ޑެންމާކަށް ހުއްޓުމެއް ނެތް، 29 އަހަރަށް ފަހު ސެމީ ފައިނަލަށް

ބަކޫ (ޖުލައި 3) - ޗެކް ރޕަބްލިކްގެ މައްޗަށް 2-1 ގެ ނަތީޖާ އަކުން ކާމިޔާބު ހޯދައި، ޔޫރޯގެ ސެމީ ފައިނަލަށް، 29 އަހަރު ފަހުން ޑެންމާކު ދަތުރު ކޮށްފި އެވެ.

ޔޫރޯގެ ސެމީ ފައިނަލަށް މީގެ ކުރިން ޑެންމާކު ދަތުރުކުރީ 1992 ގަ އެވެ. އެ އަހަރުގެ މުބާރާތުގެ ޗެމްޕިއަންކަން، އެންމެން ސިއްސުވާލުމަށް ފަހު، ޑެންމާކު ހޯދި އެވެ. ސެމީ ފައިނަލުގައި ޑެންމާކު ނުކުންނާނީ، އިންގްލެންޑް ނުވަތަ ޔޫކްރޭންއާ ދެކޮޅަށެވެ.

މެޗު ފެށިގެން ފަސް ވަނަ މިނެޓުގައި ޑެންމާކުން ލީޑު ނެގި އެވެ. އެ ޓީމުގެ ލަނޑު ތޯމަސް ޑެލޭނީ ކާމިޔާބު ކުރީ ބޮލުން ގޯލުގެ ތެރެއަށް ބޯޅަ ފޮނުވާލައިގެންނެވެ. ޑެންމާކުގެ ކޯނަރު ޖެންސް ލާސަން އޭރިއާ ތެރެއަށް ނަގައިދިނުމުން، ހުސްކޮށް ހުރި ޑެލޭނީ ވަނީ ބޮލުން ޖަހައި ގޯލުގެ ކަނަށް ބޯޅަ ވައްދާލައިފަ އެވެ. ކޯނަރު ނެގި އިރު ޗެކުގެ ކުޅުންތެރިން އޭނާ މާކެއް ނުކުރެ އެވެ.

ފުރަތަމަ ހާފު ނިމުމުގެ ކުރިން ޑެންމާކުން ވަނީ ލިޑް ފުޅާކޮށްފަ އެވެ. ޖޯކިމް ޕީޑާސަން ހިފައިގެން ދިޔަ ބޯޅަ އޭނާއަށް ކޮންޓްރޯލް ގެއްލުމުގެ ކުރިން އޭނާ އެ ބޯޅަ އޭރިއާ ތެރެއަށްވާ ގޮތަށް ފޮނުވާލި އެވެ. މާޓިން ބްރައިތުވެއިޓް ބޮލުން ޖަހަން ފުންމައިގެން އެރި ނަމަވެސް އޭނާ ބޮލުގައި އެ ބޯޅަ ލައްވައެއް ނުލި އެވެ. އެ ބޯޅަ ލިބުނީ ކެސްޕާ ޑޮލްބާ އަށެވެ. އޭނާ ވަނީ ގޯލުގެ ތެރެއަށް ބޯޅަ ވައްދާލައިފަ އެވެ.

ދެ ވަނަ ހާފު ބަދަލުތަކާ އެކު ނުކުމެ ފުރަތަމަ ބޯޅައިން ވެސް ޗެކް ރިޕަބްލިކުން ޑެންމާކުގެ ގޯލަށް އަމާޒުކޮށް ނުރައްކާތެރި ބޯޅައެއް ފޮނުވާލި އެވެ. ޑެންމާކުގެ ކީޕަރު ކެސްޕާ ޝްމައިކަލް ވަނީ އެ ބޯޅަ ދިފާއު ކޮށްފަ އެވެ. ޗެކްރިޕަބްލިކުގެ ލަނޑު ޕެޓްރިކް ޝިކް ކާމިޔާބު ކުރީ ދެ ވަނަ ހާފު ފެށިގެން ހަތަރު ވަނަ މިނެޓުގަ އެވެ.