
"ދަތުރު ހަރަދާއި ބާޒާރުކޮށްލަން ފައިސާކޮޅެއް ދިނީމާ ވެސް ކަންކަން އެބަ ހަމަޖެހޭ. އެކަމަކު މި ފަހުން މިކަން ބަދަލުވަމުން ދަނީ ހަމަ އެސްކޯޓް ސާވިސްގެ ގޮތުގައި. ފައިސާވެރިން އެބަ ގެންދޭ ވަރަށް މަޝްހޫރު މީސްމީހުން. އެ މީހުން އެކި ކަންކަމަށް ކިޔާނީ އެކި އަގު. މިއީ ކޮންމެ މީހަކަށް އޮންނަ ހިދުމަތެއް ނޫން،" އޭނާ ކިޔައިދިނެވެ.
މި އިންތިޒާމް ހަމަޖެއްސުމުގައި އެޖެންޓުން ވެސް އުޅެ އެވެ. އަދި ކުށްކުރާ ނުރައްކާތެރި ގޭންގުތަކުން ވެސް މިފަދަ ރިންގުތައް ހިންގަ އެވެ.
އެޖެންޓަށް ގުޅާލުމުން ސަފާރީތަކާއި ގެސްޓްހައުސްތަކާއި އެކި ތަންތަނަށް ޖިންސީ ވިޔަފާރީގެ މީހުންތައް ފޮނުވައިދެ އެވެ.
ޖިންސީ ވިޔަފާރީގައި އުޅެނީ ބިދޭސީންނޭ ކިޔައިގެން ތިބި ދުވަސް ނިމުނުތާ އެތައް ދުވަހެއް ވެއްޖެ އެވެ. މިކަން ހިނގާކަން އެންމެންނަށް ވެސް އެނގެ އެވެ. ކުރަނީ ކިހިނެއްކަން ވެސް އެނގެ އެވެ. އެކަމަކު ދިވެހިން މިކަމުގެ ތެރެއަށް މިހާބޮޑަށް ވަދެގެން ދިޔައިރު ވެސް މިދިޔަ ދިހަ ވަރަކަށް އަހަރު ވެސް، ހަށިވިއްކައިގެން ދައުވާ ދިވެހިންގެ އަދަދު ހުރީ އިނގިލިތަކުން ގުނާލެވޭ ވަރަށެވެ. ޕްރޮސިކިއުޓާ ޖެނެރަލްގެ އޮފީހުން ދިން ތަފާސް ހިސާބަށް ބަލާއިރު، މިދިޔަ ފަސް އަހަރު ތެރޭގައި، ހަށިވިއްކި މައްސަލާގައި ދައުވާކޮށްފައި ވަނީ އެންމެ ދެ ދިވެހިންނަށެވެ. އެއީ އުމުރުން 25 އަހަރުގެ އަންހެނަކާއި 57 އަހަރުގެ އަންހެނަކަށެވެ. މީގެ ތެރެއިން 57 އަހަރުގެ މީހާ އަކީ ބަންގްލާދޭޝް ފިރިހެނަކު 80ރ. ދިނުމުން ހަށިވިއްކި މީހެކެވެ. އަދި 25 އަހަރުގެ މީހާ އަކީ ވެސް ބަންގްލާދޭޝް މީހަކަށް ހަށި ވިއްކަނިކޮށް އަތުލައިގަތް މީހެކެވެ. މިއީ ދިވެހިން މި ވިޔަފާރީގައި އުޅޭ "މަތީ" ފެންވަރަށް ބަލާއިރު ވަރަށް އާދައިގެ ދެ މައްސަލަ އެވެ.
އެކަމަކު ހަށިވިއްކުމުގައި ބައިވެރިވުމާއި މީހުން ލައްވާ ހަށި ވިއްކުވި މައްސަލަތަކުގައި ބައެއް ދިވެހިންގެ މައްސަލަތައް ފުލުހުން ފޮނުވުމުން ދައުވާކޮށްފައިވެ އެވެ.
ދިވެހިން "ތަންކޮޅެއް ސިއްރުން" އުޅުނަސް ބިދޭސީން އެހެންނެއް ނޫނެވެ. ޓިކްޓޮކާއި ފޭސްބުކާއި އެކި ޕްލެޓްފޯމްތަކުގައި އެ މީހުންގެ ފޮޓޯ އާއި ފޯނު ނަންބަރާ އެކު އިޝްތިހާރުކޮށްގެން ފާޅުގައި ހަށި ވިއްކަނީ އެވެ. މި މީހުންގެ ނެޓްވޯކް ފުޅާކަން އެނގުނީ ފޭސްބުކުން ފެނުނު މިކަހަލަ އެތައް ޕޭޖަކަށް މެސެޖު ކުރުމުން، ހަމަ އެއް ބަޔަކު މިކަމުގައި އުޅޭކަން އެނގުމުންނެވެ. އެ މީހުން ދޭ "ހިދުމަތް" އަދި އެ ކަމުގައި އުޅޭ މީހުންގެ ފޮޓޯތައް ހަމަ ބުނެލާއިރަށް ފޮނުވަ އެވެ. ދާންވީ ކޮން ތާކަށްތޯ އެހުމުން ބުނަނީ ހަމަ އެއް ތަނެއްގެ ވާހަކަ އެވެ. ލިބުނީ ހަމަ އެއް ބައެއްގެ ފޮޓޯތަކެވެ. ހަމަ އެއް އަގުތަކެކެވެ.
މިކަން ހިނގާ ގޮތް ބަލަން އަހަރެމެންނާ އެކު ބައިވެރިވި އެކަކު އަދިވެސް އުޅެނީ ގްރޫޕަކުން މެސެޖުކޮށް އަންނަން އެދި އާދޭސްކުރާ ވަރުން ސަލާމަތް ނުވެވިގެންނެވެ.