އިޒްރޭލު ޖަވާބުދާރީކުރުވަން ރައީސް ގޮވާލެއްވުމުން ފަހުރުވެރިވޭ: ޕީއެންސީ

ބައިނަލްއަގާވާމީ ގާނޫނުތަކާއި އދ.ގެ މުއާހަދާތަކާ ހިލާފަށް އިޒްރޭލުން އަމަލުކުރަމުންދާތީ ޖަވާބުދާރީ ކުރުމަށް ބައިނަލްއަގްވާމީ މުޖުތަމައަށް ރައީސް ޑރ. މުހައްމަދު މުއިއްޒު ގޮވާލެއްވުމުން ފަހުރުވެރިވާ ކަމަށް ޕީއެންސީން ބުނެފި އެވެ.

އދ. ގެ އާންމު މަޖިލީހުގެ 79 ވަނަ ޖަލްސާގައި ރައީސް މުއިއްޒު ރޭ ދެއްވި ތަގުރީރާ ގުޅިގެން އެމަނިކުފާނުގެ ޕާޓީން ނެރުނު ބަޔާނުގައި ބުނީ ރާއްޖެއާ މެދު އެ މަނިކުފާނު ދެކެވަޑައިގަންނަވާ ހުވަފެންތަކާއި ގެންގުޅުއްވާ ތަސައްވަރާއި ދުނިޔޭގެ މަސްރަހުގައި ހިނގަމުންދާ ބޮޑެތި ކަންކަމާ ގުޅޭ ގޮތުން ރައީސްގެ އެ ތަގުރީރުގައި ވާހަކަފުޅު ދެއްކެވުމުން ފަހުރުވެރިވާ ކަމަށެވެ.

"މުޅި އިސްލާމީ އުންމަތް އެކަމުގެ ގިލަންވެރިކަން އިހްސާސްކުރަމުންދާ ފަލަސްތީނުގެ މައްސާލާގައި ސާފު ސަރީހަކޮށް އިސްރާއީލުން ހިންގަމުންދާ ޓެރަރިޒަމްގެ އަމަލުތަކެއްކަން ފާހަގަކުރައްވައި އެ ޖަރީމާތައް ތަފްސީލުކޮށް ބަޔާންކޮށްދެއްވުމާ އެކު، ބައިނަލްއަގްވާމީ ގާނޫނުތަކާއި އދ. ގެ މުއާހަދާތަކާ ހިލާފަށް އެ އަމަލުތަކާ މެދު އިސްރާއީލް ޖަވާބުދާރީކުރުމަށް ބައިނަލްއަގްވާމީ މުޖުތަމައަށް ހަރު އަޑުން ގޮވާލެއްވުމަކީ ކޮންމެ ދިވެހި ދަރިއަކުމެ އެމަނިކުފާނާ މެދު ފަހުރުވެރިވާނެ ފަދަ ހިތްވަރުގަދަ އަމަލުފުޅެކެވެ،" ޕީއެންސީގެ ބަޔާނުގައި ބުންޏެވެ.

ރައީސް ޑރ. މުހައްމަދު މުއިއްޒު، އދ.ގެ އާންމު މަޖިލީހުގެ 79 ވަނަ ޖަލްސާގައި ތަގްރީރު ކުރައްވަނީ.

ޕީއެންސީން ވަނީ 2040 ވަނަ އަހަރު އަންނަންވާއިރަށް، ތަަރައްގީވެފައިވާ ގައުމުތަކުގެ ސަފުން ރާއްޖެއަށް ޖާގަ ކަށަވަރުކުރުމާއި ރާއްޖޭގެ މުއައްސަސާތައް ހަރުދަނާ ކުރުމާއި ޑިޖިޓަލް ކުރިއެރުން ކަށަވަރުކުރުމާއި ޒަމާނީ ޓެކްނޮލޮޖީގެ ވަސީލަތްތައް ރާއްޖޭގައި ފަހިވާނެ ސިޔާސަތުތައް ބައްޓަން ކުރައްވާނެ ކަމަށް ތަގުރީރުގައި އިއުލާންކުރެއްވިކަން ފާހަގަކުރައްވައިފަ އެވެ.

ރާއްޖޭގެ އިގްތިސާދު ހަރުދަނާކުރުމަށް އާ ސިޔާސަތުތައް ތައާރަފުކުރުމަށް މާލީ ހިދުމަތްތަކުގެ ދާއިރާ ފުޅާކުރުމަށް ޑިވެލޮޕްމަންޓް ބޭންކް ގާއިމުކުރުން ފަދަ ކަންކަން ކުރުމަށް ރާވާފައިވާކަން ރައީސްގެ ތަގުރީރުގައި ފާހަގަކުރެއްވި އެވެ. އެންމެންނަށް ހަމަހަމަކަމާ އެކު ފުރުސަތު ލިބޭ އިގްތިސާދެއް ބިނާކުރަން ގެންގުޅޭ ސިޔާސަތުތަކާއި ހުރިހާ ދިވެހިންނަށް ގެދޮރުވެރިކަން ފޯރުކޮށްދޭން ގެންގުޅޭ ސިޔާސަތުތަކާއި ޒުވާނުންގެ ޝާމިލުވުން އިތުރުކުރުމަށް ގެންގުޅުއްވާ ސިޔާސަތު ދުނިޔެއަށް އިއުލާނުކުރެއްވުމަކީ ދިވެހިންގެ މެދުގައި އިތުރުބާރު އުފެދޭނެ ކަމެއްގެ ގޮތުގައި ބަޔާނުގައި ވަނީ ސިފަކޮށްފަ އެވެ.

ޕީއެންސީން ބުނީ ރައީސް ދެއްވި ތަގްރީރަކީ ރާއްޖެއަކީ ކުޑަ ނަމަވެސް ބައިނަލްއަގްވާމީ މަސްރަހުގައި ހަމަ އިސްކޮޅަށް ތެދުވެ، ހައްގު ބަސް ބުނުމާއި ރާއްޖޭގެ އުންމީދުތަކާއި ހުވަފެންތައް އެހެން ދައުލަތްތަކުގެ ކުރިމަތީގައި ހާމަކުރަން ކެރޭކަން ސާބިތުކޮށްދެއްވި ތަގްރީރެއް ކަމަށެވެ.