އޭޝިއާގެ މުބާރާތުން ރާއްޖެ އަށް ލޯ މެޑަލެއް

އިންޑޮނީޝިއާގެ ބަތަމްގައި މިހާރު ކުރިއަށްދާ 53 ވަނަ އޭޝިއަން ބޮޑީބިލްޑިން އެންޑް ފިޒީކް މުބާރާތުގެ ސީނިއާ މެންސް ބޮޑީބިލްޑިން ކެޓަގަރީގެ 55 ކިލޯ ބައިން ރާއްޖޭގެ މުހައްމަދު މޫސާ ލޯ މެޑަލް ހޯދައިފި އެވެ.

މުހައްމަދު މޫސާ ވަނީ މިދިޔަ ޖުލައި މަހު ނޭޕާލުގައި ބޭއްވި ދެކުނު އޭޝިއާގެ ބޮޑީބިލްޑިން މުބާރާތުން ރާއްޖެ އަށް ރަން މެޑަލް ހޯދައިދީފަ އެވެ. އެހެން ކަމުން މިއީ މިދިޔަ ތިން މަހެއްހާ ދުވަސް ތެރޭ މުހައްމަދު މޫސާ ރާއްޖެ އަށް ގެނެސްދިން ދެ ވަނަ މެޑަލް އެވެ. މި މުބާރާތަށް ތައްޔާރުވިއިރު ވެސް މުހައްމަދު މޫސާގެ އެންމެ ބޮޑު އަޒުމަކަށްވީ ރާއްޖެ އަށް މެޑަލެއް ހޯދައިދިނުމެވެ. އެކަން އޭނާ މިވަނީ ހާސިލްކޮށްފަ އެވެ.

އޭޝިއާގެ މުބާރާތެއްގައި ރާއްޖެ އަށް ކުޅިވަރުން މިހާތަނަށް ލިބިގެންދިޔަ ޝަރަފްވެރި ކާމިޔާބީގެ ލިސްޓުގައި ބޮޑީބިލްޑިން އޮތީ ކުރީގަ އެވެ. އޭޝިއާގެ މުބާރާތުން ރާއްޖެ އަށް ބޮޑީބިލްޑިން އިން ވަނީ މިހާތަނަށް ތިން މެޑަލް ހޯދައިފަ އެވެ. އެއީ 2017 ވަނަ އަހަރު އޮތް އޭޝިއަން ބޮޑީބިލްޑިން ޗެމްޕިއަންޝިޕްގެ 55 ކިލޯގެ ކެޓަގަރީން ރަން މެޑަލް ހޯދި ބޮޑީބިލްޑަރު ޝާހީން އިބްރާހިމް ދީދީ އާއި މިދިޔަ އަހަރު 165 ސެންޓިމީޓަރު އެތުލެޓިކް ފިޒީކް ބައިން ލޯ މެޑަލް ހޯދި މަހުމޫދު ޒިޔާދެވެ. ދެން މިއަދު ލޯ މެޑަލް ހާސިލް ކުރި މުހައްމަދު މޫސާ އެވެ.

ރާއްޖޭން މި ފަހަރުގެ މުބާރާތަށް ތައްޔާރުވީ އިންޑިއާގެ ކޯޗު އަނުރާގް އަނިލްކުމާރްގެ އެހީތެރިކަމުގަ އެވެ. ފަސް ކެޓަގަރީ އަކުން ރާއްޖެ ވާދަކުރާއިރު، މިއަދު އޮންނާނީ މުހައްމަދު މޫސާގެ ކެޓަގަރީ އެވެ. އަނެއް ހަތަރު ބައި އޮންނާނީ މާދަމާ އެވެ. ދެން ވާދަކުރާ ރާއްޖޭގެ ބޮޑީބިލްޑަރުންނަކީ އަޒްނީން ރަޝާދާއި މަހުމޫދު ޒިޔާދާއި ފަތުހުﷲ މުހައްމަދު އަދި އަލީ ސަލީމް އިބްރާހިމް އެވެ.

މި ފަހަރުގެ އޭޝިއަން ޗެމްޕިއަންޝިޕަށް ރާއްޖޭން ތައްޔާރުވަމުން އައިއިރު ރާއްޖޭގެ ބޮޑީބިލްޑިިން ފެޑެރޭޝަން (ބީބީއޭއެމް)ގެ ރައީސް އަދި އޭޝިއާ ފެޑެރޭޝަނުގެ އެގްޒެކްޓިވް ވައިސް ޕްރެޒިޑެންޓް އިބްރާހިމް ހަމީދު (އިއްބެ) ވަނީ މި ފަހަރުގެ މުބާރާތުގައި ރާއްޖޭން ރަނގަޅު ކާމިޔާބީ ހޯދާނެ ކަމަށް ވިދާޅުވެފަ އެވެ. އިއްބެގެ ލީޑަޝިޕްގައި މިހާތަނަށް ރާއްޖޭން ވާދަކުރި އޭޝިއާގެ ތިން މުބާރާތުގައި ވެސް ރާއްޖެ އަށް ވަނީ މެޑަލް ގެނެސްފަ އެވެ. އަދި ސަރަަހައްދުގެ މުބާރާތްތަކުގައި ވެސް ވަނީ ރަން ވަނަތަކެއް ގެނެސްފަ އެވެ.

ބޮޑީބިލްޑިން އަކީ ބައިވެރިވާ ގިނަ މުބާރާތްތަކުގައި ރާއްޖެ އަށް މެޑަލް ގެނެސްދޭ ކުޅިވަރެކެވެ. މި ފަހަރުގެ މުބާރާތުގައި ވާދަކުރާ ރާއްޖޭގެ ފަަސް ބޮޑީބިލްޑަރުން ވެސް ތިބީ އެ އަޒުމުގަ އެވެ. އެކި ވަޒީފާތަކުގައި އުޅެމުން ވެސް ރާއްޖޭގެ ބޮޑީބިލްޑަރުން އެކަމަށް ވަގުތު ހުސްކޮށްގެން ކުރާ މަސައްކަތް ފާހަގަކުރަން ޖެހޭ ކަމަށް ރާއްޖޭގެ ކޯޗު އަނޫރާގް ވެސް ވަނީ ބުނެފަ އެވެ.

އަންނަ އަހަރު ބާއްވާ 54 ވަނަ އޭޝިއަން ބޮޑީބިލްޑިން ޗެމްޕިއަންޝިޕް އޮންނާނީ ރާއްޖޭގަ އެވެ. މިއީ އޭޝިއާގެ ބޮޑު މުބާރާތެއް ރާއްޖޭގައި ބާއްވާ ފުރަތަމަ ފަހަރެވެ. އެ މުބާރާތް ބާއްވަން ރާއްޖޭގެ ބޮޑީބިލްޑިން އެސޯސިއޭޝަނުން ނިންމާފައިވަނީ ކ. މާފުށީގަ އެވެ. ސަރުކާރުގެ އެހީގައި ބާއްވާ މި މުބާރާތުގައި ގާތްގަނޑަކަށް 300 އަށް ވުރެ ގިނަ އެތުލީޓުން ބައިވެރިވާނެ ކަމަށް ބީބީއޭއެމް އިން މައުލޫމާތުދީފަ އެވެ.