ޒުވާނުންނާ ގުޅޭ ގޮތުން ޔޫއެންޑީޕީ އާއި ކައުންޓަ ޓެރަރިޒަމް ސެންޓަރު ގުޅިގެން ހެދި ދިރާސާ ރިޕޯޓު މިއަދު ނެރެނީ.-- ފޮޓޯ: ހުސެއިން ވަހީދު/ މިހާރު
11 ޖުލައި 2019 - 15:02
ހަރުކަށި ފިކުރަށް ވުރެ ދިވެހި ޒުވާނުން ކަންބޮޑުވަނީ ރާއްޖޭގައި އޮތް ކޮރަޕްޝަނާ މެދުގައި ކަމަށް ޔޫއެންޑީޕީ މޯލްޑިވްސް އާއި ކައުންޓަ ޓެރަރިޒަމް ސެންޓަރުން ކުރި ދިރާސާއަކުން ދައްކައިފި އެވެ.
ރާއްޖޭގެ 28 ރަށަކުން 174 ޒުވާނުންނާ ސުވާލުކޮށް ހެދި ދިރާސާގައި ބުނެފައި ވަނީ ކޮރަޕްޝަން ނަގާފައި ދިވެހި ޒުވާނުން ދެން އެންމެ ކަންބޮޑުވަނީ ތައުލީމާއި މަސްތުވާތަކެއްޗާ މެދު ކަމަށެވެ.
ދިރާސާގެ ބައިވެރިންގެ ސަމާލުކަމަށް ދިނީ ހަތް މައްސަލައެކެވެ. އެ ހަތް މައްސަލަ، އެ މީހަކު އެންމެ ކަންބޮޑުވާ ތަރުތީބުން ލިސްޓްކުރަން ދިނެވެ.
އެގޮތަށް ލިސްޓްކުރުމުން ގިނަ ޒުވާނުންގެ ނަޒަރުގައި ގައުމީ މައްސަލަތައް އަންނަނީ ތިރީގައި އެވާ ގޮތަށެވެ.
1- ކޮރަޕްޝަން
2- ތައުލީމް
3- މަސްތުވާތަކެތި
4- ވަޒީފާ ނެތުން
5- ބޯހިޔާވަހިކަން
6- ގޭންގް
7- ޖިހާދުގެ ނަމުގައި އަނިޔާވެރިވުން
ދިރާސާގައި ބައިވެރިވި 60 ޕަސެންޓް މީހުން ވަނީ ލިސްޓްގެ އެންމެ ފަހަތަށް ދީނީ ހަރުކަށި ވިސްނުން ލައިފަ އެވެ.
ޒުވާނުންގެ ކަންބޮޑުވުންތަކާ ބެހޭ ގޮތުން ޔޫއެންޑީޕީ އާއި ކައުންޓަ ޓެރަރިޒަމް ސެންޓަރު ގުޅިގެން ހެދި ދިރާސާ ރިޕޯޓު ނެރުމުގެ ރަސްމިއްޔާތު .-- ފޮޓޯ: ހުސެއިން ވަހީދު/ މިހާރު
ދިރާސާގެ ބައިވެރިން ނިސްބަތްވާ ރަށްރަށުގެ ރައްޔިތުން ދީނީ ހަރުކަށި ވިސްނުމަށް ތާއީދުކުރާ ކަމަށް ބުނީ، ސާވޭގައި ބައިވެރިވި މީހުންގެ އެންމެ 10 ޕަސެންޓެވެ.
ދިރާސާގައި ބުނެފައިވާ ގޮތުގައި ވަޒީފާ ނެތް ދިވެހި ޒުވާނުންގެ ނިސްބަތް 26 ޕަސެންޓަށް އަރަ އެވެ.
އާއިލާތައް ރޫޅުމުގެ އެއް ސަބަބަށް ސިޔާސީ ކަންކަން ވާ ކަމަށް ގިނަ ޒުވާނުން ދެކޭއިރު ސަރުކާރުން ޒުވާނުންނާ މެދު ވިސްނާ ކަމަށް ގަބޫލުކުރަނީ 50 ޕަސެންޓަށް ވުރެ މަދު ބައެކެވެ.
ރަށްރަށަށް ސަރުކާރުން ކުރާ ހޭދަ އިތުރުކުރަން ޖެހޭ ކަމަށް 88 ޕަސެންޓް ބައިވެރިން އެއްބަސްވެ އެވެ. ގެއިން ބޭރުގައި އަންހެނުން މަސައްކަތް ކުރަން ޖެހޭ ކަމަށް ގަބޫލުކުރާ ނިސްބަތް 84 ޕަސެންޓް އަށް އަރަަ އެވެ. ސަރުކާރުގައި މިހާރަށް ވުރެ މުހިއްމު ރޯލެއް އަންހެނުން ކުޅެން ޖެހޭ ކަމަށް 70 ޕަސެންޓް މީހުން ބުނެ އެވެ.
ރަށްރަށުގައި އިޖުތިމާއީ ރޫހު ވަރުގަދަކަމަށް ދެކެނީ އެންމެ 39 ޕަސެންޓް ޒުވާނުންނެވެ.
ސާވޭ ފުރިހަމަކުރި ޒުވާނުން ވަނީ ގައުމުގެ ވެރިންނަށް ވަރުގަދަ މެސެޖްތަކެއް ވެސް ދޫކޮށްފަ އެވެ. އެގޮތުން ކޮރަޕްޝަންގެ ސަބަބުން ކިޔެވުމާ ބައެއް މީހުން ދުރަށް ދާ ކަމަށް އެއްބަސްވި އެވެ. އަދި ވަޒީފާއެއް ނުލިބެންޏާ ޑިިގްރީއެއް ހެދުމުގެ ބޭނުމަކީ ކޮބައިތޯ ގިނަ ޒުވާނުން ސުވާލު އުފެއްދި އެވެ. ބުރަކޮށް މަސައްކަތްކުރާ ނަމަ ވަޒީފާގައި ކުރިއަށްދެވޭނެ ކަމަށް އިސް ވެރިން ބުންޏަސް ހަގީގަތަކީ އެއީ ނޫން ކަން ވެސް ދިރާސާގައި ވަނީ ފާހަގަކޮށްފަ އެވެ.
ދިރާސާ ރިޕޯޓު ނެރުމުގެ ރަސްމިއްޔާތުގައި، ޔޫއެންޑީޕީގެ އަކިކޯ ފުޖީ ބައިވެރިވެވަޑައިގަންނަވަނީ.-- ފޮޓޯ: ހުސެއިން ވަހީދު/ މިހާރު
ދިރާސާ ނެރެން ބޭއްވި ރަސްމިއްޔާތުގައި ވާހަކަދައްކަވަމުން ޔޫއެންޑީޕީން ރާއްޖެއަށް ކަނޑައަޅާފައި ހުންނަވާ މަންދޫބު އަކިކޯ ފުޖީ ވިދާޅުވީ އެ ރިޕޯޓުން އެންމެ ހިތްހަމަޖެހިވަޑައިގަންނަވަނީ މުސްތަގުބަލާ މެދު ޒުވާނުން ކުރާ އުއްމީދު ބޮޑުކަމުން ކަމަށެވެ. އޭނާ ވިދާޅުވި ގޮތުގައި އެއީ ކަމާ ބެހޭ ފަރާތްތަކަށް ވެސް މުހިއްމު ރިޕޯޓެކެވެ. ނަމަވެސް ގޮންޖެހުމަކީ ރިޕޯޓްގައި ފާހަގަކޮށްފައިވާ ކަންކަން ތަންފީޒުކުރުން ކަމަށް އޭނާ ވިދާޅުވި އެވެ.
ޒުވާނުންނާ ގުޅޭ ގޮތުން ޔޫއެންޑީޕީ އާއި ކައުންޓަ ޓެރަރިޒަމް ސެންޓަރު ގުޅިގެން ހެދި ދިރާސާ ރިޕޯޓު ނެރެން ބޭއްވި ރަސްމިއްޔާތުގައި، ޑިފެންސް މިނިސްޓަރު މާރިޔާ ވާހަކަދައްކަވަނީ-- ފޮޓޯ: ހުސެއިން ވަހީދު/ މިހާރު
ޑިފެންސް މިނިސްޓަރު މާރިޔާ އަހުމަދު ވިދާޅުވީ ޒުވާނުންނަކީ އިހުތިޔާރުކުރާ ކޮންމެ ދާއިރާއަކުން ވެސް އެންމެ މަތީ ފަންތިއަށް ވާސިލްވުމުގެ ގާބިލްކަން ޒުވާނުންނަށް ލިބިފައިވާ ކަމަށެވެ. އަދި މުޖުތަމައުގައި ހުރި މައްސަލަތަކުން އަރައިގަނެވޭނެ އަލި މަގެއް ފެންނާނެކަމުގެ އުއްމީދު ޒުވާނުންނަށް އޮތުމުން އެކަމާ އުފާކުރައްވާ ކަމަށް ވެސް އޭނާ ވިދާޅުވި އެވެ.
ރާއްޖޭގެ ފުރަތަމަ އަންހެން ޑިފެންސް މިނިސްޓަރު ވިދާޅުވި ގޮތުގައި ގައުމުގެ ކަންކަމާ މެދު ބަސް ބުނުމުގެ ފުރުސަތު މީގެ ކުރިން ޒުވާނުންނަށް ލިބިފައެއްނުވެ އެވެ. ނަމަވެސް އެ ފުރުސަތު މިހާރު ފަހިކޮށްދީ މައްސަލަތައް ހައްލުކޮށްދެމުން އަންނަ ކަމަށް އޭނާ ވިދާޅުވި އެވެ.
މި ދިރާސާ ކުރިއަށްގެންދިޔައީ ޖަޕާނު ސަރުކާރުގެ އެހީގަ އެވެ. އެ ގައުމުން ރާއްޖެ ކަނޑައަޅާފައި ހުންނަވާ ސަފީރު ކެއިކޯ ޔަނާއި ވަނީ ދިރާސާއިން ފާހަގަވި ކަންކަމަށް ކަމާ ބެހޭ އިދާރާތަކުން ސަމާލުކަން ދީ ހައްލު ގެނެސްދިނުމަށް އެދިވަޑައިގެންފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ސަރީފު
12 July 2019
ހަރުކަށި ފިކުރަކީ ނުރައްކާތެރި ކަމެއް ޕާކިސްތާނުން ނަމޫނާ ނަގާބަލަ ޒުވާނުން .މިހާރު އެތާގައި ހަމަޖެހުމެއް ދާހިލީ ހަގުރާގައި ހާއްޔެއް އެއީ!
ދއނ
13 July 2019
މިގައުމުގަ، ޕާކިސްތާންގަ އޮތް އެންމެ ބޮޑު މައްސަލައަކީ ކޮރަޕްޝަން. ....
ދއނ
13 July 2019
ހަރުކަށި ފިކުރައްވުރެ ކޮރަޕްޝަން އޮތީ މާ ބޮޑަށް އާންމުވެފައި. ލާދީނިއްޔަތު ފެތުރުމުގެ ނުރައްކަލުގެ ވާހަކަވެސް ދައްކާ، އެކަމާ ދެކޮޅަށްވެސް މަސައްކަތް ކުރަންޖެހޭނެ... ނޫންނަމަ ތިޔަ އުޅެނީ އެހެން ބޭނުމެއްގަ. ދިރާސާއިިން ރަނގަޅު މެސެޖެއްް ލިބުނުކަމަށް ހީކުރަން.
ގުއިފޯލި
12 July 2019
ދުނިޔޭގެ ހުރިހާސަރުކާރުތަކުންވެސް އެންމެ ގިނައިން ހަރަދުކުރަނީ ޓެރަރިޒަމް ނައްތާލަން. ތަފާތު ހިސާބުތަކުންދައްކާގޮތުގައި ޓެރަރިޒަމްގެ [މުސްލިމުންނޭ ކިޔައިގެން] ހަރަކާތުން މަރުވަނީ 0.00000014 ޕަސެންޓް އެކަމަކު މަދިރިލޭބޮއިގެން ދުނިޔޭގައި އެތައްމިލިޔަން މީހުން އަހަރެއްގެ ތެރޭގައިމަރުވޭ. އަދި އަމިއްލަޔަށް މަރުވާމީހުން ވަނީ ލިސްޓުގެ އެންމެކުރީގައި
ބޮޑުމީހާ
11 July 2019
މިގައުމުގަ އޮތް އެންމެ ބޮޑު މައްސަލައަކީ ކޮރަޕްޝަން. ކޮރަޕްޝަންެގެ ކުށަށް އުމުރުދުވހުގެ ޖަލު ހުކުމް އިއްވަންވީ. މިހާ ކޮރަޕްޓް ބޮޑު ގައުމެއްގެ އެ ކުށުގައި ބެދި ހުކުމް ތަންފީޒުކުރާ މީހަކު އަދި ނުފެނޭ
ނޯރީޒަން
11 July 2019
ހަރުކަށި ފިކުރަށް ޖާގަދޭ އެންމެ ވަރުގަދަ ފެކްޓަރ އަކީ ރައްޔިތުންނަށް ޢާމްދަނީލިބުމަށް ފުރުޞަހަނިކޮށް މަދުބަޔަކު ގަދަކަމުންް އުފަލުގައި ތިބުމަށް ރާވަމުންދާ ރޭވުމާއި ،އަމިއްލައެދުމާއި ،މީހުންގެެ ދަތިތަކަށް ބީރުކަންފަތެއް ދިނުމާއި، މިޤައުމުގެެ ވަޞީލަތްތަކާއި ޢާމްދަނީތައް މަސައްކަތްކުރުމަށް ބޭނުްވާ މީހުންނަށްނުދީ އޮޅުވާލާ ރައްޔިތުންނަށްް މަކަރުހަދަމުންދާ ސިޔާސީ އަދި ނުފޫޒުގަދަަ ވިޔަފާރިވެރިންނަށް ބެހުމުގައިސިފައިންނާއި ފުލުހުން ބައިވެރިވުން.
ނާސިހު
11 July 2019
ލަވަ މުބާރާތް ހަރާންވެއްޖެ. ކޮންސެޓް ހަރާންވެއްޖެ. ހަރުކަށި ފިކުރެއް ނެތެއްނު ދޯ ..
ަޢަލީ
12 July 2019
ލަވައަކީ، ޙަރާމް އެއްޗެކޭ ބުނީ ކާކުތޯ؟ ކިޔާ އަޑު އިވެނީ މިއުޒިކް ޙަރާމްވާހަކަ! ޤުރުޢާނާއި ޙަދީސް ގެ ނައްޞުން އެކަމުގެ ދަލީލުވެސް އެބަދައްކާ އެބޭފުޅުން، ދެން ތިބޭފުޅާ އެއީ ޙަރާމް އެއްޗެއްނޫންކަމަށް ގަދަ ދަލީލު ދައްކަވާފިނަމަ، ތިބޭފުޅާގެ ރަޢުޔުއަށް ތާއީދު ކުރާނަނަން! ވަރަށް ސަލާމް! :)
ިއިބްރާ
11 July 2019
އަދި ކަންބޮޑުވާ އިތުރު 10ކަންތަކުގެ ފަހަތަށް ދީނީ ހަރުކަށިން ގެނައިނަމަވެސް ދީނީ ހަރުކަށިކަން އަންނާނީ އެންމެ ފަހަތަށެވެ. މާނައަކީ މިތާނގައި ދީނީ ހަރުކަށި ފިކުރުގެ ނުރައްކާ ނެތެވެ.
އަހުމަދު ހަމީދު
11 July 2019
ތި ސާވޭ ކުރިބަޔަކު ވަރަށް ހިތްދަތިވާނެ ކަމަށް ލަފާކުރެވޭ، ބޭނުންވި އެތި ނުނެރެވުނީމަ. ނަމަވެސް ދިވެހިންނަކީ ގުނބޯ ހެއްދޭވަރަށްވުރެ ބޯބޮޑުބަޔެއް.
އައިސް
11 July 2019
ދިވެހި ޒުވާނާ ގެ ނަމުގަ ލިޔުނު ފަރާތައް ސާބަސް...100% ތެދު...
އަލީރާޖާ
11 July 2019
ހަރުކަށި ފިކުރައްވުރެ ކޮރަޕްޝަން އޮތީ މާ ބޮޑަށް އާންމުވެފައި. ނަމަވެސް ހަރުކަށި ފިކުރުގެ ނުރައްކާތެރިކަން ވަރަށް ބޮޑު. އަދި އެއިން ލިބިދާނެ ގެއްލުން ކޮރަޕްޝަނުން ލިބޭ ގެއްލުމަށް ވުރެ ބޮޑުވުމުގެ ފުރުސަތު އެބައޮތް.
ކަންނެތްޒުވާނާ
11 July 2019
ޒުވާނުނަށް ވިސްނޭނީ މާފަހުން. މިވެސް ޒުވާނުންތަކެއް 'މިނިވަންކަން' ލިބޭތީ ހޮވި ސަރުކާރެއްް. އެކަމަކު ޒުވާނުން އެދޭ ކަންތަކެއް މިސަރުކާރަށް 10އަހަރު ދިނަސް ނުފުދޭނެ. ފުދެންޔާ ފުދޭނީ ހަމަ އިންޑިޔާ ޒުވާނުންގެ ބޭނުންތަށް.