ސައީދު ބުނަނީ އަހަރުގެ އެންމެ ބޮޑު ސްޓާރަކީ އޭނާ ކަމަށް

މި ވާހަކައެއް މާ ގިނަ ބަޔަކު ގަބޫލުނުކޮށްފާނެ އެވެ. އޭގެ އެއް ސަބަބަކީ، އަހުމަދު ސައީދު، އަހުމަދު ސައީދަށްވުމެވެ. އަނެއް ސަބަބަކީ މި ވާހަކައެއް މި ދައްކަނީ ދިވެހި ސިނަމާގެ އެންމެ ވަރުގަދަ "ވިލަން" ކަމުގައިވުމެވެ.

ނަމަވެސް ނެގެޓިވް ރޯލުތަކަށް މަޝްހޫރު މި އެކްޓަރުގެ ދައުވާގައި މިފަހަރު ބަރުދަނެއް އެބަހުއްޓެވެ. ސަބަބަކީ ރާއްޖެ ދުށް އެންމެ މަޝްހޫރު، އެންމެ ހުނަރުވެރި އަދި އެންމެ ރީތި ކަމަށް ވެސް ގިނަ ބަޔަކު ބުނާ އަލީ ސީޒަން އާއި ޔޫސުފް ޝަފީއު ޔޫއްޕެ ވެސް މި އަހަރު ސައީދަށް ވުރެ ފަހަތުން ފެންނާތީ އެވެ.

އަނެއްކޮޅުން ސައީދު މި އަހަރު ބޮޑުއިސްކިރީނަށް އައީވެސް ގުގުރިއެއްގެ އަޑުހާ ބާރުގަދަކޮށް، ވިދުވަރެއްހެން ވިދައި ބަބުޅަމުންނެވެ. ރަވީ ފާރޫގްގެ "ވިޝްކާ" ގައި ދެ ހިތް ހިމެނޭއިރު އޭގެ ތެރެއިން އެއް ހިތަކީ އެ ފިލްމުގައި ހިމެނޭ ސައީދުގެ ޕާފޯމަންސެވެ.

"މި އަހަރު އެންމެ ގިނަ ވާނީ އަޅުގަނޑުގެ ފިލްމުތައް. ސީޒަން އާއި ޔޫއްޕެ އަށް ވުރެން ވެސް ގިނައިން ފެންނާނެ އަހަރެއް މިއީ،" ޝަރަފާއި ފަހުރާއެކުގައި ސައީދު ބުނެލި އެވެ.

އަހަރެއްގެ ތެރޭގައި އެންމެ ގިނަ ފިލްމު ކުޅޭ ތަރިންގެ ރޭހުގައި ސައީދު ކުރިއަށް އަރާފައިވާއިރު މިހާރު ވެސް އޭނާގެ ފިލްމަކަށް އޮލިމްޕަހުން ދަނީ ޓިކެޓް ވިއްކަމުންނެވެ. އެއީ އަންނަ އޯގަސްޓް ދޭއްގައި ރިލީޒްކުރަން ހަމަޖެހިފައިވާ "ނޯޓޯފޯޓީ" އެވެ. މިއީ މިދިޔަ އަހަރު ސައީދު ވެސް މުހިންމު ރޯލަކުން ފެނިގެން ދިޔަ "ބައިވެރިޔާ" ގެ ކާމިޔާބީ އަށް ފަހު އެ ޓީމުން ގެނެސްދޭ ފިލްމެކެވެ.

"ނޯޓީފޯޓީ" މަޝްހޫރުކުރަމުން ދަނީ އަހަރުގެ ބޮޑު ފިލްމުގެ ގޮތުގައިކަން ވެސް ފާހަގަކޮށްލަން ޖެހެ އެވެ. އެހެންވީމަ އަހަރުގެ ބޮޑު އެކްޓަރު ވެސް މި ނިސްބަތް ވަނީ މި ފިލްމުގެ ކާސްޓަށެވެ.

"ނޯޓީފޯޓީ" އަށް ފަހު ސައީދު މި އަހަރު ދެން ފެނިގެންދާނީ މަހުދީ އަހުމަދުގެ ސްކްރިޕްޓަކަށް މާއެނބޫ ޑައިރެކްޓްކޮށްގެން ގެނެސްދޭ "ނޭދެން ވަކިވާކަށް" ނަމަކަށް ކިޔާ ފިލްމަކުންނެވެ. މި ފިލްމުގައި އޭނާ ފެނިގެންދާނީ އޭނާގެ އެންމެ ޝާހީ ނެގެޓިވް ރޯލަކުންނެވެ.

ސައީދު ބުނީ އޭނާގެ މި ކާމިޔާބީގެ ސިއްރަކީ އެންމެނާ އެކުގައި މަސައްކަތްކުރެވޭ ފެންވަރުގެ ޑިސިޕްލިންއެއް ކުރިއަށް ނެރުމެވެ.

"ކޮންމެ މީހަކު ހަދާ ފިލްމެއް ވެސް އަޅުގަނޑު ކުޅޭނެން. އެކަމަކު ވަކި ބަޔަކު އެބައުޅޭ ވަކި ބަޔަކު ހަދާ ފިލްމުތައް ނުކުޅޭނެ ބަޔަކު ވެސް،" ފިލްމީ ދާއިރާގައި ވިހި ވަނަ އަހަރު ފާހަގަކުރަން ތައްޔާރުވަމުން އަންނަ ސައީދު ބުންޏެވެ.

ސައީދު ފިލްމީ ދާއިރާ އަށް ވަނީ 300ރ. ގެ ރޯލަކުންނެވެ. އެއީ 1997 ވަނަ އަހަރު ޓީވީއެމުން އުފެއްދި ލަވައެއްގައި "އެކްސްޓްރާއެއް" ގެ ރޯލެވެ.

"އޭރުގެ އެންމެ މަޝްހޫރު އެއް ދެ ތަރިން ކަމުގައިވާ ޖަމްބު ހަސަން އަފީފާއި މަރިޔަމް ނިޝާ ލީޑް ރޯލު ކުޅުނު އެ ލަވައިން އަޅުގަނޑަށް ކުޅެލަން ލިބުނީ ކުޑަކުޑަރޯލެއް. މިސާލަކަށް ލަވައިގެ ދިގު މިނަކީ ފަސް މިނެޓް ކަމުގައިވާ ނަމަ މިނެޓަކާއި ބައިން އަޅުގަނޑު ފެންނާނީ،" ސައީދު ބުންޏެވެ.

"އަޅުގަނޑު މި ދާއިރާ އަށް ނުކުތްއިރު ކޮންމެ މީހަކު ވެސް ބޭނުންވަނީ ލީޑްރޯލު ކުޅެން. އެއްވެސް މީހަކު ބޭނުމެއް ނުވޭ އާދައިގެ ކުދި ރޯލުތަކެއް،"

ސައީދު އެންމެފަހުން ތަރިއަށް ބަދަލުކޮށްލީ ވެސް ކުޑަކުޑަ ރޯލެއް ކަމަށް ބުނެ މަޝްހޫރު ތަރިންތަކެއް ދޫކޮށްލި ރޯލެކެވެ. އެއީ ރާއްޖެ އަށް މަޝްހޫރުވި ދިވެހި ޑްރާމާ "ތީއޭ މިހިތުގެ ވިންދަކީ" ގައި ކުޅުނު ސަޕޯޓިން ރޯލެވެ.

އެކަމަކު ސައީދަކީ އަބަދުވެސް، މިހާރު ވެސް ދިވެހި ސިނަމާގެ "އެންމެ ނުބައި މީހާ" އެވެ. އެކްޓަރެއްގެ ގޮތުގައި އޭނާ އެއްގޮތަކަށް ވެސް ގޯހީކީއެއް ނޫނެވެ. ސުޕަވިލަން އަކީ އޭނާ ކަމަށްވުމެވެ.