ސީ ސްޕޯޓްސް ރަންނަމާރި ޗެލެންޖް: ބައްޕައާ އެކު ދަރިފުޅު ވެސް ތިންވަނަ ބުރަށް

މިހާރު ކުރިއަށްދާ ސީ ސްޕޯޓްސް ރަންނަމާރި ޗެލެންޖް ނުވަތަ ރާޅާއެޅުމުގެ ގައުމީ މުބާރާތުގެ ތިން ވަނަ ބުރަށް އަބްދުﷲ އަރީފް އާއި އޭނާގެ ދަރިދުޅު ކަޔާން އަބްދުﷲ އަރީފް ދަތުރުކޮށްފި އެވެ.

ކަޔާން ތިންވަނަ ބުރަށް ދަތުރުކުރީ މިއަދު ބޭއްވި ރައުންޑް 2 ގެ ހީޓް 6 ގައި މުހައްމަދު ޝުހާން ބީޓްކޮށްގެންނެވެ. އަރީފް ތިންވަނަ ބުރަށް ދަތުރުކުރީ އިއްޔެ ބޭއްވި ރައުންޑް 1 ގެ ހީޓް 7 ގައި ވާދަކޮށް އެއްވަނަ ހޯދައިގެންނެވެ.

މިއަދު މެންދުރު ފަހު ބާއްވާ ރައުންޑް 3 ގައި އަރީފް ވާދަކުރާނީ ހީޓް ނުވައެއްގަ އެވެ. އެ ހީޓްގައި ޒުވާން ސާފާ ޔޫސުފް އާއި ކަޔާން ހަމްދާން ޒަކީ ވާދަ ކުރާނެ އެވެ. ދެން ވާދަކުރާނީ އާދަމް ޝަރޫން އަހްމަދު އެވެ.

ކަޔާން ވާދަކުރާނީ ހީޓް 8 ގަ އެވެ. އެ ހީޓްގައި ދެން ވާދަކުރާނީ އަހްމަދު އަރުޒާން އާއި ޔަމާން މުހައްމަދު އިބްރާހިމް އެވެ. ރައުންޑް 3 އަކަށް ފަހު ފައިނަލް އޮންނާނީ މާދަމާ އެވެ. މިއަދު ހަވީރު ވިމެންސް އޯޕަން ޝޯޓްބޯޑްގެ ފައިނަލު އޮންނާނެ އެވެ.