ޑައިރެކްޓަރު ބްރަޔަން ސިންގާގެ ރިހޭ ފައިމައްޗަށް ފޮއި

"ބޮހެމިއަން ރަޕްސޮޑީ" ގެ މަސައްކަތް ނިންމަން ސެޓަށް ހާޒިރު ނުވެގެން ޑައިރެކްޓަރު ބްރަޔަން ސިންގާ ފިލްމުން ވަކިކޮށްފައި ވަނިކޮށް، އޭނާ އަށް އަނެއްކާ ވެސް އިތުރު އެހެން މައްސަލައަކާ ކުރިމަތިލާން ޖެހިއްޖެ އެވެ.

މީގެ ކުރިން ވެސް އޭނާގެ މައްޗަށް ޖިންސީ ގޯނާގެ މައްސަލަތަކެއް ފެންމަތިވެފައިވާތީ ސަދަން ކެލިފޯނިއާ ޔުނިވަސިޓީގެ ސްކޫލް ޑިވިޝަން އޮފް ސިނެމާ އެންޑް މީޑިއާ ސްޓަޑީޒުން ބްރަޔަން، 52، ވަކިކޮށް ދޭން ދަރިވަރުންތަކެއް ޑިމާންޑްކޮށްފައިވާ ދަނޑިވަޅެއްގައި އެއަށް ބާރު ލިބޭ އިތުރު މިފަދަ މައްސަލައެއް މިހާރު ވަނީ ފެންމަތިވެފަ އެވެ.

"އެކްސް މެން" ފަދަ ފިލްމްތައް ގެނެސް ދީފައިވާ ޑައިރެކްޓަރާ ދެކޮޅަށް މިހާރު ވަނީ ރޭޕްގެ މައްސަލައެއް ކޯޓަށް ހުށަހަޅައިފަ އެވެ. އެ މައްސަލައަކީ 2003 ވަނަ އަހަރު 17 އަހަރުގެ ފިރިހެން ކުއްޖަކަށް ޖިންސީ ގޯނާ ކުރި ކަމަށް ބުނާ މައްސަލައެކެވެ.

ކޯޓަށް ހުށަހަޅާފައިވާ އެ މައްސަލައިގެ ލިޔެކިޔުންތައް ބައެއް ނޫސްތަކުގައި ޝާއިއު ވެސް ކޮށްފައިވާ އިރު، އޭގައި ބުނަނީ ޔޮޓެއްގެ ތެރޭގައި ސީޒާ ސަންޗޭޒް-ގަޒްމަން ކިޔާ 17 އަހަރުގެ ކުއްޖަކާ ބްރަޔަން 2003 ގައި ގަދަކަމުން ބެހިފައިވާ ކަމަށެވެ. އަދި އެ ވާހަކަ އެއްވެސް މީހެއް ގާތު ނުދެއްކުމަށް އެދިފައިވާ ކަމަށާއި އެކަން ސިއްރުކޮށް ދޭ މަތިން ސީޒާ އަށް އެކްޓިން ކެރިއާއެއް ފަށައިދޭން އެހީތެރި ވެދޭނެ ކަމަށް ވެސް ބުނެފައިވާ ކަމަށްވެ އެވެ.

މީގެ އިތުރުން އެ ވާހަކަ އެއްވެސް މީހަކާ ހިއްސާ ކުރިޔަސް އެކަން އެއްވެސް މީހަކު ގަބޫލު ވެސް ނުކުރާނެ ކަމަށާއި އޭނާއަކީ ނުފޫޒު ގަދަ ޕްރޮޑިއުސަރެއް ކަމަށް ބުނެ ސީޒާ އަށް ބްރަޔަން ބިރު ވެސް ދައްކާފައިވާ ކަމަށް ވެސް ކޯޓަށް ހުށަހެޅި ލިޔުންތަކުގައި ބުނެފައިވެ އެވެ.

މި މައްސަލައާ ގުޅިގެން ބްރަޔަންގެ ފަރާތުން ނެރުނު ބަޔާނެއްގައި ވަނީ އޭނާގެ މައްޗަށް ދައުވާ ކުރަނީ ހަގީގަތެއް ނެތް މައްސަލައެއްގައި ކަމަށް ބުނެފަ އެވެ. އަދި ދިފާއުގައި ނުކުންނާނެ ކަަމާއި އޭނާގެ ކުށެއް ނެތްކަން ކޯޓްގައި ސާބިތުކޮށް ދޭނެ ކަމަށް ވެސް ބަޔާނުގައި ބުންޏެވެ.

ބަޔާނުގައި ފާހަގަކޮށްވާ ގޮތުގައި ސީޒާގެ ފަރާތުން މި މައްސަލާގައި ކޯޓްގައި ބްރަޔަންއާ ވަކާލާތު ކުރަނީ މީގެ ކުރިން ވެސް އޭނާގެ މައްޗަށް ކުރި އަސްލެއް ނެތް ދައުވާއެއްގައި ނުކުތް ވަކީލް ޖެފްރީ ހާމަން އެވެ.