އާ ތަރިން މަދީ ސީނިއަ ތަރިންގެ ސަބަބުންތަ؟

ފިލްމީ ދާއިރާއަށް ޒުވާނުން ނުނިކުންނަ ވާހަކަ އާއި އަލަށް ނުކުންނަ މީހުންނަށް ލިބޭ ފުރުސަތުތައް މަދު ކަމުގެ ޝަކުވާ ފިލްމީ ދާއިރާގައި އަބަދުވެސް އޮވެ އެވެ. އަދި ދާއިރާގައި ދުވަސްވީ ތަރިންގެ ނުފޫޒުގަދަވެ އާ ތަރިން ހޯހޯ ގޮވާފައި ނުކުންނަ ވާހަކަ ވެސް ދެކެވެ އެވެ.

އާ މޫނުތައް ނުފެންނާތީ އެ ވާހަކަ ދައްކަނިކޮށް ނިކުތް ބައެެއް ފަންނާނުން ދެތިން ފިލްމެއް ކުޅެލާފައި ގެއްލުނީ އެވެ. އެ ހުސްތަން ފޫބައްދަން އަނެއްކާވެސް ސީނިއާ ތަރިންތައް ފިލްމުތަކުގެ ލީޑްރޯލް ކުޅެން ފަށައި އަނެއްކާވެސް އެމީހުން ރަސްކަން ކުރަން ފެށީ އެވެ. ފާޑުކިޔާ މީހުން ބުނަނި އާ ކުދިންނަށް ގިނަ ފުރުސަތުތައް ލިބި އެމީހުން ކުރިއަށްދާން ފެށުމުން ސީނިއާ ތަރިންނަށް އެކަން ހަޖަމުނުވެ ހަސަދަވެރިވަނީ ކަމަށެވެ. އޭގެ ހެއްކެއްގެ ގޮތުގައި ދައްކަނީ މި ފަހަކަށް އައިސް ސީނިއާ ތަރިން އެކުގައި ފިލްމުތައް ހަދަން ފެށުމެވެ.

އެކަމަކު މި މައްސަލާގައި ސީނިއާ ތަރިންގެ ބަސް ތަފާތެވެ. ދިވެހި ފިލްމު އިންޑަސްޓްރީގައި ރަސްކަން ކުރި ޔޫސުފް ޝަފީއު (ޔޫއްޕެ) ބުނީ އާ ތަރިން ފިލްމީ ދާއިރާއަށް ނެރެން ގިނަ މަސައްކަތްތަކެއް ކުރާ ކަމަށާއި އަދި އާ ކުދިންނަށް ޔޫއްޕެގެ ފިލްމުތަކުން ފުރުސަތު ވެސް ދޭ ކަމަށެވެ.

"އަހަރެންގެ ފިލްމުތަކުން އާ ކުދިންނަށް ފުުރުސަތު ދެން. ފަހަކަށް އައިސް އަންހެން ކުދިންނަށް ގިނައިން ފުރުސަތު ދެނީ މި އިންޑަސްޓްރީގައި އަންހެން ކުދިން މަދީ، ފުދޭ ވަރަކަށް ފިރިހެން ކުދިން އެބައުޅޭ ފިލްމް އިންޑަސްޓްރީގައި. ދެން ވާ ގޮތަކީ އަހަރެމެން ފުރުސަތު އެބަދެން ހިފާއްޓާ ނުލެވެނީ ކުދިންނަށް. އަސްލުގައި ގިނަ ކުދިންނަށް ހީވަނީ ފިލްމެއް ކުޅެލީމަ އެ ފިލްމުން ތިމަންނައަށް ބެލުންތެރިންގެ ތަރުހީބު ލިބިދާނޭ އެކަމަކު އެދެން ނަސީބެއް ފުރަތަމަ ފިލްމުން މީހުން ކަމުދިއުން. ނޫނިއްޔާ ބައެއް ކުދިން ފެޑަޕްވަނީ އެކަހަލަ މާބޮޑު ޗާންސެއް ނުލިބުނީމަ،" ޔޫއްޕެ ބުންޏެވެ.

އޭނާ ބުނީ ޕްރޮޑިއުސަރަކު ނުވަތަ ޑައިރެކްޓަރަކު އަލަށް ކުއްޖަކު ނަގާއިރު އެ ނަގަނީ ބޮޑު ރިސްކެއް ކަމަށާއި ވަރަށް ބޮޑަށް ބަލަންޖެހޭ ކަމަށެވެ.

"އޭނަ އެ ރޯލަށް ފިޓުވޭތޯ ނުވަތަ ނުވޭތޯ ބަލާނެ، އެހެންނުން ވާނީ، މިސާލަކަށް ކުއްޖަކު އަލަށް ފިލްމެއްގެ ލީޑަށް ލާނީ ވަރަށް ބޮޑަށް ބަލާފަ ބެލުންތެރިންނަށް އޭތި ހުށަހަޅައިދޭނީ ކިހާ ފެންވަރަކަށްތޯ ބަލައިފަ. އެކަމަކު ބައެއް ކުދިން ފުރަތަމައިނުންވެސް ބޭނުންވަނީ ލީޑް ރޯލް، އަހަރެން ވެސް ފުރަތަމަ ކުޅުނީ ސަޕޯޓިން ރޯލު."

އާ ތަރިންނަށް ރާއްޖޭގައި މިހާރު ފިލްމުތަކުން ފުރުސަތު ނުލިބޭ އެއް ސަބަބަކީ ކުރިއާ ހިލާފަށް ފިލްމީ ތަރިން ފިލްމު ހެދުމެވެ. މާބޮޑު ބަޖެޓެއް ނެތި ފިލްމު ހަދާތީ ރިސްކު ނަގަން ނުކެރުމެވެ.

ޔޫއްޕެ ބުނީ މަސައްކަތް ކުރަމުން އަންނަނީ ފިލްމީ ދާއިރާ ނުހުއްޓި ކުރިއަށް ދާނެ ގޮތަށް ކަމަށެވެ. އޭނާ ބުނީ ކުރިން އާންމުކޮށް ފިލްމު ހަދަނީ ވިޔަފާރިވެރިން ކަމަށާއި އެކަމަކު މިހާރު ފިލްމު ހަދަނީ ވެސް ފިލްމު ކުޅޭ މީހުން ކަމަށެވެ. އެހެން ހަދަން ޖެހެނީ ފިލްމީ މަސައްކަތް ހުއްޓިދާނެތީ ކަމަށް އޭނާ ބުންޏެވެ.

އާ ކުދިން ދާއިރާގައި ހަރުނުލާ ދެވަނަ ސަބަބެއް ކަމަށް، ފިލްމީ ތަރި އަލީ ސީޒަން ބުނަނީ ފިލްމުކުޅެން ސީރިއަސްކޮށް ބޭނުންނުވުމެވެ. ގަޑިއަށް ފަރުވާތެރި ނުވުމާއި ޝޫޓިންތަކަށް ތައްޔާރު ނުވުމެވެ. ނަމަވެސް ސީިރިއަސްކޮށް ފިލްމީ ދާއިރާއިން ކުރިއަށްދާން ބޭނުންވެގެން މަސައްކަތްކުރާ ތަރިން ތިބިކަން ވެސް ފާހަގަކުރި އެވެ.

"އާ ކުދިން ދޯ. އެންމެފަހުން އަހަރުމެން އާ ކުދިން ތަކެއް ލައިގެން މި ކުރި އެކްސްޕީރިއަންސް އެއީ 40 ޕްލަސްގެ ޝޫޓިން. އާ ފަސް ކުދިން ނެގިއިރު ދެ ކުދިން ޝޫޓިން ނުނިމެނީސް މާލެއަށް އައިސްފި. އެނގޭ މާ ސީރިއަސް އިޝޫއެއްގަ ނޫންކަންވެސް. އެކަމަކު ބާކީ ތިބި ކުދިންގެ ތެރޭގައިވެސް އެބަތިބި ވަރަށް ރަނގަޅު ކުދިން. އެބަތިބި ވަރަށް މައްސަލަ ބޮޑު ކުދިންވެސް. މިސާލަކަށް ގަޑިއަށް ސަމާލުކަން ނުދިނުން. މޭކަޕްކުރަން ފަހެއް ޖަހާއިރު އަންނާށޭ ބުނީމަ މި އަންނަނީ ހައެއް ޖަހާއިރަށް. މި ބުނާ ވާހަކައަކީ އެހެން އެވަނީ ސީރިއަސްކޮށް މިކަން ނުނަގާތީ." ސީޒަން ބުންޏެވެ.

ސީނިއާ ތަރިން މަގުބޫލު އެހެން ސަބަބެއް ވެސް އެބައޮތެވެ. ކޮންމެ ރޯލެއް ކުޅެން ވެސް ފިޓުވުމެވެ. ލޯބީގެ ރޮމޭންޓިކް ރޯލެއް ނުވަތަ ނުބައި މީހެއް އަދި ނަށަން ޖެހޭ ނަމަ ނަށަން ވެސް ފައްކަލެވެ.

"ފިލްމު މިހަދަނީ ބެލުންތެރިންނަށް އެމީހުންގެ ސަޕޯޓް ލިބިގެން ނޫނީ ފިލްމެއް ކާމިޔާބެއް ނުވާނެ ކިތަންމެ މޮޅު މީހަކު ލައިގެން ކިތަންމެ މޮޅަށް ފިލްމު ހެދިއަސް. ބެލުންތެރިން އޭތި ބަލައިނުގަންނަންޏާ ނުވާނެ އެއަކުން ފައިދާއެއް. އެވޯޑެއް ނޫން އެއްޗަކީ ފައިސާ މީގަ އެއްޗަކީ."

ނަވާރަ ސަތޭކަ ނުވަދިހައިގެ ފަހުކޮޅުން ފެށިގެން ދާދި ފަހަކާ ޖެހެންދެން އެންމެ ވިދި ތަރިންނަކީ މިއީ އެވެ. އޭގެ ތެރޭގައިި މުހައްމަދު މަނިކު އަދި އަހްމަދު ސައީދުމެން ފަދަ ތަރިން ވެސް ހިމެނެ އެވެ. އަދިވެސް ޕްރޮޑިއުސަރުންނާއި ޑައިރެކްޓަރުންގެ މެދުގައި މިތަރިން މަގުބޫލެވެ. އާންމުކޮށް ރާއްޖޭގައި މި ހަދާ ލޯބީގެ ފިލްމުތައް އެތަރިން ލައްވާ ކުޅުވަން ބޭނުންވެ އެވެ.

ނަމަވެސް ސީނިއާ މިތަރިން މިހާރު ތިބީ ލޯބީގެ ރޯލުތައް ކުޅެން ފޫހިވެފަ އެވެ. ކޮމެޑީ ނުވަތަ ތްރިލް ފިލްމުތައް އުފައްދައި އެ ރޯލުތަކުން ފެންނަނީ އެހެންވެ އެވެ.

"އަހަރެމެން މިހާރު ނުވޭ ލޯބީގެ ޒުވާން ރޯލުތައް ކުޅޭހިތެއް. ލޯބީގެ ރޮމޭންޓިކް ރޯލުތައް ކުޅެކުޅެ މިހާރު ފޫހިވެއްޖެ. އާންމުކޮށް ހަދާ ދިވެހި ލޯބީގެ ފިލްމުތަކުގައި އެ ރޯލުތައް ހުންނާނީ ވެސް ޒުވާން ކުދިންނަށް ހާއްސަކޮށް އެހެން ވީމަ އެ ރޯލުތަކަށް ރަނގަޅުވާނީ ވެސް ޒުވާން ތަރިން،" ސީޒަން ބުންޏެވެ.

އަލަށް ފިލްމީ ދާއިރާއަށް ނުކުމެ ފިލްމީ ދާއިރާއިން ކުރިއަށްދާން ބޭނުންވާ ޒުވާނުން ސީނިއާ ތަރިން ދައްކާ މި ވާހަކަ އަހަން ވެސް އެބަ ޖެހެ އެވެ.

"އާ ކުދިން ގިނައިން މި ނެރެނީ ސަޕޯޓިން ރޯލުތަކުން. އޭރަށް ގިނަ ފަހަރަށް ލީޑް ރޯލް ނޫންވީމަ އެކުދިން ހިތް މަރުވަނީ. ދެން ދެވަނަ ފަހަރަށް އަނެއްކާ މަސައްކަތެއް ނުކުރޭ ކުރި އަރާކަށް. އަމިއްލައަށް މަސައްކަތް ކޮށްގެން ދޯ ފުރުސަތުތަކެއް ލިބޭނީ ވެސް،" ޔޫއްޕެ ބުންޏެވެ.

މިިދިޔަ އަހަރު ފިލްމީ ދާއިރާއަށް ތައާރަފްވި ބައެއް ތަރިން މިހާރު އަންނަނީ ބެލުންތެރިންގެ މެދުގައި މަގުބޫލު ވަމުންނެވެ. އޭގެ ތެރޭގައި "މަލިކާ" އިން ތައާރަފްވި ނުޒުހަތު ޝުއައިބު (ނުޒޫ) އަދި "ހައްދު" އިން ތައާރަފްވި ޝިބާން އަހްމަދު ހިމެނެ އެވެ. އެ ދެ ތަރިންގެ ފިލްމުތަކެއް މި އަހަރު ފެންނާނެ ކަމަށް ބެލެވެ އެވެ.