ޕުޝްޕާ 2 ގައި އޭލިސްޓުގެ ބޮލީވުޑް ތަރިއެއް ފެންނާނެ

ގިނަ ބައެއްގެ މަގްބޫލުކަން ލިބުނު "ޕުޝްޕާ" ގެ ދެވަނަ ފިލްމު އުފެއްދުމުގެ މަސައްކަތް މިހާރު ކުރަމުން އަންނައިރު އެ ފިލްމުގައި އޭ ލިސްޓުގެ ބޮލީވުޑްގެ ތަރިއަކު ފެންނާނެ ކަމަށް މީޑިއާ ރިޕޯޓްތައް ބުނެފި އެވެ.

ޕުޝްޕާގެ ފުރަތަމަ ބަޔަށް ވުރެ ދެ ގުނަ ބޮޑު ބަޖެޓެއްގައި ފިލްމުގެ ދެވަނަ ބައި އުފައްދުމުގެ މަސައްކަތްކުރަމުން އަންނައިރު ފިލްމަށް ކުރާ އުއްމީދު ބޮޑެވެ. ފުރަތަމަ ފިލްމަށް ވުރެ ދެވަނަ ފިލްމު ވަރުގަދަ ކުރުމަށް ކުރެވެން ހުރި ހުރިހާ މަސައްކަތެއް ފިލްމުގެ ޕްރޮޑަކްޝަން ޓީމުން އަންނަނީ ކުރަމުންނެވެ.

ކުރިން އަޑު އެރި ގޮތުގައި ފިލްމުގައި ބޮލީވުޑްގެ ތަރި އަރްޖުން ކަޕޫރު ފެންނަނެ އެވެ. އެކަމަކު އެކަން އެ ޕްރޮޑަކްޝަން ޓީމުން ދޮގުކޮށްފައިވަނިކޮށް މިހާރު ރިޕޯޓްތައް ބުނާ ގޮތުގައި ފިލްމުގައި ބޮލީވުޑުގައި އެންމެ ނަން ވިދާ އަދި އެންމެ ބޮޑު އާމްދަނީއެއް ލިބެމުން އަންނަ ތަރިންގެ ތެރެއިން މީހަކު ހިމެނޭނެ އެވެ.

އެކަމަކު އެއީ ކޮން ތަރިއެއް ކަމެއް އަދި ނޭނގެ އެވެ.

ރިޕޯޓްތައް ބުނާ ގޮތުގައި އެ ފިލްމުގައި އެ ތަރި ފެންނާނީ ތެލޫގޫ، ސިޔާސީ އެކްޝަން ފިލްމެއް ކަމަށްވާ، "ގޮޑް ފާދާ" ގައި ސަލްމާން ޚާން ފެނުނު ކަހަލަ ގޮތަކަށް ތަންކޮޅެއް ބޮޑު ކަމިއޯ ރޯލަކުންނެވެ. އެކަމަކު އެއީ ސަލްމާން ކަމެއް ނުވަތަ އެހެން ތަރިއެއް ކަމެއް އަދި އިއުލާނެއް ނުކުރެ އެވެ.

ފިލްމުގެ ލީޑު ރޯލުގައި ފެންނާނީ ކުރިން ފިލްމުގައި ފެނުނު، އައްލޫ އަރްޖުން އާއި ރަޝްމިކާ މަންދަންނާ އެވެ. އެ ފިލްމުގެ ޝޫޓިންތައް މި ފެށޭ މަހު ފަށަން ނިންމާފައިވާއިރު އަންނަ އަހަރު ފިލްމު ރިލީޒްކުރާނެ ކަމަށް އައްލޫ ބުނެ އެވެ.