ޝަމްވީލްގެ އާ މެޝަޕްގައި ލޯބި އުތުރިއަރަނީ!

ރާއްޖޭގެ މަޝްހޫރު ލަވަކިޔުންތެރިޔާ، މުހައްމަދު ޝަމްވީލް (ބަރޯ) އަކީ "ލަވް މެޝަޕް"ގެ ނަމުގައި ކުރީގެ އެކި ލަވަތައް އެއްކޮށްލައިގެން އެއް ޓްރެކެއްގައި، އެ ލަވަތައް ކިޔައިގެން ބޮޑު މަގްބޫލުކަމެއް ހޯދާފައިވާ އާޓިސްޓެކެވެ.

އޭނާ އެންމެފަހުން ގެނެސްދިން މެޝަޕްއަށް އަހަރެއްވީ ފަހުން އަނެއްކާވެސް "ލަވް މެޝަޕް 5"ގެ ނަންދީފައިވާ މެޝަޕެއް ފޭނުންނާ ހަމައަށް މިހާރު ވަނީ ގެނެސްދީފަ އެވެ. ކޮންމެ އަހަރެއްގެ ވެސް ފެބްރުއަރީ މަހުގެ 14 ވަނަ ދުވަހު ނެރޭ އެ މެޝަޕް، ގެނެސްދޭ މިއީ ފަސްވަނަ އަހަރެވެ.

މިފަހަރުގެ މެޝަޕްގައި ވެސް ކުރީގެ މަޝްހޫރު ހަ ލަވައެއް ހިމެނާފައިވެ އެވެ. އަދި މިއީ ޝާމްވީލްގެ އިތުރުން އެހެން އާޓިސްޓެއް އޭނާގެ މެޝަޕެއްގައި ފީޗާކުރި ފުރަތަމަ ފަހަރެވެ. އެގޮތުން، އޭނައާއެކު މި މެޝަޕްގައި ލަވަކިޔާފައި ވަނީ، ދާއިރާއަށް އަލަށް ތައާރަފުވާ އައިޝަތު އިބްނާ ނާސިރެވެ.

"މިހާރު" އާ ވާހަކަ ދައްކަމުން ޝަމްވީލް ބުނީ، މިދިޔަ އަންގާރަ ދުވަހު ސައުންޑްކްލައުޑްއަށް ރިލީޒްކުރި "ލަވް މެޝަޕް 5"ގެ ލަވަތައް އެރޭންޖުކޮށްފައި ވަނީ އޭނާ އަމިއްލަ އަށް ކަމަށެވެ. އަދި އެ ލަވައިގެ އާޓްވޯކް ތައްޔާރުކޮށްފައި ވަނީ ޑިޒައިނަރު، އަބްދުﷲ ރިޒާ (ޒާރިއޯ) ކަމަށް ބުންޏެވެ.

އާންމުކޮށް ޝަމްވީލުގެ މެޝަޕްތައް ސައުންޑްކްލައުޑްގެ އިތުރުން، ވީޑިއޯއާއެކު ޔޫޓިއުބަށް ވެސް އަޕްލޯޑުކުރެ އެވެ. ފަހުގެ މެޝަޕް އަދި ހަމައެކަނި ސައުންޑްކްލައުޑުގައި ރިލީޒްކުރި ނަމަވެސް، މި މަސް ނިމުމުގެ ކުރިން އޭގެ ވީޑިއޯ ޔޫޓިއުބަށް ރިލީޒްކުރެވޭތޯ މަސައްކަތް ކުރަމުން އަންނަ ކަމަށް ޝަމްވީލް ބުންޏެވެ.

ޝަމްވީލްގެ ފަސްވަަނަ މެޝަޕް ރިލީޒްކުރިތާ ފުރަތަމަ ދުވަސްތެރޭ 3،000 އަށް ވުރެ ގިނަ ފަހަރު އެ ލަވަ އަޑުއަހައިފަ އެވެ. އަދި ސޯޝަލް މީޑިއާގައި ގިނަ ބަޔަކު އަންނަނީ އޭނައަށް ތައުރީފްކޮށް، ލަވަ ޝެއާ ކުރަމުންނެވެ.