މުބާރާތުގެ ޗެމްޕިއަން ބިއާންކޯ އެފްސީ.
11 ޑިސެމްބަރ 2017 - 14:53
ކ. މާފުށީ ނިއު ސްޓާ ސްޕޯޓްސް ކްލަބުން އިންތިޒާމްކޮށްގެން އެ ރަށުގެ ޒުވާނުންނަށް ހާއްސަކޮށްގެން ބޭއްވި ނިއު ސްޓާ ކަޕް ފުޓްސަލް މުބާރާތުގެ ޗެމްޕިއަންކަން ބިއާންކޯ އެފްސީ ހޯދައިފި އެވެ.
އެ ޓީމު ޗެމްޕިއަންކަން ހޯދީ ހުކުމްކާލާ އަތުން 3-1 އިން މޮޅުވެގެންނެވެ. މުބާރާތުގެ މޮޅު ކުޅުންތެރިއާ އަދި އެންމެ ގިނަ ލަނޑު ޖެހި ކުޅުންތެރިއާގެ މަގާމް ހޯދީ ހުކުމްކާލާގެ އަބްދުﷲ ޝައްފާން އެވެ. މުބާރާތުގެ ޑްރީމް ޓީމުގައި ހިމެނެނީ ބިއާންކޯގެ އަހުމަދު ޖައިލަމް، ސްޓްރައިކާސް އެފްސީ ޓީމްގެ އަޔާޒް އަހުމަދު، ޓީމް އަރޭނާގެ އަލީ ހާފިޒު، ހުކުމްކާލާގެ އަބްދުﷲ ޝައްފާން އަދި އިބްރާހީމް ޖިނާން އެވެ. މުބާރާތުގެ 19 އަހަރުން ދަށުގެ އެންމެ މޮޅު ކުޅުންތެރިއަކަށް ހޮވިފައިވަނީ ބިއާންކޯ އަހުމަދު ޝާވިން ޝިހާމް އެވެ. އަދި 35 އަހަރުން މަތީގެ އެންމެ މޮޅު ކުޅުންތެރިއަކަށް ހޮވިފައިވަނީ ސްޓެލްކޯގެ އަހުމަދު ޝަކީބެވެ.
ނިއު ސްޓާ އިން ބުނި ގޮތުގައި މުބާރާތުގެ މަގުސަދަކީ މާފުށީގައި ދިރިއުޅޭ ރައްޔިތުންގެ މެދުގައި އެކުވެރިކަށް އާލާކުރުމާއި ސަރުކާރު މުއައްސަސާތަކާއި އާންމު މުއައްސަސާތަކާއި އަދި ކ. މާފުށީ ކައިރީގައި ހުރި ރިސޯޓުތަކުގެ މެދުގައި އެކުވެރިކަން ބަދަހިކުރުމެވެ. އަދި ކުޅިވަރުގެ ތެރެއިން މާފުށީ ރައްޔިތުން ދުޅަހެޔޮ ސިއްހަތެއްގައި ތިބުމަށް ހޭލުންތެރިކުރުވުމާއި މާފުށީގައި ފުޓްސަލް ކުރިއެރުވުމަކީ ވެސް މުބާރާތުގެ ބޭނުމެއް ކަމަށް އެ ކްލަބުން ބުނެ އެވެ. މީގެ އިތުރުން ޒުވާނުންނަށް މިފަދަ ހަރަކާތްތަކެއް ހިންގައިފިނަމަ، އެއީ ރަށުގައި އަމާން އޮމާން މުޖުތަމައެއް ބިނާކުރުމަށް މަގުފަހިވެގެންދާނެ ކަމެއް ކަމަށް ވެސް އެ ކްލަބުން ދެކެ އެވެ.
މާފުށީ ނިއު ސްޓާ އިން ވަނީ މީގެ އަހަރުތަކެއްކުރިން އެފްއޭ ކަޕް ފުޓްބޯޅަ މުބާރާތުގައި ދިވެހި ފުޓްބޯޅައިގެ ވަރުގަދަ ބާރު ނިއު ރޭޑިއަންޓާ ވާދަކޮށް ރަނގަޅު ފައިޓެއް ދީފަ އެވެ. މާފުށީގައި ގެސްޓް ހައުސް ވިޔަފާރި ފުޅާވެ އެ ދާއިރާގެ މައި ހަބަކަށް ބަދަލުވެފައިވީ ނަމަވެސް ކުޅިވަރުގެ ފޯރި އަދިވެސް ގަދަ އެވެ. އެގޮތުން އެ ރަށު ސްކޫލުން އަންނަނީ ހޭންޑްބޯޅައިގައި ވެސް ވާދަކުރަމުންނެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
މާފުށީ ކުއްޖެއް
11 December 2017
މިރަށު ސްކޫލުން ވޮލީގަ ވެސް ވާދަ ކުރޭ