ފާހަގަ

ބުދަ ދުވަހާ ގުޅޭ

އަހަރެން އެ އަޑެއް އަހާނެހެއްޔެވެ؟ އެތައްމިތަނުން އެއްޗެހި އެއްކޮށްގެން "ލުސިޑް ޑްރީމް" އާއި "ޑްރީމް ވޯކިންގް" ދަސްކުރަން ފެށީމެވެ. ކިއިކިއިހެން އަހަންނަށް އެނގުނު އެކައްޗަކީ ކަމުގެ އުނދަގޫކަމާއި، ނުރައްކާތެރިކަމެވެ. ހަމަ އެހެންމެ، ދަސްކުރަން ކިހައި އުނދަގޫކަމެވެ. ބައެއް މީހުންނަށް އެ ކަން ދަސްނުވާނެކަމަށް ވެސް ލިޔެފައިހުއްޓެވެ. ކެތްތެރިކަން ނިހާޔަތަށް ބޭނުންވާނެކަމާއި، ދަސްކުރަން ވަރަށް ވަގުތުނަގާނެކަމަށް ތަކުރާރުކޮށް ބުނެފައި ހުއްޓެވެ. އެހެނަސް، އަހަރެން ހުރީ ކެތްމަދުވެފައެވެ. ތަފުސީލުކޮށް ކިޔަން ބުނެފައިހުރި އެތައް ބާބެއް ނުކިޔައި ދޫކޮށްލީމެވެ. ކިތަންމެ އިންޒާރަކާއި ނަސޭހަތެއްދީފައި ހުއްޓަސް، އަމިއްލައަށް ތަޖުރިބާނުކުރެވޭހައި ހިނދަކު، ކަމުގެ ސީރިޔަސްކަމެއް ނުވިސްނޭނެއެވެ. އަހަންނަށް ވެސް ވީ އެހެންނެވެ. ރޭހުގެ ނިންމާ ރިބަންފަށް މާ ކުރިން ފެންނަހެން، އަހަންނަށް ފެނުނީ، އެ ކަން ދަސްވުމުން އަހަރެން ކުރާނެ ކަންތައްތަކެވެ. އަހަރެންގެ ނިޔަތް ހައިފާއަށް ނުވިސްނުނީއެވެ. ސަލްވާ އާނއެކޭ ބުންޏަސް ނުބުންޏަސް، އަހަންނެއް ސަލްވާ ދުލެއް ނުކުރާނަމެވެ. ސަލްވާއަށް ޓަކައި މާ ގިނަ ގުރުބާނީވެވިއްޖެއެވެ. އޭނަ ދެކެ މާ ބޮޑަށް އަހަންނަށް ލޯބިވެވިއްޖެއެވެ. ދެނެއް ސަލްވާއާ ނުލައެއް އަހަންނަކަށް ނޫޅެވޭނެއެވެ.

ލޯތްބަކީ ހާދަހައި އެހެން ކަހަލަ އެއްޗެކެވެ. އަނެއްކާގެ އެއްވެސް ރުހުމަކާ ނުލައި ލޯބިވެވެނީ ކީއްވެގެންހެއްޔެވެ؟ އެ ލޯބީގައި މީހަކަށް ޓަކައި މަރުދަންޖެހޭ ހިސާބަށްދަނީ ކީއްވެެގެންހެއްޔެވެ؟ އޭގެ ޖަވާބު އަހަރެން ހޯދީމެވެ. ލޯތްބަކީ އެހެން މީހެއްގެ ރުހުން ބޭނުންވާ އެއްޗެއް ނޫނެވެ. ހުއްދައަށް އިންތިޒާރުކުރާ އެއްޗެއް ވެސް ނޫނެވެ. އަމިއްލަ އިހުތިޔާރު އޮންނަ އެއްޗެއް ވެސް ނޫނެވެ. ވަގުތުޖެހުނީމައި ލޯބިވެވޭނެއެވެ. އިހުތިޔާރުގައި އޮންނާނީ ދެން އެ މީހަކު ކުރާ ކަންތަކެވެ.

ލޯބިވާ ވާހަކަ ބުނަން ނުކެރެނީ ފިނޑިވީމައެވެ. އެއްބަޔަކު ބުނާނީ އެހެންނެވެ. އަހަރެން ވިސްނަނީ އެހެން ގޮތަކަށެވެ. އެކި މީހުން ލޯބިހުށައަޅާނީ އެކި ގޮތަށެވެ. ލޯބިދޭނީ ވެސް އެކި ގޮތަށެވެ. ކޮންމެ މީހަކީ ތަފާތު މީހެކެވެ. ހިނގާގޮތާއި، ހިނިތުންވާގޮތާއި، ރުޅިއަންނަ ސަބަބު ވެސް، ދެމީހެއްގެ އެއްގޮތް ނުވެދާނެއެވެ. ފިނޑިކަމާއި އެ ކަމާ ގުޅުމެއް ނެތެވެ. ފިނޑިމީހަކު ހުވަފެން ކޮންޓުރޯލުކުރަން ދަސްކުރާކަށް ކުރިމައްޗެއް ނުލާނެއެވެ.

ހައިފާގެ ފަރާތުން އަހަންނަށް ތަފާތު މިޒާޖެއް ފެންނަން ފެށިއެވެ. ހީވަނީ އަހަންނާ ހަތަރުކަޅި ހަމަކުރަން ހައިފާއަށް އުނދަގޫވެގެން އުޅޭހެންނެވެ. ނޫނީ އެއީ އަހަރެންގެ ވަރުގަދަ ޝައްކެއްހެއްޔެވެ؟ އަހަރެން ފެންނަ ކޮންމެ ފަހަރަކު ބޭބޭއޭ ކިޔައިފައި ގޮވައިލާ މީހަކު، ހަނުހުންނަން ފެށުމަކީ ކޮން ކަހަލަ އަލާމާތެއްހެއްޔެވެ؟ އެތައް ފަހަރަކު އަހަރެން އަހައިފީމެވެ. ކިހިނެއްވީހެއްޔެވެ؟ ފާޑަކަށް ތި ހުންނަނީ ކީއްވެގެންހެއްޔެވެ؟ ހައިފާގެ އަބަދުވެސް ދެނީ އެއް ޖަވާބެކެވެ. ކަމެއްނުވެއެވެ. އިތުރަށް އެ ވާހަކަދެއްކުމަށްވުރެ ބޮޑަށް އަހަންނަށް އިސްކަންދެވުނީ އަހަރެންގެ މަގުސަދު ހާސިލުކުރާށެވެ.

އަހަރެންގެ މަސައްކަތަށް ފަހިވާ ގޮތަށް ނިދާކޮޓަރީގެ އިންތިޒާމު ބަދަލުކޮށްލީމެވެ. ލުސިޑްޑްރީމް ފެންނަނީ، ނިދީގެ ހަތަރުވަނަ މަރުހަލާގައެވެ. އެއީ ރެމް ސްލީޕްއެވެ. ނިދީގެ އެންމެ ފަހު މަރުހަލާއެވެ. އެ ހިސާބަށް ދެވުމުން، ނިދީގައި ދެއަތަށް ކަޅިހޫރުވެއެވެ. އޭރު ތަނުގެ ފިނިމިން ހުންނަންޖެހެނީ އަށާރަ ވަރަކަށް ޑިގުރީގައެވެ. އަހަރެން އާންމުކޮށް އޭސީ ބަހައްޓަނީ ސައުވީހުގައެވެ. ވީމާ، އަށާރައަކީ އަހަންނަށް ވަރަށް ފިންޏެވެ. ކޮޓަރި އަނދިރިވާންޖެހެއެވެ. ހަމަހިމޭންވާންޖެހެއެވެ. މާލޭގައި ހަމަހިމޭން ވަގުތެއް އާދޭހެއްޔެވެ؟ ވީމާ، ފާރުގައި ވަކި އެއްޗެއް ތަތްކޮށްގެން، އަޑުވަނުން ހުއްޓުވީމެވެ. އެއްގޮތަކަށް ވެސް އަލިނުވަންނަ ކަހަލަ ދޮރުފޮތި ދެމީމެވެ. އެ ވަރަކުން ވެސް ނުފުދެއެވެ. އަލިން ލޮލަށް އުނދަގޫވިޔަ ނުދިނުމަށް ޓަކައި، ލޯމަތީގައި އަޅާ މާސްކު ވެސް އަޅަންޖެހެއެވެ. ކަންފަތަށް "ކަފަ" ޖަހަންޖެހެއެވެ. ބޭކާރު އެންމެ އަޑަކުން ވެސް ހުވަފެން ވިއްސިވިހާލިވެގެން ހޭލެވިދާނެތީއެވެ. މީހަކަށް ހީވެދާނެއެވެ. ކުރަން މި ޖެހެނީ ހާދަހާ އުނދަގޫ ކަންތައްތަކެކެވެ. ނޫނެކެވެ. އެއީ އޭގެ އެންމެ ފަސޭހަ ބައެވެ.

އަހަންނަށް އެންމެ އުނދަގޫވީ ހުވަފެނާއި ހަގީގަތް ވަކިކުރަން ދަސްކުރާށެވެ. އެއީ އެންމެ މުހިންމު ކަންތަކެވެ. ހުވަފެނާއި ހަގީގަތް އޮޅިއްޖެ ނަމަ، ކޮންމެ ފަދަ ކަމެއް ވެސް ކުރެވިދާނެތީއެވެ. ހުވަފެނުގައި ފެންނަ މަންޒަރު ހަގީގަތެއްހެން ހީވިޔަސް، ތަފާތު ހުރެއެވެ. ވީމާ، ހިތާހިތުން އަހަރެން އެއް ސުވާލެއް ތަކުރާރުކުރަންޖެހެއެވެ. މީ ހުވަފެނެއްހެއްޔެވެ؟ މީ ހުވަފެނެއްހެއްޔެވެ؟ އެ ވަރަކުން ވެސް ނުފުދެއެވެ. ނޭފަތާއި އަނގަމަތީގައި އަތްއަޅައިގެންހުރެ ނޭވާލެވޭތޯ ބަލަންޖެހެއެވެ. ހުވަފެނެއްގައި ނަމަ، ނޭފަތާއި އަނގަ ބަންދުކުރިޔަސް ނޭވާލެވެއެވެ. އަތްފައިގެ އިނގިލިތަކުގައި، ކުދިކުދި އައިބު ހުރެއެވެ. ފޮތެއް ހުޅުވައިގެން ބަލައިފި ނަމަ، ލިޔެފައިހުންނަ އެއްޗެއް އެކި ފަހަރު ފެންނަނީ އެކި ގޮތަށެވެ. ޖުމުލަތައް ހަމައެއް ވެސް ނުޖެހެއެވެ. ޝަހާދަތް އިނގިލި އަނެއް އަތްތިލައިގެ ތެރެއަށް ވަދޭތޯބެލުމަކީ ވެސް ހަދަންޖެހޭ ޓެސްޓެކެވެ. ހުވަފެނުގައި ވަންނާނެއެވެ. ހަގީގަތުގައި ޔަގީނުން ވެސް ނުވަންނާނެއެވެ. ހުވަފެނުގައި އެއްވެސް ކަމެއް ކުރުމުގެ ކުރިން، އެއީ ހުވަފެނެއްކަން ސަތޭކަ ޕަސަންޓު ކަށަވަރުކުރަންޖެހެއެވެ.

އަހަރެން މުޅި ދުވަހު އުޅެނީ އެ ކަމެއް ދަސްކުރުމުގައެވެ. ފަސޭހަކަމެއް ނޫނެވެ. އެއަށްވުރެ މާ އުނދަގޫކަމެއް ވެސް ކުރިމަތިވާން ފެށިއެވެ. ސަލްވާ އަހަންނަށް ހިނިތުންވާން ފެށިއެވެ. އަހަންނަކީ ޝައްކުބަލި ބޮޑު މީހެކޭ ބުންޏަސް ކުރާނެކަމެއް ނެތެވެ. އެ ހިނިތުންވުމުން އަހަންނަށް މާނަކުރެވުނީ ލޯތްބެއް ނޫނެވެ. އެކުވެރިކަމެއް ވެސް ނޫނެވެ. ހަމުދަރުދީއެވެ. އޯގާވެރިކަމެވެ. އެއީ ކީއްވެގެންހެއްޔެވެ؟ ކުއްލިއަކަށް ސަލްވާ އެހައި އޯގާވެރިވާންވީ ކީއްވެގެންހެއްޔެވެ؟ ހައިފާ ގާތުގައި އެ ވާހަކަ ބުނީމެވެ. ސަލްވާއަށް މި އައީ ކޮން ބަދަލެއްހެއްޔެވެ؟ ކުއްލިއަކަށް ސަލްވާއަށް އަހަރެން ފެންނަން ފަށައިފިއެވެ.

"ރިއަލީ؟" ހައިފާ ބުނެލީ އެހެންނެވެ. "ހާދަ ހެއްވައޭ ދޯ؟ ވެދާނެއްނު ބޭބެޔާ އޭނަ ލައިކުވާން ފެށީކަމަށް."

އެހެން ވެދާނެއެވެ. އެހެން ގޮތެއް ވެސް ވެދާނެއެވެ. އެކަމަކު، ދެވަނަ ސުވާލެއް އަހަރެން ކުރުމުގެ ކުރިން ހައިފާ މައުލޫ ބަދަލުކޮށްލިއެވެ. އެ ކަމާ ވެސް އަހަރެން ވަރަށް ހައިރާންވިއެވެ.

"ހައިފާ އޭނަޔާ ވާހަކަދެއްކިންތަ؟" އަހަރެން އެ ސުވާލުކުރީމެވެ.

"މަ ފުރަތަމަ ކިހިނެއް އޭނަގެ ނަންބަރު ވެސް ހޯދަނީ؟" ހައިފާ ވެސް ކުރީ ސުވާލެކެވެ.

ހައިފާ ނޫނެކޭ ނުބުނުމުން، ކޮންމެވެސް ކަމެއް ހިނގައިފިކަމަށް ޝައްކުކުރާނެ ޖާގަ އޮތެވެ. އެހެނަސް އަހަރެން ވަގުތު ހުސްކުރީ އެހެން ކަމަކަށެވެ. ކޮންމެ ރެޔަކު ވެސް އަހަރެން ނިދަންޖެހެނީ، ފަސް ގަޑިއިރު ފަހުން ހޭލަން ސޯނާކޮށްފައެވެ. ހޭލައިފައި، އެތައް ފަހަރަކު މިހެން ކިޔަންޖެހެއެވެ.

"ދެން ހުވަފެން ފެންނަ އިރު، އެއީ ހުވަފެނެއްކަން އަހަރެން ހަނދާންހުންނާނެ،" އަހަންނަށް ނިދެންދެން މަޑުމަޑުން ކިޔަމެވެ. "ދެން ހުވަފެން ފެންނަ އިރު، އެއީ ހުވަފެނެއްކަން އަހަރެން ހަނދާންހުންނާނެ."

ހުވަފެނަކުން ހޭލެވިއްޖެއްޔާ އަލުން ނިދަންޖެހެނީ، ބައިގަޑިއިރުން ފެށިގެ ދެ ގަޑިއިރާ ދެމެދު ވަގުތެއްވަންދެން ހޭލައިހުރެފައެވެ. ބޭނުން ނަމަ، ކެވިދާނެ ބޭސް ވެސް ހުރެއެވެ. އަހަރެން ފުރަތަމަ ބެލީ، ބޭސްނުކައި އެ ކަން ދަސްވޭތޯއެވެ. ހުވަފެނެއް ފެނިފައި ހޭލެވުމާއެކު، ފެނުނު ހުރިހައި އެއްޗެއް އަވަހަށް ނޯޓުކޮށްލަންޖެހެއެވެ. ހޭލެވޭ ވަގުތު ގަލަމާއި ކަރުދާސް ބޭނުންކުރަން އުނދަގޫވީމައި އަހަރެންގެ އަޑުން ފޯނަށް ރިކޯޑުކޮށްލަނީއެވެ. ފެންނަ އެއްޗެހި ވީހައި ވެސް ތަފުސީލުކޮށް ކިޔައި ނުވަތަ ލިޔެ ރައްކާކުރުމަކީ، ހުވަފެނެއް ފެންނަ އިރު އެއީ ހުވަފެނެއްކަން ދަނެގަތުމާއި، ވީ ގޮތް ހަނދާންބަހައްޓަން ފަސޭހަވާ ކަމެކެވެ. ހުވަފެން ކޮންޓުރޯލުކުރެވޭނީ ވެސް އޭރުންނެވެ. ހޭލެވޭ އިރު ހުވަފެން ހަނދާން ނުހުންނަކަމުގައިވާ ނަމަ، އެހެން މީހެއްގެ ހުވަފެނެއްގެ ތެރެއަށް ވަނުމުގެ ބޭނުމެއް ނެތެވެ. ފުރަތަމަ ފަށައިގަތް އިރު، ހަނދާންހުންނަނީ ހުވަފެނުގެ ކުޑަ މިންވަރެކެވެ. ބޮޑުބައި ހަނދާންވަނީ ގިނަ އިރު ވިސްނީމައެވެ.

ލުސިޑް ޑްރީމް ދަސްކުރަން ބޭނުންކުރާ މާސްކާއި، ބޮލުގައިއަޅާ ބޭންޑާއި، ނިވިދިއްލޭ އައްޔާއި، އަހަން ބޭނުންކުރާ އެކި ކަހަލަ އަޑުތައް އެމޭޒަންއާއި އީބޭގައި ހުރެއެވެ. ސިކުނޑިއަށް ލުއި ކަރަންޓެއް ފޮނުވައިދޭ ހެލްމެޓު ވެސް ހުރެއެވެ. އެ ފަދަ އެއްޗެހި، ތަޖުރިބާކާރެއްގެ އެހީޔާ ނުލައި ބޭނުންނުކުރަން އިންޒާރުދީފައިހުއްޓައި ވެސް، ދެތިން އެއްޗެއް އަހަރެން ގެނައީމެއެވެ. އަގުހެވެއް ނޫނެވެ. އެހެނަސް، އެ ބޭނުންކުރަން ފެށުމުން ހުވަފެން ކޮންޓުރޯލުކުރަން ދަސްކުރަން ފަސޭހަވިއެވެ. އެކަމަކު އެންމެ ބޮޑު އެހީތެރިކަމެއް ލިބުނީ އަހަރެން ރެކޯޑުކުރި އަޑުތައް އަޑުއަހައިގެންނެވެ. ހުވަފެނެއްކަން ކަށަވަރުކުރަން އަހަންނަށް ފެންނަ އަލާމާތްތައް ހަނދާންބެހެއްޓުމުންނެވެ. އެންމެ އާންމުކަމެއް ގޮތުގައި އަހަންނަށް ފާހަގަކުރެވުނީ އަތުގައި ޖެހި އެސް އަކުރުގެ ފާހަގަ ހުވަފެނުގައި ނުހުރުމެވެ. އިނގިލީގެ ބައެއް ނިޔަފަތި ނުހުރުމެވެ. އަހަރެންގެ ބޮލުގައި އިސްތަށި މަދުވެފައިހުރުމާއި، އަހަރެން ކުޑަކޮށް ބަނޑުލައިފައި ހުރުމެވެ. މެދު ދަތް ވެއްޓިފައިހުރުމާއި، ދުނިޔެއަށް އުފަންވި ގޮތަށް ހުރުމެވެ. އެއްވެސް ހުވަފެނެއްގައި އެ ހުރިހައިކަމެއް ވެފައެއް ނުހުރެއެވެ. ވަނީ ކޮންމެވެސް އެއް ކަމެކެވެ.

ހުވަފެނަކީ ހުވަފެނެއްކަން އެނގޭ އިރަށް އަހަންނަށް ހޭލެވެއެވެ. އެއީ ވަރަށް ބޮޑު މައްސަލައަކަށްވި ކަމެކެވެ. ހުވަފެނެއްކަން އެނގި، ހެއިނުލައި އޮންނަން ދަސްކުރަން ވަރަށް ވަގުތުނެގިއެވެ. ފުރަތަމަ ފަހަރު، ހުވަފެނުގައި އެނދުން ތެދުވެވުނީ ކިރިޔާއެވެ. ހޭލެވުނެވެ. ދެވަނަ ފަހަރު، ކޮޓަރިން ބޭރަށް ނުކުމެވުނެވެ. ގެއިން މަގުމައްޗަށް ނުކުންނަން ހަފުތާތަކެއް ނެގިއެވެ. މަގުމަތި ވަރަށް މަޖަލެވެ. އޮންނަނީ އޭގެ ދިހަ ވަރަކަށް އަހަރު ކުރިން އޮންނަ ގޮތަށެވެ. ގިނައިން ފެންނަނީ އެ ގޮތަށެވެ. އަހަރެން އުޅެނީ ބައިސްކަލުގައި ނުވަތަ ހިނގާފައެވެ. ސައިކަލު ދުއްވަނިިކޮށް ފެންނަނީ ވަރަށް މަދުންނެވެ.

ހުވަފެން އޮޅުކުރަން އެނގުނީ ފޫހިވާހައި ގިނަ ދުވަސް ފަހުންނެވެ. އެހެނަސް ނުހޭލައި އޮތުމާއި ހޭލުމުގެ އިހުތިޔާރު އަހަންނަށް ލިބެން ފެށުމުން ވަރަށް އުފާވިއެވެ. ހަގީގަތެއް ނޫންކަން އެނގޭތީ، އަހަރެންގެ އަމިއްލަ ނަފުސަށް އޮންނަ އިތުބާރު، ހައްދުފަހަނައަޅައިދާހައި ބޮޑެވެ. މޮޔަކަންތައް ވެސް ކުރަމެވެ. ކުރެވިދާނެކަން ގަބޫލުކުރުމަށް ޓަކައެވެ. ކާރަކުން ޑުރައިވަރު ފައިބާ ތަން ފެނިއްޖެއްޔާ އެ ކާރަށް އަރައި ދުއްވައިލަމެވެ. ގަސްކަރަ އެކުވާހައި ބާރަށެވެ. ހުޅުމާލޭގެ މަގުތަކުގައި ދުއްވައިފައިދަމުން ކާރު މޫދަށް ވައްޓައިލަމެވެ. ކީއްކުރަންހެއްޔެވެ؟ އަހަރެންގެ ކެރޭކަން އަހަންނަށް ސާބިތުކޮށްދިނުމަށް ޓަކައެވެ. ބިރުކެނޑުވުމަށް ޓަކައެވެ.

އެއްދުވަހަކު ހިތަށްއެރިއެވެ. މިއަދަކީ އަހަރެން ސަލްވާއާ ބައްދަލުކުރާ ދުވަހެވެ. އެ ދުވަހު އަހަރެންގެ ސިކުނޑި އަހަންނަށް، ވަރަށް ނުބައި ކެއްސެއްދިނެވެ.

-ނުނިމޭ-