ކަންޑޭލާ (ވ) ކުޅެނީ.
14 ޖުލައި 2017 - 13:02
8 comments
ނިއު ރޭޑިއަންޓުގެ ނެދަލެންޑްސް މިޑްފީލްޑަރު ޖަމާލް ލީފްލެންގް އާއިލާ ސަބަބަކާ ގުޅިގެން އެނބުރި ގައުމަށް ދާން ޖެހުމުން ނިއު އިން ބަދަލުގައި ސްޕެއިނުގެ މިޑްފީލްޑަރެއް ގެނެސްފި އެވެ.
ނިއު އިން ސޮއިކުރުވާފައިވަނީ އުމުރުން 30 އަހަރުގެ އެންހެލް ލުއިސް ރުއިޒް ޕަޒް (ކަންޑޭލާ) އެވެ. މިޑް ޓްރާންސްފާ ބާޒާރު މިހާރު ހުޅުވިފައިވާތީ އެސްޓީއޯ މާލޭ ލީގުގެ ފަހު މެޗުގައި ބުދަ ދުވަހުގެރޭ މާޒިޔާއާ ދެކޮޅަށް ނިއު ކުޅޭ މެޗުގައި ކަންޑޭލާ އަށް ކުޅެވޭނެ އެވެ.
އުމުރުން 30 އަހަރުގެ ކަންޑޭލާ އަކީ ސެންޓްރަލް މިޑްފީލްޑަރުގެ މަގާމުގެ އިތުރުން ޑިވެންސިވް މިޑްފީލްޑަރަކަށް ވެސް ކުޅެވޭ ކުޅުންތެރިއެކެވެ. އޭނާ ވަނީ ސްޕެއިނުގެ ދެ ވަނަ ޑިވިޝަނުގެ އަލްބަކެޓޭ އާއި އާއި ސެލްޓާ ވީގޯ އަށް ކުޅެފަ އެވެ. މިދިޔަ ތިން އަހަރަށް ބަލާއިރު އޭނާ ވަނީ އޮސްޓްރިއާގެ ތިން ވަނަ ޑިވިޝަނުގެ ފަސްޓް ވިއެނާ އާއި ސްޕެއިނުގެ ތިން ވަނަ ޑިވިޝަނުގެ ބަރަކަލްޑޯ އާއި ލަ ރޮޑާ އަށް ކުޅެފަ އެވެ. އޭނާ ވަނީ ސްޕެނިޝް ކަޕުގެ މެޗުތައް ވެސް ކުޅެފަ އެވެ.
ކަންޑޭލާގެ އިތުރުން މި ވަގުތު ނިއުގައި ތިބި ބިދޭސީ ކުޅުންތެރިންނަކީ ސާބިއާގެ ސެންޓްރަލް ޑިފެންޑަރު ސްޓެވަން މާކޮވިޗާއި އަލަށް ގެނެސްފައިވާ ލުބްނާން ޑިފެންޑަރު ހުސެއިން އެލް ޑޯރް އަދި ސްޕެއިން ފޯވާޑް އެޑްރިއެން ގަލާޑޯ އެވެ.
ކަންޑޭލާ އާއި ހުސެއިންގެ އިތުރުން ޓްރާންސްފާގައި ނިއުގެ ލިސްޓަށް އިތުރުކުރާނީ އަލީ އަޝްފާގް (ދަގަނޑޭ) އާއި އިބްރާހިމް ފަޒީލް (އޮއްޕޮ) އެވެ. ލީގު ކަށަވަރުކުރަން މޮޅުވާން މަޖުބޫރު މެޗެއްގައި ބުދަ ދުވަހުގެރޭ މާޒިޔާއާ ދެކޮޅަށް ނިއު ނުކުންނަ މެޗުގައި މި ހަތަރު ކުޅުންތެރިންނަށް ވެސް ކުޅެވޭނެ އެވެ.
މި ސީޒަނުގައި ނިއުގައި މޮޅު ކުޅުމެއް ދެއްކި ނެދަލެންޑްސްގެ ޖަމާލް އެނބުރި ގައުމަށް ދާން ޖެހުނީ އޭނާގެ މާމަ ބަލިވުމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އީސަ
14 July 2017
ގަލާޑޯ ފޮނުވާލަންވީ އަބަދު ސަކުވާ ނުނީ އިދުކޮޅު ކޮންމެވެސް މީހަކާ ހިފާގަނެގެން. މަސައްކަތު ރޭޓް ދަށް ކިތައްމެ ގޯލާރަށްޓެންސަސް. ހެޔޮނުވާނެ ތި ކަލޭގެ ބެންޗުގަ ބައިންދާލަ ބަލަ އެއްމެޗުގަ ނަމަވެސް އެއްޗެއް ވިސްނޭތޯ. ރަށުކޯޗު ހުރީމަ ފޮނިބޮނޑް ވަނީ ކަންނޭ..
ނައީމް
14 July 2017
އުންމީދަކީ މާލޭލީގްއާއި ދިވެހި ޕުރެނިއަރ ލީގްވެސް ކާމިޔާބުކުރުން ﷲ ގެ ރަހުމަތާއެކު ދެމުބާރާތްވެސް ލިބޭނެ އިންސާﷲ
އީދު ޖަމީލާ
14 July 2017
އެފްއޭއެމް ފެއިލް. ވީ އެއްވެސް ވައުދެއް ނުފުއްދޭ. ބޮނޑްތަނުން ފެއިލް. އިސްތިއުފާ.
ޒަހީން ބްރޯ
14 July 2017
ގައިމު ސީޒަން ފެށުނު އިރު ބުނި މި އަހަރު ގެންނަނީ ތަފާތު މޮޅު ކުޅުންތެރިންނޭ، ކުރީގަ ހެދިހެން ފޮނުވައެއް ނުލާނޭ. އެކަމަކު ސީޒަން ދެބައި ނުވަނީސް ކޯޗާ، ޓްރެއިނަރާ، 3 ކުޅުންތެރިން ފޮނުވާލަން ޖެހިއްޖެ. އަލަށް ތި ގެންނަ ސޮރު ކިހާވަރަކުން ދާނެބާ؟
ހޯރަ
14 July 2017
ފްރެމިއާ ލީގް ފަށާއިރު އޮންނާނި މުޅިން އެހެން ނިއުއެއްދޯ. ވަރަށް ބޮނޑް ބަދަލެއް ފެންނާނެ ކަމަށް އުއްމީދު ކުރަށް. ނިއުގެ ސަފޯޓަރެއްގެ ހައިސިންޔަތުން ވަރަށް އުފާވޭ މެނޭޖްމަންޓުން ތި ގެންނަ ބަންދަލުތަކަށް . ސުކުރިއްޔާ. ޗެއާމަން.
ހަންޗޭ
14 July 2017
ޖަމާލަކީ ހަގީގަތުގަވެސް ވަރަށް ޑިސިފްލިން ކުޅުންތެރިއެއް ޖަމާލު ބުނި އޭނަ ފެމެލީ މަންސަލައެއް ދިމާވެގެން ދާން ޖެހޭތީ މި އުޅެނި ވަރަށް ދެރަވެއޭ. އަހަރަމެން ޖަމާލްއާ ދޭތެރޭ ސިންފަތީވޭ. ޖަމާލްގެ ތި އޯގާތެރިކަން ދުވަހަކުވެސް ފިލާ ނުދާނެ. ވަރަށް ގާތް އެކުވެރިއެއް ސަފޯޓަރުންގެ.
މަހަށް ދޭބަލަ
14 July 2017
މިކަހަލަ ހަބަރު ތައް އަަޑްއިވޭތީއެ މޮހޮދޭ އަށް ހަޖަމް ނުވެގެން އެ އުޅެނި..
އަހުމަދު5678
14 July 2017
ދުނިޔޭގެ އެހެން ނޫސްތަކުގަ ޖަހާހެން ކުޅުންތެރިޔާގެ ފޮޓޯއެއް ޖަހާލާ، ޓީމްތަކަށް އަލަށް އިތުރުކުރި ކުޅުންތެރިންގެ ޖާރޒީ ނަމްބަރު ހިމަނާލާ، ކޮންމެވެސް އާރޓިކަލްއެއްގަ ތަފާސް ހިސާބު ޓޭބަލެއްގެ ސިފައިގަ ހިމަނާލާ، މެޗްތަކުގެ އެއް ފޮޓޯ ހުުރިހާ އާރޓިކަލްގަ ޖެހުމުގެ ބަދަލުގަ ތަފާތު ގިނަ ފޮޓޯ ހިމަނާލާ މީހުން މި ކިޔާ ހިތްވާގޮތަށް ލިޔެލަބަލަ ނިކަން.....