ގޭމް އޮފް ތްރޯންސް ހަލީސީގެ ގަހަނާ މިހާރު އަޅާލެވިދާނެ

މަޝްހޫރު ޓީވީ ސީރީޒް ގޭމް އޮފް ތްރޯންސްގެ އެންމެ މަގުބޫލު އަދި ގިނަ ބައެއްގެ ހިތް ޖެހިފައިވާ ކެރެކްޓާ ހަލީސީ ނުވަތަ "މަދަ އޮފް ޑްރޭގަންސް" ހެދުން އަޅާ ސްޓައިލާއި އޭނާ އަޅާފައި ހުންނަ ރީތި ގަހަނާއަށް ގިނަ ބައެއްގެ ސަމާލުކަންކަން ލިބިފައިވެ އެވެ. މަދަ އޮފް ޑްރޭގަންސް ގޮތަށް ޖެހިލުންކުޑަ ކަމާއި ވަރުގަދަކަމާ އެކު ވެސް ލަތީފީ ޝަހްސިއްޔަތު ދައްކާލުމުގެ ފުރުސަތު މިހާރު ލިބިއްޖެ އެވެ.

އެމީ އެވޯޑް ލިބިފައިވާ ކޮސްޓިއުމް ޑިޒައިނާ މިޝެލް ކްލެޕްޓަން އާއި ލަންޑަންގެ ގަހަނާ ފަރުމާކުރުންތެރިން ކަމަށްވާ ޔޫނުސް އަދި އެލިޒާއާ އެކު "މޭ ޑިޒައިންސް"ގެ ނަމުން ބްރޭންްޑެއް އުފައްދައި ހަލީސީގެ ގަހަނާތައް އާއްމުންނަށް އެޅޭނެ ގޮތް މިހާރު ވަނީ ފަހިވެފަ އެވެ.

މިޝެލް ކްލެޕްޓަން އެންމެ ފުރަތަމަ ޔޫނުސް އާއި އެލިޒާއާ އެކު މަސައްކަތްކުރީ ގޭމް އޮފް ތްރޯންސް ސީޒަން 5 އަދި 6 އަށް ގަހަނާ ފަރުމާކުރާށެވެ. އަދި ހަލީސީގެ ޝަހްސިއްޔަތު ދެއްކޭނެ ކަހަލަ ގަހަނާއެއް ފަރުމާކުރި އެވެ. މި ސީޒަންތަކުގައި ހަލީސީ އެޅި ގަހަނާތައް ބެލުންތެރިންގެ ތެރޭގައި ވަރަށް މަގުބޫލުވި އެވެ. މޭ ޑިޒައިންސް އަށް މިކަން ފާހަގަވެ އާއްމުންނަށް ހަލީސީގެ ގަހަނާ އަޅާލެވޭނެ ކަލެކްޝަނެއް ޖޫން މަހުގެ 30ގައި ލޯންޗުކުރާނެ އެވެ.

ކަލެކްޝަންގައި 26 ވައްތަރެއް ހިމެނެ އެވެ. މި ބާވަތްތައް ތައްޔާރުކޮށްފައި ވަނީ ރިހިންނެވެ. އެޗް.ބީ.އޯ ގްލޯބަލް ލައިސެންސިންގެ ހުއްދައާ އެކު މޭ ޑިޒައިންސް އިން، އެ ސީރީޒްގައި ހަލީސީ އެޅި ހަތަރު ވައްތަރެއްގެ ގަހަނާ އެމީހުންގެ ކަލެކްޝަންގައި ހިމަނާފައިވެ އެވެ.

"މިޝޭލްއާ އެކު ހަލީސީއަށް ފަރުމާކުރި ޑްރޭގަން ނެކް ސްކަލްޕްޗާ އަށް ދުނިޔޭގެ އެކި ކަންކޮޅުތަކުން ފޭނުންގެ ތަރުހީބު ލިބުނު. އެހެންވީމަ މި ކަލެކްޝަން ނެރުމުން ވަރަށް ގިނަ ބަޔަކި އުފާވާނެކަން ޔަގީން،" ޔޫނުސް އާއި އެލިޒާ ބުނެފައިވެ އެވެ.

ސީރީޒްގައި އެޅި ގަހަނާތަކުގެ އިތުރުން ކޮންމެ ދުވަހަކު އަޅާލެވޭނެ ކަހަލަގެ ފަށެއް، އަނގޮއްޓިއެއް ނުވަތަ ތަނޑި ފަދި ގަހަނާ ވެސް ހިމެނޭނެ އެވެ. ފްލައިޓް ކަފް، ޑްރޭގަން ސްޓޯން ޕެންޑަންޓް އަދި ހަލީސީ ޑްރޭގަން ޗޯކާ ފަދަ ނަންތައް ދީފައިވާ ޑިޒައިނާ ގަަހަނާތަކުގެ އަގު ފެށެނީ 100 ޑޮލަރުންނެވެ.

"މި ގަހަނާ އަޅާލުމުން ކޮންމެ ސްޓައިލެއް ވެސް ފުރިހަމަކޮށްލެވިދާނެ. މީހުންގެ ސަމާލުކަން ލިބޭނެ ކަހަލަގެ 'ސްޓޭޓްމަންޓް' ގަހަނާ އާއި ކޮންމެ ދުވަހަކު އެޅާލެވޭނެ ކަހަލަ ސާދާ ގަހަނާ ވެސް ހިމެނޭނެ،" މިޝޭލް ބުންޏެވެ.

މޭ ޑިޒައިންސްގެ ގޭމް އޮފް ތްރޯންސް ގަހަނާ ކަލެކްޝަން އެމީހުންގެ ވެބްސައިޓުން ލިބޭނެކަމަށް ބުނެފައިވެ އެވެ.