އިނގިރޭސި އާ ސަރުކާރަށް ބާ ކެބިނެޓެއް

އޮކްޓޫބަރ 26، 2022؛ އިނގިރޭސި ވިލާތުގެ އާ ބޮޑުވަޒީރު ރިޝީ ސުނަކް އޭނާގެ ކެބިނެޓްގެ ފުރަތަމަ ޖަލްސާގައި ބައެއް ވަޒީރުންނާ އެކު. --އޭއެފްޕީ

26 އޮކްޓޯބަރ 2022 - 16:16

4 comments

އިނގިރޭސި ވިލާތުގެ އާ ބޮޑުވަޒީރު ރިޝީ ސުނަކް އޭނާގެ ކެބިނެޓަށް ބޭފުޅުން އައްޔަން ކުރައްވައި އެ ބޭފުޅުންގެ ޒިންމާތަކާއި މަސްއޫލިއްޔަތުތައް އިއުލާން ކުރައްވައިފި އެވެ.

ރިޝީ ސުނަކް އިއްޔެ އިނގިރޭސި ރަސްގެފާނު ޗާލްސް ތިން ވަނައާ ބައްދަލުކުރެއްވުމަށް ފަހު، އިނގިރޭސި ތަޚުތުގެ ނަމުގައި ސަރުކާރެއް އެކުލަވައިލެއްވުމަށް ރަސްގެފާނު ދެއްވި ދައުވަތާއެކު، ބޮޑުވަޒީރުގެ ރަސްމީ އޮފީސް، ޑައުނިން ސްޓްރީޓް 10 އަށް ވަޑައިގެން، އޭނާ އިޚްތިޔާރު ކުރެއްވި ބޭފުޅުންނާ ބައްދަލުކުރެއްވި އެވެ.

އޮކްޓޫބަރ 26، 2022؛ އިނގިރޭސި ވިލާތުގެ އާ ބޮޑުވަޒީރު ރިޝީ ސުނަކް އޭނާގެ ސަރުކާރުގެ ދާޚިލީ ވަޒީރު ކަމަށް އައްޔަން ކުރެއްވި ސުއެލާ ބްރޭވާމޭން، ކެބިނެޓްގެ ފުރަތަމަ ޖަލްސާގައި ބައިވެރިވެވަޑައިގަތުމަށް ފަހު، ބޮޑުވަޒީރުގެ އޮފީހުން ނުކުމެވަޑައިގަންނަވަނީ. --އޭއެފްޕީ

އިނގިރޭސި ވިލާތުގެ އާ ސަރުކާރުގައި ހިމެނޭ ވަޒީރުންގެ ނަންތައް އިއްޔެ އިއުލާންކުރެއްވި އިރު، ކެބިނެޓްގައި ގިނައީ އެންމެ ފަހުގެ ދެ ސަރުކާރުގައި ކޮންމެވެސް މަގާމެއް ފުރުއްވި ބޭފުޅުންނެވެ. އަދި ކުރީގެ ސަރުކާރުގައި ނުފޫޒު ގަދަ މަގާމުތަކުގައި ތިއްބެވި ބައެއް ބޭފުޅުންނަށް ހަމަ އެ މަގާމުތައް ދެއްވި އެވެ.

އެ ގޮތުން ކުރީގެ ސަރުކާރުގައި މާލީ ވަޒީރުގެ މަގާމުގައި ހުންނެވި ޖެރެމީ ހަންޓް އާއި ޚާރިޖީ ވަޒީރު ޖޭމްސް ކްލެވަލީ އާއި ދިފާއީ ވަޒީރު ބެން ވެލެސް އަށް ހަމަ އެ މަގާމުތައް ދެއްވި އެވެ. އަދި ހޯމް މިނިސްޓަރުގެ މަގާމަށް އައްޔަންކުރެއްވީ އެ މަގާމުގައި ހުންނެވުމަށް ފަހު މިދިޔަ ހަފުތާގައި އިސްތިއުފާ ދެއްވި ސުއެލާ ބްރޭވާމޭން އެވެ.

އޮކްޓޫބަރ 26، 2022؛ އިނގިރޭސި ވިލާތުގެ އާ ބޮޑުވަޒީރު ރިޝީ ސުނަކް އޭނާގެ ކެބިނެޓް މެންބަރުންނާ އެކު ބޭއްވެވި ފުރަތަމަ ބައްދަލުކުރެއްވުމަށް ފަހު، ޚާރިޖީ ވަޒީރު ޖޭމްސް ކްލެވާލީ، ބޮޑުވަޒީރުގެ އޮފީހުން ނުކުމެވަޑައިގަންނަވަނީ. –އޭއެފްޕީ

ބޮރިސް ޖޯންސަންގެ ސަރުކާރުގައި މާލީ ވަޒީރުކަން ކުރެއްވި ނަދީމް ޒަހާވީ ކޮންޒަވޭޓިވް ޕާޓީގެ ޗެއާމަންކަން ދެއްވުމުގެ އިތުރުން ވަކި މިނިސްޓްރީއެއް ނެތް ވަޒީރެއްގެ ގޮތުގައި އައްޔަން ކުރެއްވި އެވެ. ބޮރިސްގެ ސަރުކާރުގައި ޚާރިޖީ ވަޒީރު ކަމާއި ޖަސްޓިސް މިނިސްޓަރުކަން ކުރެއްވި ޑޮމިނިކް ރާބް އަށް، ބޮޑުވަޒީރުގެ ނާއިބު ކަމާއި ޖަސްޓިސް މިނިސްޓަރުކަން ދެއްވި އެވެ.

ގާނޫނު ހަދާ މަޖިލީހުގެ ތިރި ގޭގެ ރައީސް ކަމަށް އައްޔަންކުރެއްވީ، ލީޒް ޓްރަސްގެ ވެރިކަމުގައި ވެސް އެ މަގާމުގައި ހުންނެވި ޕެނީ މޯޑައުންޓް އެވެ.

އޮކްޓޫބަރ 26، 2022؛ އިނގިރޭސި ވިލާތުގެ އާ ބޮޑުވަޒީރު ރިޝީ ސުނަކް އޭނާގެ ކެބިނެޓް މެންބަރުންނާ އެކު ބޭއްވެވި ފުރަތަމަ ބައްދަލުކުރެއްވުމަށް ފަހު، މާލީ ވަޒީރު ޖެރެމީ ހަންޓް، ބޮޑުވަޒީރުގެ އޮފީހުން ނުކުމެވަޑައިގަންނަވަނީ. –އޭއެފްޕީ

އާ ސަރުކާރަށް އިއްޔެ އައްޔަންކުރެއްވި ވަޒީރުންނާ އެކު، ބޮޑުވަޒީރު ރިޝީ ސުނަކް މިއަދު ވަނީ ކެބިނެޓްގެ ފުރަތަމަ ޖަލްސާ ބާއްވައި، ވެރިކަން ހިންގުމުގެ ކަންތައް ކުރިއަށް ގެންދަވާނެ ގޮތާ މެދު މަޝްވަރާ ކުރައްވައިފަ އެވެ.

ކެބިނެޓްގެ ފުރަތަމަ ބައްދަލުކުރެއްވުމަށް ފަހު، ކޮންޒަވޭޓިވް ޕާޓީގެ ޗެއާމަން އަދި ވަކި މިނިސްޓްރީއެއް ނެތް ވަޒީރެއްގެ ގޮތުގައި ހުންނެވި ނަދީމް ޒަހާވީ ވިދާޅުވީ ޕާޓީ އޮތީ އެކަތިގަނޑެއްގެ ގޮތުގައި ކަމަށާއި ވަރަށް ބަދަހި ގުޅުމެއް އެބަ އޮތް ކަމަށެވެ.

ރިޝީ ސުނަކް

4 ކޮމެންޓް, 3 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

އަޙްމަދޭ

27 October 2022

އިނގިރޭސި ބޮޑުވަޒީރު، އިންޑިޔާ ދަރިކޮޅު، އެމެރިކާގެ ނައިބުރައީސް އިންޑިޔާ ދަރިކޮޅު، ސިންގަޕޫރުގެ ބޮޑުވަޒީރު އިންޑިޔާ ދަރިކަޮޅު، އަދި މިނޫން ބައެއް ގައުމުތަކުގައި ވެސް ވެރިކަމުގެ ތެރޭގައި އިންޑިޔާ ދަރިކޮޅުގެ މީހުން، އެހެން ކަމުން މިއިން ކޮންމެ ވެރިކަމެއްގައި ވެސް އިންޑިޔާގެ މަސްލަތު އޮންނާނެ.