އީ-ޓުކުރިން ކުޑަކުދިންނަށް ހާއްސަ ކުރެހުމުގެ މުބާރާތެއް

އީ-ޓުކުރިން، ކުޑަކުދިންނަށް ހާއްސަކޮށް ކުރެހުމުގެ މުބާރާތެއް ބާއްވަން ހަމަޖައްސައިފި އެވެ.

އެ މުބާރާތަކީ ކުދިންގެ ހުނަރު ތަރައްގީކޮށް، އެ ކުދިންނަށް ހިތްފަސޭހަ މާހައުލެއްގައި ކުރެހުމުގެ ފުރުސަތު ހޯދައިދިނުމުގެ ގޮތުން ބާއްވާ މުބާރާތެއް ކަމަށް އީ-ޓުކުރިން ބުންޏެވެ. މުބާރާތް އޮންނަ ދުވަހު، މުބާރާތް އޮންނަ ތަނަށް ގޮސް ކުރަހަން ބޭނުންވާ ހުރިހާ ކުދިންނަށް ފުރުސަތު ދޭ ގޮތަށް ވަނީ ހަމަޖައްސައިފަ އެވެ.

މުބާރާތް ބޭއްވުމަށް ހަމަޖެހިފައި ވަނީ ހުޅުމާލެ ރުއްގަނޑު-1 ސަރަހައްދުގަ އެވެ. މުބާރާތް އޮންނާނީ މި މަހުގެ 24 ވަނަ ދުވަހުގެ ހަވީރު 4-6 އަށެވެ.

މުބާރާތުގައި ކުރެހުމާއި ޕެއިންޓިން ހިމެނޭނެ އެވެ. އެންމެ މޮޅު ތިން ކުރެހުމެއް ހޮވައި އެ ތިން ކުރެހުމަށް ވެސް 500ރ. ގިފްޓް ވައުޗަރެއް ދޭނެ އެވެ.

އީ-ޓުކުރި އަކީ ކުދި އަދި މެދުފަންތީގެ ވިޔަފާރިތަކާއި އޮންލައިން ވިޔަފާރިތައް ކުރެވޭ ގޮތަށް ހަދާފައިވާ ޕްލެޓްފޯމެވެ.