ޖެރުޝިޔާ އަށް ލިޓަސް އިން ދިނީ "އަގުބޮޑު ހަދިޔާ"އެއް

އުމުރުން 13 އަހަރުގެ, ހާއްސަ އެހީއަށް ބޭނުންވާ ދަރިފުޅު ގޮވައިގެން ހަފްތާއަކު ތިން ހަތަރު ބުރަށް ޓްރީޓޮޕް ހޮސްޕިޓަލަށް ތެރަޕީ ނަގަން ދާންޖެހޭތީ ޖެރުޝިޔާ އިސްމާއިލް ނިޒާރު ސައިކަލެއް ކުއްޔަށް ނަގަން ސޯޝަލް މީޑިއާގައި ޖެހީ މިދިޔަ މަހުގެ މެދު ތެރޭގަ އެވެ. ނުވަ އަހަރު ކުރިން ފެށިގެން އޭނާ ދުއްވަމުންދިޔަ ސައިކަލު ހަލާކުވެ އެތައް ފަހަރަކު ހަދައިގެން ވެސް ކުރިއަށް ދެވޭ ގޮތް ނުވެގެން ޕޯސްޓް ޖަހަން މަޖުބޫރުވީ އެވެ.

އެހީގެ ޕޯސްޓް ޖެހުމާ އެކު ސައިކަލު ފިހާރަ، "ލިޓަސް" އިން ލިބުނީ އޭނާގެ ބަހުން ނަމަ، ދުވަހަކު ވެސް ޝުކުރުވެރި ނުވެވޭނެ ވަރުގެ ހަދިޔާ އެކެވެ. އޭނާ ބޭނުން ވައްތަރެއްގެ ބޭނުން ކުލައެއްގެ ސައިކަލެކެވެ.

ޖެރުޝިޔާ، "މިހާރު" އަށް ބުނީ އެމްއެންޑީއެފްގައި މަސައްކަތްކުރާ އޭނާގެ ފިރިމީހާ ރާއްޖެއިން ބޭރަށް ކިޔަވަން ދިޔަތާ ހަފްތާއެއް ވިތަނާހެން ސައިކަލުގެ މައްސަލަ ވަރަށް ބޮޑުވި ކަމަށެވެ. ސައިކަލު ހަލާކުވެގެން އެތައް ފަހަރަކު ހަދަން ޖެހުނުއިރު އެކަމަށް މަހެއްގެ މައްޗަށް އެތައް ހޭދައެއް ކުރަންޖެހުމާއި ދަރިފުޅު ތަންތަނަށް އުފުލުމުގައި ބޮޑު ތަކުލީފުތަކެއް އުފުލަން ޖެހުނު ކަމަށް އޭނާ ބުންޏެވެ.

"އަޅުގަނޑުގެ ދަރިފުޅަކީ ސެރެބްރަލް ޕަލްސީ ހުންނަ ކުއްޖެއް. ހިނގާބިނގާވެ އުޅެވެން ފެށީ ސާޖަރީ ހެދި ފަހުން. ސައިކަލު ހަލާކުވީމަ ސްކޫލަށް ވެސް ދާން ޖެހެނީ ހިނގާފައި. ސްކޫލުން އައިސް އަރަން ޖެހެނީ ހަތަރު ވަނަ ފްލޯއަށް ސިޑިން. ވަރަށް ބޮޑަށް އުނދަގޫވި ސައިކަލު ނެތީމަ،" އޭނާ ބުންޏެވެ.

އޭނާ ބުނީ މާލޭގައި ދިރިއުޅުނަސް ކޮންމެ ފަހަރަކު ދަރިފުޅުގެ ތެރަޕީތައް ނެގުމަށް ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ދަނީ ފިރިމީހާއަކީ އެމްއެންޑީއެފްގައި އުޅޭ މީހަކަށްވާތީ އެތަނުން ހިލޭ ތެރަޕީ ލިބޭތީ ކަމަށެވެ. އެކަމަކު މާލެއިން ޓެކްސީ ހޯދަން އުނދަގޫވުމާއި ކޮންމެ ފަހަރަކު ޓެކްސީގައި ދަތުރުކުރަން އެތައް ހަރަދެއް ދާނެތީ ސައިކަލެއް ނުހާދާ ވާން ނެތީ އެވެ.

ދަރިފުޅަށް ރަނގަޅަކަށް ނުއެއް ހިނގޭނެ. އެވަރުން ވެސް އަމީނިއްޔާ ސްކޫލުން ގެއާ ހިސާބަށް ދަނީ ހިނގާފައި. ގެއަށް އައިސް މައްޗަށް ވެސް އަރާނީ ހިނގާފައި. ވަރުބަލިވިޔަސް ޝަކުވާއެއް ނުކުރޭ. އެކަަމަކު އެނގޭ ވަރަށް ހާލުންކަން ވަރުބަލިވެފައިކަން އެހެރީ މޫނުމަތިން -- ޖެރުޝިޔާ

އެހީގެ ޕޯސްޓް ޖެހުމާ އެކު ސްކޫލުގައި އެކުގައި ކިޔެވި މީހަކު ގުޅާ، ލިޓަސްގެ މީހަކަށް ނަމްބަރެއްދީފައިވާ ކަމަށާއި އޭނާއާ ގުޅައިގެން ކުރިއަށް ދިއުމަށް އެދުނު ކަމަށް ބުންޏެވެ.

ލިޓަސް އިން ޖެރުޝިޔާއަށް ހަދިޔާކުރި ސައިކަލު--

"އެތައް ފަހަރަކު ހަދައިގެން ވެސް ސައިކަލު ރަނގަޅުނުވީ. ހަދައިގެން އަންނަތާ އެއް ދުވަހުން އެބަ ހަލާކުވޭ. ދެން ފިރިމީހާ ބޭރުގައި ހުރީމަ އޭނާ ރައްޓެހިންނަށް ގުޅައިގެން ސައިކަލު ރަނގަޅުކޮށްދޭން ފޮނުވާނެ. މިހާލުގައި އުޅެނިކޮށް ޕޯސްޓް ޖެހީމަ ރައްޓެއްސަކު ގުޅާފައި ބުނީ ލިޓަސްގެ މީހާއަށް ނަމްބަރުދީފީމޭ މެސެޖެއްކޮށްލަބަލާށޭ. އެމީހުން ވަރަށް އެހީވެޔޭ މީހުންނަށް،" އޭނާ ކިޔައިދިނެވެ.

ޖެހިގެން އައި ދުވަހު ފިރިމީހާގެ ކޮއްކޮއަކާ އެކު އޭނާ ދިޔައީ ލިޓަސްގެ އިސް މީހަކާ ބައްދަލުކުރުމަށެވެ. އޭނާގެ ހާލަތު ހުރި ގޮތް އެމީހުން އޮޅުން ފިލުވި އެވެ. ޖެރުޝިޔާއަކީ ހާއްސަ އެހީއަށް ބޭނުންވާ ދަރިފުޅު ގޮވައިގެން އަދި އޭނާގެ މަންމަ ނިޔާވެފައިވާތީ އޭނާގެ ހާއްސަ އެހީއަށް ބޭނުންވާ ކޮއްކޮ ވެސް ބަލަމުން އަންނަ ޒުވާނެކެވެ.

މިވަގުތު ސައިކަލެއް ގަނެވޭނެ ފައިސާ ނެތް ކަމަށް ބުނުމުން ލިޓަސް އިން ނިންމީ ސައިކަލު ހިލޭދޭށެވެ. އޭގެ ހަފްތާއެއް ފަހުން އޭނާއަށް ސައިކަލު ލިޓަސް އިން ހަވާލުކުރީ އޭނާގެ ނަން މައްޗަށް ރަޖިސްޓްރީކޮށް ހުރިހާ ކަމެއް ނިންމުމަށް ފަހު އެވެ.

ދަރިފުޅުގެ ތަކުލީފުތަކަށް ނިމުމެއް އައުމުން ޖެރުޝިޔާ ހުރީ ވަރަށް ބޮޑަށް އުފަލުންްނެވެ. ލިޓަސް އަށް އޭނާގެ ޝުކުރު ބަންޑުންކޮށްލި އެވެ.