ޕްރައިވެސީ މައްސަލާގައި ކުރި ދައުވާއިން ސަލާމަތްވާން އެމަޒޮން އިން 30 މިލިއަން ޑޮލަރު ދެނީ

އެމަޒޮންގެ ވޮއިސް އެސިސްޓަންޓް އެލެކްސާ އިން ކުޑަކުދިންގެ ޕްރައިވަސީއަށް އަރައިގަންނަ ކަމަށް ބުނެ އެމެރިކާގެ ފެޑެރަލް ޓްރޭޑް ކޮމިޝަން (އެފްޓީސީ) އިން އެކުންފުންޏާ ދެކޮޅަށް ކުރި ދައުވާ އަނބުރާ ގެންދާ ނަމަ 25 މިލިއަން ޑޮލަރު ދޭން އެ ކުންފުނިން އެއްބަސްވެއްޖެ އެވެ.

އެމެޒޮންގެ މައްޗަށް ކޮށްފައިވާ ތުހުމަތަކީ ބެލެނިވެރިންގެ އެދުމުގެ މަތިން ވެސް އެލެކްސާ ރެކޯޑިންތަކާއި ޖިއޯ ލޮކޭޝަން ފަދަ ޑޭޓާތައް އެތައް އަހަރެއް ވަންދެން ގެންގުޅެ އަމިއްލަ ކަންކަމަށް އެ ބޭނުންކުރުމެވެ.

އެފްޓީސީން ބުނާ ގޮތުގައި، ޑޭޓާ ޑިލީޓްކުރާނެ ކަމަށް ބުނެ ބެލެނިވެރިންނަށް އޮޅުވާލައިގެން އެ ޑޭޓާތައް ވަނީ އެލެކްސާގެ އަލްގޮރިދަމް ރަނގަޅުކުރުމަށް ބޭނުންކުރެ އެވެ.

އޭގެ އިތުރުން، އެމަޒޮން އިން 2018 ވަނަ އަހަރު ގަނެފައިވާ "ރިންގް" ސެކިއުރިޓީ ކުންފުނިން ކަސްޓަމަރުންގެ ގޭތެރޭގައި ބަހައްޓާ ކެމެރާތަކުގެ އެކްސެސް އެއްވެސް ހުރަހެއްނެތި ކުންފުނީގެ މުވައްޒަފުންނަށް ބެލުމުގެ ފުރުސަތު ދީފައިވާ ކަމަށް ބުނާ މައްސަލައިގާ 5.8 މިލިއަން ޑޮލަރު ދޭން ރިންގް އިން ވަނީ ނިންމައިފަ އެވެ.

މީގެ ކުރިން ރިންގް ގެ މުވައްޒަފުން ކަސްޓަމަރުން ދިރިއުޅޭ ގެތަކުގައި ހުންނަ ކެމެރާތަކުގެ މަންޒަރުތައް ވަގަށް ބަލާކަމުގެ މައްސަލަތަކުގެ އަޑުފެތުރެ އެވެ. އެމެޒޮންގެ މުވައްޒަފަކު 2017 ވަނަ އަހަރު މުވައްޒަފަކު އަންހެން ކަސްޓަމަރުންގެ ގެތަކުގެ ކެމެރާތައް ތަކުރާރުކޮށް ބެލި ތުހުމަތެއް ފެންމަތިވި އެވެ.

އެ ކަންކަމަށް އެމަޒޮން އިން އިންކާރުކޮށް، ގާނޫނާ ހިލާފު ނުވާކަމަށް ބުނި ނަމަވެސް، އެ ކުންފުނިން ބުނި ގޮތުގައި، ފައިސާ ދައްކަން ނިންމީ ޕްރައިވަސީ ފީޗާތައް ޑިވެލޮޕްކުރަމުން ކުންފުންޏަށް ކުރިއަށް ދެވެން އޮތީ މި މައްސަލަ ނިންމާލައިގެން ކަމަށްވާތީ އެވެ.