މިފަހަރު ބައިކޮޅަށް ވަނީ 4 ލަނޑު

މިރޭގެ މެޗުގައި ރާއްޖޭގެ ޑިފެންޑަރު ފާތިމަތު އަފްޒާ، ތަޖިކިސްތާން ކުޅުންތެރިއަކަށް ހުރަސް އަޅަން މަސައްކަތްކުރަނީ. -- ފޮޓޯ: އޭއެފްސީ

މުހައްމަދު ޒަޔާން ޒާހިރު، މިހާރު

26 ސެޕްޓެމްބަރ 2021 - 23:51

1 comments

ދުޝަމްބޭ (ސެޕްޓެމްބަރު 26) - އޭއެފްސީ ވިމެންސް އޭޝިއަން ކަޕް ކޮލިފައިންގައި ރާއްޖޭގެ ޓީމު ކުޅުނު ފުރަތަމަ މެޗުގައި ވިއެޓްނާމާ ވާދަކޮށް ބައިކޮޅަށް 16 ލަނޑު ވަން ނަމަވެސް، ދެވަނަ މެޗުގައި މިރޭ ތަޖިކިސްތާނާ ވާދަކޮށް އެ ފަރަގު ހަތަރު ލަނޑަށް ކުޑަކޮށްފި އެވެ.

މިރޭގެ މެޗުގައި ތަޖިކިސްތާނުން ވަނީ ދެވަނަ މިނިޓުގައި ރާއްޖެ ކޮޅަށް ގޯލު ޖަހައި ލީޑު ނަގައިފަ އެވެ. އޭގެ 11 މިނިޓު ފަހުން ދެވަނަ ގޯލެއް ޖަހައި ލީޑު ފުޅާކުރިއިރު، ތިންވަނަ ލަނޑު ޖެހީ މެޗުގެ 24 ވަނަ މިނިޓުގަ އެވެ. ނަމަވެސް މި ހާފުގައި ދެން އިތުރު ލަނޑެއް ޖަހަން ރާއްޖޭގެ ޓީމުން ތަޖިކިސްތާނަށް ފުރުސަތެއް ނުދިނެވެ.

ތަޖިކިސްތާނުގެ ހަތަރު ވަނަ ލަނޑު ފެނިގެން ދިޔައީ ދެވަނަ ހާފު ފެށިގެން 13 ވަނަ މިނިޓުގަ އެވެ.

މި ނަތީޖާއާއެކު ތިން ޓީމު ހިމެނޭ ގުރޫޕް ބީގައި ރާއްޖެ ކުޅޭ ދެ މެޗުގެ ކުޅުން ވަނީ ނިމިފަ އެވެ. ޒުވާން ކުޅުންތެރިންތަކަކާ އެކު އުނދަގޫ ހާލަތެއްގައި އޮތް ޓީމުން މިރޭގެ މެޗުގައި މިވަނީ، ފުރަތަމަ މެޗުގެ ނަތީޖާއަށް ނުބަލައި، ކޮލިފައިންގެ މި ގުރޫޕް ހޯސްޓު ކުރާ ތަޖިކިސްތާނާ ދެކޮޅަށް ރަނގަޅު ވާދައެއް ކޮށްފަ އެވެ.

ތަޖިކިސްތާނުގެ މި މޮޅާއެކު، އެޓީމަށް ވަނީ އަންނަ ބުދަ ދުވަހު ވިއެޓްނާމާ ދެކޮޅަށް ކުޅޭ، މެޗު ކާމިޔާބުކޮށްގެން އަންނަ އަހަރު އިންޑިއާގައި ބާއްވާ ވިމެންސް އޭޝިއަން ކަޕަށް ކޮލިފައިވުމުގެ އަމިއްލަ ބާރު ލިބިފަ އެވެ.