އައިކެއާއިން ނ. އަތޮޅުގައި ލޯ ސްކްރީން ކޮށްދޭ ކޭމްޕެއް ހިންގަނީ

އައިކެއާ އިން ނ. އަތޮޅުގެ ރަށްތަކުގައި ލޯ ސްކްރީން ކުރުމުގެ ކޭމްޕެއް ފަށައިފި އެވެ.

މިއީ ރާއްޖޭގެ ހުރިހާ އަތޮޅުތަކަކަށް އެ ހޮސްޕިޓަލުން ދޭ ހިދުމަތްތައް ފޯރުކޮށްދީ، ލޮލުގެ ދުޅަހެޔޮކަން ދެނެގަނެ ލޮލުގެ ސްކްރީނިން ހިދުމަތްތައް ފޯރުކޮށްދިނުމުގެ ގޮތުން އެ ހޮސްޕިޓަލުން މިދިޔަ އަހަރު ފެށި ހާއްސަ ޕްރޮގުރާމުގެ ދަށުން ހިންގާ ކޭމްޕެކެވެ.

މި ކޭމްޕުގެ ދަށުން މިދިޔަ މަހުގެ 28 އިން ފެށިގެން ށ. އަތޮޅުގެ ފޭދޫ، ފޯކައިދޫ، ކަނޑިތީމު، ކޮމަންޑޫ، ޅައިމަގު، މާއުނގޫދޫ، ކެދިކުޅުދޫ އަދި މިލަންދޫގައި ވަނީ މި ކޭމްޕު ބާއްވައިފަ އެވެ. އަދި މި މަހުގެ 19 އިން ފެށިގެން ނ. އަތޮޅުގެ ވެލިދޫ އަދި ހޮޅުދޫގައި މި ކޭމްޕު ކުރިއަށް ގެންދިޔަ އެވެ. އެ ހޮސްޕިޓަލުން މިހާރު ތައްޔާރުވަމުން އަންނަނީ ނ. ލަންދޫ އާއި މާފަރުގައި މި ކޭމްޕު ބާއްވާށެވެ.

ނ. ލަންދޫގައި މި ކޭމްޕު ބާއްވަން ހަމަޖެހިފައި ވަނީ މި މަހުގެ 28 އިން 30 އަށެވެ. އަދި މާފަރުގައި މި ކޭމްޕު ބާއްވާނީ އަންނަ މަހުގެ އެއް ވަނަ ދުވަހުން ތިން ވަނަ ދުވަހަށެވެ.

މި ކޭމްޕުގައި ލޮލުގެ ދުޅަހެޔޮކަމާއި ފެނުން ސްކްރީން ކުރަން އަތޮޅުތަކުގައި ފެށި މި ކޭމްޕުގައި ކެޓެރެކްޓަށް ޗެކު ކުރުމާއި ގްލަކޯމާ އަށް ޓެސްޓުކުރުމާއި ރެޓީނާގެ މައްސަލަތައް ދެނެގަތުމުގެ ޓެސްޓުތައް ކުރާނެ އެވެ. އައިކެއާއިން އައިނު ހައްދަން ބޭނުންވާ މީހުންނަށް އައިނަށް އޯޑަރު ދިނުމުގެ ފުރުސަތު ވެސް ކޭމްޕުގައި ލިބޭނެ އެވެ.

މި ކޭމްޕުގެ ދަށުން ހިދުމަތް ހޯދުމަށް ކޭމްޕު އޮންނަ ރަށްރަށުގެ ހެލްތު ސެންޓަރުތަކުން އެޕޮއިންޓްމަންޓު ހެއްދޭނެ އެވެ.

އައިކެއާ ހޮސްޕިޓަލުން ބުނީ މިއީ އެ ހޮސްޕިޓަލުން ހިދުމަތް ބޭނުންވެ، މާލެ އަށް ނާދެވި ހިދުމަތް ނުލިބި ތިބި މީހުންނަށް އެ ހިދުމަތް ފޯރުކޮށްދިނުމުގެ ގޮތުން ހިންގާ ކޭމްޕެއް ކަމަށެވެ. މިއީ ރާއްޖޭގެ އެކި ހިސާބުތަކުގައި ލޮލުގެ ދުޅަހެޔޮކަން ޕްރޮމޯޓުކުރުމުގެ ގޮތުން ހިންގާ ކޭމްޕުތަކެއް ކަމަށް ވެސް ބުންޏެވެ.

އައިކެއާއިން ބުނީ އެ ހޮސްޕިޓަލުން ފަށާފައިވާ މި ކޭމްޕުގެ ދަށުން ގިނަ އަތޮޅުތަކެއް ކަވާކޮށްފައިވާ ކަމަށެވެ. އަދި އަންނަ އަހަރު ވެސް މި ކޭމްޕުގެ ދަށުން ރާއްޖޭގެ އެކި ހިސާބުތަކަށް ދަތުރުކުރާނެ ކަމަށް ބުންޏެވެ.

ރާއްޖޭގެ އެކި ރަށްރަށުގައި ކުރިއަށް ގެންދާ މި ކޭމްޕުތަކަކީ ރަށްރަށުގެ ހެލްތު ސެންޓަރުތަކާއި ރީޖަނަލް ހޮސްޕިޓަލްތަކާ ގުޅިގެން ކުރިއަށް ގެންދާ ހަރަކާތެކެވެ.