ސިންވާރުގެ ފަހު ވަގުތުކޮޅު ހޭދަކުރެއްވި ގޭގެ ވެރިޔާ އުފަލުން

ހަމާސްގެ ވެރިޔާ ޔަހްޔާ ސިންވާރު އަވަހާރަކޮށްލި އިރު އިންނެވި ގޭގެ ވެރިމީހާ ފަހުރުވެރިކަމާ އެކު އެ ވާހަކަ ދައްކައިފި އެވެ.

އަޝްރަފް އަބޫ ތާހާ ކިޔާ މީހަކު ބީބީސީ އަށް ކިޔައިދީފައިވާ ގޮތުގައި ރަފަހްގައި ހުންނަ އެ ގެއަކީ އެ ސަރަހައްދު ދޫކޮށް ދާން އިޒްރޭލުން މިދިޔަ މެއި މަހު އަންގަންދެން، 15 އަހަރު ވަންދެން އުޅުނު ގެ އެވެ.

އަޝްރަފް ބުނި ގޮތުގައި، ރަފަހްގެ އިބްނު ސީނާ މަގުގައި ހުރި އެ ގޭގައި ހުރި ސޯފާއެއްގައި ސިންވާރު އިންނަވާ މަންޒަރު އިޒްރޭލުގެ ޑްރޯން ފުޓޭޖުން ފެނުމާ އެކު ލިބުނީ ޝޮކެކެވެ. ބީބީސީ އަރަބިކްގެ "ޣައްޒާ ލައިފްލައިން" އަށް އަޝްރަފް ބުނި ގޮތުގައި ސިންވާރު އިންނެވި ގެ ދޫކޮށް އެ ގޭގެ އެންމެން ޚާން ޔޫނިސްގައި ހުންނަ ގެޔަކަށް ދިޔައީ މެއި މަހުގެ ހަ ވަަނަ ދުވަހު އެވެ. އޭގެ ފަހުން އެ ގެޔާ ބެހޭ ގޮތުން އެއްވެސް މައުލޫމާތެއް ނުލިބޭ ކަމަށް ބުންޏެވެ.

އަޝްރަފް ބުނީ ސިންވާރުގެ އެންމެ ފަހު ވަގުތުތައް ކަމަށް ބުނާ ފުޓޭޖު އޭނާގެ ދަރިފުޅު ސޯޝަލް މީޑިއާއިން ދެއްކީ، އެއީ އެ މީހުންގެ ގެ ކަމަށް ބުނެ އެވެ. އެންމެ ފުރަތަމަ އޭނާ އެކަން ގަބޫލެއް ނުކުރެވުނެވެ.

ހަމާސްގެ ލީޑަރު ޔަހްޔާ ސިންވާރު އަވަހާރަކޮށްލި އިރު އިންނެވި ގޮނޑި ކުރިން ހުރި ގޮތް ފެންނަ ގޮތަށް، ގޭގެ ވެރިމީހާ ސޯޝަލް މީޑިއާގައި އާންމުކުރި ފޮޓޯއެއް

ސޯޝަލް މީޑިއާގައި އަޝްރަފް ދައްކާފައިވާ ވާހަކަތަކާއި އާންމުކޮށްފައިވާ ފޮޓޯތަކަށް ބަލާއިރު އިޒްރޭލުގެ ހަމަލާތަކުން ޒަހަމްވެ ވަޑައިގަތުމުން ސިންވާރު އިށީނދެވަޑައިގެން އިންނެވި އޮރެންޖު ކުލައިގެ ސޯފާ އަކީ އަޝްރަފްގެ އަންހެން ދަރިފުޅަށް އޭނާ ހަދައިދީފައިވާ ގޮނޑިއެކެވެ.

އަޝްރަފް ބުނި ގޮތުގައި ސިންވާރު އެ ގެޔަށް ވަޑައިގަތީ ކިހިނެއްކަމެއް ނުވަތަ ކީއްވެގެންކަމެއް އޭނާއަކަށް އެއްގޮތަކަށް ވެސް ނޭނގެ އެވެ. "އަހަންނާއި އާއިލާ އާއި ދަރިފުޅާ ވެސް މި ކަމާ އެއްވެސް ގުޅުމެއް ނެތް،" އޭނާ ބުނެފައިވެ އެވެ.

އަޝްރަފް ދެއްކި ފޮޓޯތަކާއި ވީޑިއޯތައް އިޒްރޭލުގެ ފޮޓޯތަކާއި ފުޓޭޖާ އަޅާބެލުމުން އަޝްރަފް ދައްކާ ވާހަކަ ކަށަވަރުކުރެވެ އެވެ. އެ ގެޔަކީ އެ ސަރަހައްދުގައި އެއްކޮށް ހަލާކު ނުވެ ހުރި މަދު ގެތަކުގެ ތެރެއިން ގެއެކެވެ.

ހަމާސްގެ ލީޑަރު ޔަހްޔާ ސިންވާރު އަވަހާރަކޮށްލި އިރު އިންނެވި ގޮނޑި ކުރިން ހުރި ގޮތް ފެންނަ ގޮތަށް، ގޭގެ ވެރިމީހާ ސޯޝަލް މީޑިއާގައި އާންމުކުރި ފޮޓޯއެއް

މެއި މަހު ރަފަހް އަށް އިޒްރޭލުން ދިން ހަމަލާތަކާ އެކު ބައިނަލްއަގުވާމީ ފާޑުކިޔުންތައް ވެސް ކުރިމަތިވި އެވެ. އަދި އދ. އިން ބުނާ ގޮތުގައި އިޒްރޭލުގެ ހަމަލާތަކާ ހެދި ފަލަސްތީނުގެ އެއް މިލިއަނަށްވުރެ ގިނަ މީހުން ހިޖުރަކުރަން ޖެހުނެވެ. ގިނަ މީހުން ދެވަނަ ނުވަތަ ތިންވަނަ ފަހަރަށް ވެސް ހިޖުރަކުރަން ޖެހުނެވެ. އެއީ އެހެން ސަރަހައްދުތަކުން ގެދޮރު ގެއްލިގެން ރަފަހްގައި ހިމާޔަތް ހޯދަން ތިބި މީހުން ކަމަށް ވާތީ އެވެ.

އަޝްރަފް ބުނި ގޮތުގައި އޭނާ އެ ގެ އިމާރާތްކުރީ އޭނާގެ އާއިލާގެ އެހެން މެންބަރުންގެ އެހީގަ އެވެ. ގެ އިމާރާތްކުރުމަށް 200،000 ޝެކެލް (53،500 ޑޮލަރު) ޚަރަދުވި ކަމަށް ބުންޏެވެ. އޭނާ ބުނި ގޮތުގައި ގެ ދޫކޮށް ދިޔައިރު އެތަން ހުންނާނީ ރަނގަޅު ހާލަތުގަ އެވެ.

ހަމާސްގެ ލީޑަރު ޔަހްޔާ ސިންވާރު އަވަހާރަކޮށްލުމުގެ ވަގުތުކޮޅެއް ކުރިން

އިޒްރޭލުގެ ފުޓޭޖުން ފެންނަ ތަންތަނުގެ ހަނދާން އާކުރަމުން އޭނާ ބުނީ ގޭގައި ހުރި އޮރެންޖު ކުލައިގެ ސޯފާތަކާއި އެހެން ސާމާނު އޭނާއަށް ވަރަށް ހާއްސަ ކަމަށެވެ. "މިއީ ވަރަށް ގިނަ ހަނދާންތައް. މީގެ ބައެއް ތަކެއްޗަކީ އަހަރެންގެ މަންމަ ގެނައި ތަކެތި އަދި އެއީ ވަރަށް އަގުހުރި އެއްޗެހި،" އޭނާ ބުންޏެވެ.

"މިކަން ވީގޮތުން އަހަރެން ވަރަށް ދެރަވޭ، އަހަރެން އިމާރާތްކުރި ގެ އާއި އަހަރެންގެ ހުރިހާ ފައިސާއެއް ގެއްލިއްޖެ،" އަޝްރަފް ބުންޏެވެ. "މި ގެއްލުމުގެ ބަދަލު ދެއްވޭނީ ހަމައެކަނި މާތްﷲ އަށް."

އިޒްރޭލުން ބުނެފައިވާ ގޮތުގައި އިޒްރޭލު ސިފައިންގެ ޕެޓްރޯލަކަށް ހަމަލާ ދިނުމަށް ފަހު ފިލަން މަސައްކަތްކުރި ތިން ހަނގުރާމަވެރިއެއްގެ ތެރެއިން އެކަކީ ސިންވާރުކަން އެނގުނީ އެއް ދުވަސް ފަހުންނެވެ. އެކަން އެނގުނީ ޓޭންކުން ގެޔަށް ހަމަލާދީ ގޮއްވާލި ދުވަސް ނޫން އަނެއް ދުވަހު ސިފައިން ވަދެ ބެލުމުންނެވެ. ސިންވާރު އަވަހާރަވެފައި އޮންނެވީ އިމާރާތުގެ ތިން ވަނަ ބުރީގައި ހުންނަ ސޯފާގައި އިށީނދެވަޑައިގެން އިންނަވަނިކޮށް އިޒްރޭލުން ދިން ހަމަލާއެއް ބޮލަށް އަމާޒުވެގެންނެވެ. އެކަމަކު އޭގެ ކުރިން ވެސް އޭނާ އިންނެވީ އެއް އަތާއި ފައި ކިރިޔާ ބުރި ނުވާ ވަރަށް ޒަހަމްވެފަ އެވެ.