ޖޫހީ ޗާވްލާ އާއިލާއާ އެކު ރާއްޖޭގައި

ބޮލީވުޑްގެ ކުރީގެ މަޝްހޫރު ބަތަލާ ޖޫހީ ޗާވްލާ އާއިލާއާ އެކު ރާއްޖޭގައި ޗުއްޓީ ހޭދަކުރަމުން އެބަދެ އެވެ.

ކާމިޔާބު އެތައް ފިލްމެއް ކުޅެފައިވާ އުމުރުން 52 އަހަރުގެ ބަތަލާ ވަނީ ރާއްޖޭގެ ޗުއްޓީގެ ތެރެއިން ނަގާފައިވާ ވީޑިއޯއެއް ޓްވިޓާ އާއި އިންސްޓަގްރާމްގައި ވެސް އާންމު ކޮށްފަ އެވެ. އެ ވީޑީއޯތަކުގެ ކެޕްޝަނާ އެކު ދެ ކުދިންގެ މަންމަ ބުނީ އާއިލާއާ އެކު ރާއްޖޭގައި ޗުއްޓީ ހޭދަކުރަމުން އަންނަ އިރު، މި ދަތުރުގެ ތެރެއިން ކޯމަސް ބަލައިލުން ކަހަލަ ހިތްގައިމު ކަންކަން ތަޖުރިބާ ކޮށްފައިވާ ކަމަށެވެ.

ވިޔަފާވެރިޔާ ޖޭ މެހެތާއާ 1995 ގައި ކުރި ކައިވެންޏަށް "ޑަރު" އާއި "ޔެސް ބޮސް" އާއި "އިޝްގް" އަދި "ގަޔާމަތު ސޭ ގަޔާމަތު ތަކް" ފަދަ ރީތީ އެތައް ފިލްމެއް ކުޅުނު ޖޫހީ އަށް ލިބިފައި ވަނީ ދެ ޖިންސުގެ ދެ ކުދިންނެވެ. އެއީ ޖާންވީ މެހެތާ 18، އާއި އަރުޖުން މެހެތާ 16، އެވެ.

ޖޫހީ، އެންމެ ފަހުން ސްކްރީނުން ފެނުނު ފިލްމަކީ މި އަހަރުގެ ކުރީކޮޅު ރިލީޒްކުރި ސޯނަމް ކަޕޫރާއި އަނިލް ކަޕޫރްގެ "އޭކް ލަޅުކީ ކޮ ދޭކާ ތޮ އޭސާ ލަގާ" އިންނެވެ. އޭނާ މިހާރު އަންނަނީ ރިޝީ ކަޕޫރާ އެކު ކުޅޭ "ޝަރުމާޖީ ނަމްކީން" އަށް ތައްޔާ ރުވަމުންނެވެ.

ޖޫހީ މިދިޔަ އަހަރު ވެސް އާ އަހަރާ ދިމާކޮށް ރާއްޖޭގައި ޗުއްޓީ ހޭދަކޮށްފައިވެ އެވެ. އެ ފަހަރު އޭނާ ޗުއްޓީ ހޭދަކުރީ ލަނޑާ ގިރާވަރު ރިސޯޓްގަ އެވެ.