ފޮރެކްސް ބިލް: ޑޮލަރު މާރު ކުރުމުގައި ދެ އިހްތިޔާރެއް ދެނީ

ޓޫރިޒަމް ދާއިރާއަށް ވަންނަ ޑޮލަރު ރާއްޖޭގެ ބޭންކްތައް މެދުވެރިކޮށް މާރު ކުރުމުގައި ދެ އިހްތިޔާރެއް ލިބޭ ގޮތަށް ސަރުކާރުގެ ފަރާތުން ފޮރެކްސް ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.

މަޖިލީހަށް އެ ބިލް ހުށަހެޅުއްވީ އިނގުރައިދޫ ދާއިރާގެ މެންބަރު އިބްރާހިމް ފަލާހެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތައްޔާރުކުރި އެ ބިލްގައި އާންމުންގެ ހިޔާލު ހޯދުމަށްފަހު ބިލް ހުށަހެޅީ ބައެއް ކަންކަން ބަދަލުކޮށްފަ އެވެ.

އެ ބިލްގައިވާ ގޮތުން ބޭރު ފައިސާގެ އާމްދަނީ ބޭންކް އެކައުންޓަކަށް ޖަމާކުރަންޖެހޭ ފަރާތްތަކުގެ ތެރޭގައި ހިމެނެނީ ޓޫރިޒަމް ދާއިރާގެ ވިޔަފާރިތަކުގެ އިތުރުން މަދުވެގެން 15 މިލިއަން ޑޮލަރު އާމްދަނީ ލިބޭ ފަރާތްތަކަށެވެ.

އެ ބިލްގައިވާ ގޮތުން ބޭރު ފައިސާ އިން ލިބޭ އާމްދަނީން ބައެއް މާރުކުރުމުގައި "ކެޓެގަރީ އޭ" ގައި ހިމެނޭ ރިސޯޓްތަކަށް ލިބޭ އިހްތިޔާރަކީ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރުން ނުވަތަ ކޮންމެ މަހެއްގެ ޖުމްލަ އާމްދަނީގެ 20 ޕަސެންޓް ޑޮލަރު މާރު ކުރުމެވެ.

މަނީ އެކްސްޗޭންޖެއްގައި ބަޔަކު މަޑުކޮށްލައިގެން -- ފޮޓޯ: ފަޔާޒް މޫސާ / މިހާރު

މީގެ އިތުރުން "ކެޓެގަރީ ބީ" ގެ ދަށުން ގެސްޓްހައުސްތަކުން، ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 ޕަސެންޓު މާރުކުރަން ޖެހޭނެ ކަމަށް ބިލްގައިވެ އެވެ.

ކުރިން އެ ބިލް އާންމުންގެ ހިޔާލަށް ހުޅުވާލިއިރު އޮތީ ޓޫރިޒަމް ދާއިރާގައި ނުހިމެނޭ ފަރާތްތަކުން ވެސް، އަހަރެއްގެ ތެރޭގައި 20 މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ނަމަ އާމްދަނީގެ 25 ޕަސެންޓަށް ވުރެ މަދު ނޫން އަދަދެއް ރާއްޖޭގެ ބޭންކު އެކައުންޓަކަށް ޖަމާކުރަންޖެހޭ ގޮތަށެވެ.

އެމްއެމްއޭ އިން ބުނީ އެ ބިލް މަޖިލީހަށް ހުށަހެޅިއިރު އެ އަދަދު 15 މިލިއަން ޑޮލަރަށް ދަށްކުރީ ގިނަ ކުންފުނިތަކުން ޑޮލަރު މާރު ކުރެވޭނެ ގޮތް ހަމަޖެއްސުމަށް ކަމަށެވެ. ޑޮލަރު މާރުކުރުމުގައި ދެ އިހްތިޔާރެއް ދީފައި އޮތް ނަމަވެސް ގަވާއިދެއްގެ ތެރެއިން އެ ކުންފުންޏަކުން ބޭނުންވާ ގޮތަކަށް އަމަލު ކުރުމުގެ ދޭނެ ކަމަށާއި އެކަން ކުރާނެ ގޮތްތައް އެކުލަވާލާނެ ކަމަށް އެމްއެމްއޭ އިން ބުންޏެވެ.

އެމްއެމްއޭ އިން ކުރިން ލަފާކޮށްފައިވަނީ ޑޮލަރު މާރުކުރުން ލާޒިމްވާ ގޮތަށް ހެދުމުން 750 މިލިއަން ޑޮލަރު (11 ބިލިއަން ރުފިޔާ) އަހަރެއްގެ ތެރޭގައި ލިބޭނެ ކަމަށެވެ. ގަވައިދަށް އަލަށް ގެނައި ބަދަލުން ވެސް އެވަރުގެ އަދަދެއް އަހަރެއްގެ ތެރޭގައި ރާއްޖޭގެ ބޭންކިން ނިޒާމަށް ވަންނާނެ ކަމަށް އެމްއެމްއޭއިން ލަފާކުރެ އެވެ.

ވިޔަފާރިތަކުން ޑޮލަރު މާރުކުރަންޖެހޭ ގޮތަށް ބިލެއް މަޖިލީހަށް ވެއްދިއިރު، މިދިޔަ އޮކްޓޫބަރު މަހު އެމްއެމްއޭ އިން ވަނީ އެކަމާ ގުޅޭ ގަވައިދެއްގެ ދަށުން، ޑޮލަރު މާރުކުރަން ލާޒިމްވާ ގޮތަށް ހަމަޖައްސައިފަ އެވެ. އެ ގަވާއިދުގެ ދަށުން އަންނަ މަހުގެ ފަހުކޮޅުން ފެށިގެން ޓޫރިޒަމް ދާއިރާއިން ބޭންކް މެދުވެރިކޮށް ޑޮލަރު މާރުކުރަން ޖެހޭނެ އެވެ. އަންނަ މަހު މާރުކުރަނީ އޮކްޓޫބަރު މަހު އެ ރިސޯޓަކަށް ނުވަތަ ގެސްޓްހައުސްއަކަށް އައި ޓޫރިސްޓުންގެ ބޮލަކަށް ޖެހޭ އަދަދެކެވެ.

އެމްއެމްއޭއިން ބޭންކްތަކަށް ވަންނަ ޑޮލަރު އިތުރު ކުރުމުގެ މަސައްކަތް ފެށިއިރު މިދިޔަ އޮކްޓޫބަރު މަހު ޔޫޒަބަލް ރިޒާވް ވަނީ ގާތްގަނޑަކަށް 30 މިލިއަން ޑޮލަރަށް ދަށަށް ގޮސްފަ އެވެ. އެއީ ރާއްޖޭގެ ފަހުގެ ތާރީހެއްގައި ރިޒާވް އެންމެ ބޮޑަށް ދަށަށް ދިޔަ މަހެވެ.