އުންމީދީ މަސައްކަތްތަކަކާ އެކު ސާފިންގެ ރައީސް ސޮބާހް ދެވަނަ ދައުރަކަށް

ސާފިން އެސޯސިއޭޝަންގެ ރައީސަކަށް ދެވަނަ ދައުރަކަށް، މުހައްމަދު ސޮބާހް (ޗޭ) އިންތިހާބުކޮށްފި އެވެ.

ސާފިން އެސޯސިއޭޝަން، އެއް ފައުންޑާ، ޗޭ އެ އެސޯސިއޭޝަންގެ ރައީސްކަމަށް އެންމެ ފުރަތަމަ އިންތިހާބު ވީ 2019 ގަ އެވެ.

އޭނާގެ ފުރަތަމަ ދައުރުގައި ސާފިން ލީގެއް ތައާރަފުކޮށް އެ ލީގުގެ ތެރެއިން ގިނަ މުބާރާތްތަކެއް ބޭއްވި އެވެ. އޭނާގެ ފުރަތަމަ ދައުރު ނިމުނު އިރު ދެ މިލިއަން ރުފިޔާގެ ދަރަންޏެއް ވެސް އެސޯސިއޭޝަނުގައި އެބައޮތެވެ. ނަމަވެސް ސޮބާހް ވިދާޅުވީ އޭނާގެ ދެވަނަ ދައުރުގައި އެ ދަރަނި އަދާކުރެވޭނެ ކަމުގެ އުންމީދު އެބައޮތް ކަމަށެވެ.

އޭނާ ވިދާޅުވީ ދެވަނަ ދައުރުގައި އެންމެ އިސްކަން ދޭނީ އެއް ކަމަކީ ޔޫތު ޑިވެލޮމްޕެންޓަށް ކަމަށެވެ. އަދި އިތުރު ސަރަހައްދުތަކަށް ސާފިން މުބާރާތްތައް ގެންދިއުމަށް ވެސް އިސްކަންދޭނެ ކަމަށް ސޮބާހް ވިދާޅުވި އެވެ.

"އުމުރުން ހަގު ކުދިންނަށް ރާޅާއަޅަން ދަސްކޮށްދީ މީގެ ތެރެއަށް އެ ކުދިން ވައްދަން މަސައްކަތް ކުރުން އެއީ ވަރަށް ބޮޑު ޓާގެޓެ. އަދި މިހާރަށްވުރެ ވެސް ގިނަ އެތުލީޓުންނަށް މުބާރާތްތަކުގައި ވާދަކުރެވޭ ގޮތަށް އެ ސަރަހައްދުތަކަށް މުބާރާތް ގެންދަން މަސައްކަތް ކުރާނަން،" ސޮބާހް ވިދާޅުވި އެވެ.

މުބާރާތްތަކުގެ ފެންވަރު ރަނގަޅު ކުރުމަށް ޓެކްނިކަލް އޮފިޝަލުން ތަމްރީނު ކުރުމަށް ވެސް އޭނާގެ ދެވަނަ ދައުރުގައި މުހިންމު މަސައްކަތެއްގެ ގޮތުގައި ޗޭ ވަނީ ހިމަނައިފަ އެވެ.

"އަންނަ އޮތް ޖީލުތަކަށް ރާޅުތައް ހިމާޔަތްކުރުން ވަރަށް މުހިންމު. އެ ހޭލުންތެރިކަން އުފައްދައި ތިމާވެށި ހިމާޔަތްކުރުމުގެ ގޮތުން ވެސް އެ ކެމްޕޭން ކުރިއަށްގެންދާނަން،" އޭނާ ވިދާޅުވި އެވެ.

ސޮބާގެ ފުރަތަމަ ދައުރުގެ މަސައްކަތާ ބެހޭގޮތުން ސާފިން ކޮމިޔުނިޓީގެ ބައެއް ފަރާތްތަކުން ހިތްހަމަޖެހެ އެވެ.

ސާފިންގެ އެންމެ ކާމިޔާބު އެއް އެތުލީޓް ހުސައިން އަރީފް (އިބޫ) ބުނީ ސާފިން އެސޯސިއޭޝަންގެ ތާރީހުގައި ވެސް އެންމެ ކާމިޔާބު މަސައްކަތްތަކެއް ފެނުނީ ޗޭ ގެ މިދިޔަ ހަތަރު އަހަރުތެރޭ ކަމަށެވެ.

"މިދިޔަ ދެތިން އަހަރު މީ އެމްއެސްއޭ އުފެދުނު ފަހުން އެންމެ ކާމިޔާބު މަސައްކަތްތަކެއް ކުރި ޗޭގެ ދައުރުގައި. ފުރަތަމަ ފަހަރަށް ޖޫނިއާ ގައުމީ ޓީމެއް އެކުލަވާލާ. ސާފިން މުބާރާތްތަކުން އަންހެން ޑިވިޝަން ތައާރަފުކޮށްފި. ރަނގަޅު މަސައްކަތްތަކެއް ކޮށްފި،" އިބޫ ބުންޏެވެ.

މިދިޔަ ހުކުރު ދުވަހު ބޭއްވި ރަންނަމާރި ޗެލެންޖް ކާމިޔާބު ކުރި އަހްމަދު އާގިލް (އަންމަޑޭ) ބުނީ ނިމިދިޔަ ދައުރުގައި ސާފިން އަށް ވަރަށް ބޮޑު އެކްސްޕޮޝާއެއް ލިބުނު ކަމަށެވެ.

"ޗޭ ގެ މަސައްކަތާ މެދު ވަރަށް ހިތްހަމަޖެހޭ ކުރިން އަޑު އިވޭނީ ރާޅާއަޅާ ބަރަކު އުލެޔޭ. މުބާރާތެއް ބާއްވާކަމެއް ނޭނގޭނެ. (އެކަމަކު) ރަށްރަށުގައި މުބާރާތްތައް ބާއްވަން ފެށީމަ އެންމެންނަށް އެނގޭ ރަސްމީ ކުޅިވަރެއްކަން މީ،" އަންމަޑޭ ބުންޏެވެ.

ކުރީގެ ގައުމީ ޗެމްޕިއަން ހޫދު އަހްމަދު ބުނީ، ޗޭގެ ފުރަތަމަ ދައުރު ކުރި މަސައްކަތާ ބަލާއިރު ދެވަނަ ދައުރާ މެދު މާ ބޮޑަށް އުންމީދު ކުރެވޭ ކަމަށެވެ.

ސޮބާހް ވިދާޅުވީ ސާފިން އެސޯސިއޭޝަނަށް މިދިޔަ ހަތަރު އަހަރު ގިނަ ކަންތައްތަކެއް ކުރެވުނީ ސްޕޯޓްސް މިނިސްޓަރު އަހްމަދު މަހްލޫފް ދެއްވި އެއްބާރުލުމުގެ ސަބަބުން ކަމަށެވެ. އޭނާ ވިދާޅުވީ އެސޯސިއޭޝަން ހިންގަން އޮފީހެއް ހަމަޖައްސައިދީ ބޭރުގެ ކޯޗުންގެ އެހީ ދިވެހި އެތުލީޓުންނަށް ހޯދައިދިނުމުގައި މަހްލޫފް މުހިންމު ދައުރެއް އަދާކުރެއްވި ކަމަށެވެ.