ފައިތިލަ އަށް ފަރުވާތެރިވެ ރީތިކޮށްލަން ހިނގާ

މޫނު ރީތިކޮށް ބެހެއްޓުމަށް ވަރަށް ގިނަ ކަންތައް ކުރެ އެވެ. އެކަމަކު އަރާ ފައިވާނަކުން ނުވަތަ ބޫޓަކުން ފޮރުވިފައިވާ ފައިތިލައާ މެދު ފަރުވާކުޑަކޮށްލަ އެވެ. ހާއްސަކޮށް، ހޫނު މޫސުމުގައި އަރާ ހިރަފުހާއެކު ފައި ހުންނާނީ ހަލާކުވެ ފަޅަ ފަޅައިގެން ގޮސްފަ އެވެ. ފަރުވާއެއް ދޭން ހިތަށް އަރާނީ ރިއްސާވަރުން އޮބި ނޯވެގެން ނުވަތަ ހިނގަން އުދަނގޫވާ ހިސާބަށް ދިޔައިމަ އެވެ.

މާބޮޑު މަސައްކަތެއް ނުކޮށް ވެސް ފަޔަކީ ރީތިކޮށް އޮމާންކޮށް ބެހެއްޓިދާނެ ގުނަވަނެކެވެ. ބޭނުންވަނީ ކުޑަ ހިތްވަރެކެވެ. އެންމެ ފުރަތަމަ، ފައިގެ ހަންގަނޑު ހަރުވާ ސަބަބު ބަލައިލަން ހިނގާށެވެ.

ފަޔަކީ އަހަރުމެންގެ ހަށިގަނޑުން އެންމެ ބޮޑަށް ބޭނުން ކުރެވޭ އެއް ގުނަވަނެވެ. ސޯފާއަކުން ތެދުވެގެން ކޮޓަރިއާ ހަމައަށް ދިޔަ ކަމުގައި ވިޔަސް، ނުވަތަ ބޮޑު ރޭހެއްގައި ދުވިޔަސް ފައި އަހަރުމެންނާ އެކު ކޮންމެ ތާކަށްދެ އެވެ. ފައިގެ ހަންގަނޑު ހަރުވާ އެންމެ ބޮޑު އެއްސަބަބަކީ މިއެވެ. އެކަމަކު އެކި މީހުންގެ ފައި ހަރުވާ މިންވަރު ވެސް ތަފާތެވެ. މިސާލަކަށް، ބަރު މީހުންގެ ފައިގެ ހަންގަނޑު ބަރުދަން، ލުއި މީހަކަށްވުރެ ހަރުވާނެ އެވެ. ސަބަބަކީ ބަރު މީހާގެ ފައިގެ ހަންގަނޑަށް ޕްރެޝަރު އިތުރުވުމެވެ. ފައިތިލަ ތަންކޮޅެއް ފަތިކޮށް ހުންނަ މީހުންގެ ފައި ވެސް އެހެން މީހުންނަށްވުރެ ފަސޭހައިން ހަރުވެ އެވެ. ފައި ސާފުނުކޮށް ފަރުވާކުޑަކޮށްލުމަކީ ހަންގަނޑު ހަރުވާން ދިމާވާ އަނެއް ސަބަބެވެ.

ހަންގަނޑުގެ ހަރުކަން ފިލުވާނީ ކިހިނެއް؟

ފައި ފޫއްދުން ނުވަތަ ފޯކުރުން: ހަންގަނޑު މަޑުކުރުމަށްޓަކައި ކުރާ ހުރިހާ ފަރުވާއެއްގެ ވެސް ފެށުމަކަށް ވާންޖެހޭނީ ތާފަނާ ފެނުގެ ތެރޭގައި ފައި ފޯކޮށްލުމެވެ. މިހެން ހެދުމުން ހަންގަނޑު މަޑުވެ، ހަމުގައި ހަރުލާފައި ހުންނަ ހަޑިތައް ފިލުވަން ފަސޭހަވެ އެވެ. އެއިން ކުރާ އަސަރު އިތުރު ކުރުމަށްޓަކައި ފެންގަނޑު ތެރެއަށް ލުނބޯ ހުތް އެޅުމުން، އޭގައި ހުންނަ ސިޓްރިކް އެސިޑްގެ އެހީގައި، މަރުވެފައިވާ ހަންތައް ފިލުވައިދެ އެވެ.

މަރުވެފައިވާ ހަންތައް ފިލުވުން: ފައި ފޫއްދައި ނިމުމުން ދެން އޮތީ ހަން ފިލުވުމެވެ. އެކަމަށް ހާއްސަކޮށްފައިވާ ގަލަކުން ފައިގެ ކުރީކޮޅާއި ފުންނާބުގައި ވަށް ބުރު ހަމަވާ ގޮތަށް މަޑުމަޑުން އުނގުޅާށެވެ. ފައިގެ އުސްދިމާގައި އުނގުޅާއިރު އެހެން ތަންތަނަށްވުރެ މަޑުން އުނގުޅާށެވެ. އެތަނުގެ ހަންގަނޑު ނާޒުކުވެފައި ކިލާ ހަރުލާފައި ހުންނާނީ ވެސް މަދުންނެވެ. ހަންގަނޑު މަޑުވާކަން ކުޑައިރުކޮޅެއްގެ ތެރޭގައި އިހްސާސްވާނެ އެވެ. މިގޮތަށް ހަން ފިލުވާއިރު ސަމާލުކަން ދޭންވީ ހަންގަނޑު މާބޮޑަށް ތުނިވަންދެން ނުއުނގުޅުމަށެވެ.

ފެޅިފައި ހުންނަ ފުންނާބަށް ފަރުވާ ކުރުން: ފައި ނޭޅޭވަރަށް ފުންނާބު ފަޅަފަޅައިގެން ގޮސްފައިވާ ނަމަ ތަންކޮޅެއް ބޮޑަށް ފަރުވާކުރަން ޖެހިދާނެ އެވެ. ފަޔަށް ހާއްސަކޮށް ގޭގައި ތައްޔާރު ކޮށްލެވޭ ބައެއް ކަހަލަ މާސްކްތައް ހަންގަނޑުތެރެއަށް ވަދެ، ފެޅިފައިވާ ތަންތަން ފަސޭހަކޮށްދެ އެވެ. މިފަދަ އެކައްޗަކީ ވެސްލިން އެވެ. ވެސްލިން އުނގުޅާފައި ކޮތަޅެއް ފަދަ އެއްޗަކުން ބަނދެލުމަށް ފަހު ގަޑިއެއްހާއިރު ވަންދެން ބަހައްޓާށެވެ.

ފައިގައި ކާށިތެޔޮ އުނގުޅާފައި ސްޓާކިނެއް ލެއްވުމަށް ފަހު ހެނދުނު ވަންދެން ބޭއްވިޔަސް ރަނގަޅުވާނެ އެވެ.

މީގެ އިތުރުން، 3 ސަމުސާ ހަނޑޫ ފުށަށް 3 ސަމުސާ މާމުއި އެޅުމަށް ފަހު 2 ސަމުސާ އެޕަލް ސިޑާ ވިނެގާ އަޅައި އެއްކޮށްފައި ފައިގައި އުނގުޅުމަށް ފަހު ފަނަރަ މިނިޓްކޮށްފައި އޭގެ ޖާދޫ ބަލައިލާށެވެ.

މޮއިސްޗަރައިޒާއެއް ބޭނުންކޮށްގެން ހަންގަނޑު އޮމާންކުރުން: ހަމުގައި ހުރި ހަޑިތައް ފިލައި، ފަޅަފަޅައިގެން ގޮސްފައިވާ ތަންތަން ފަސޭހަ ކުރެވުމުން ދެން އޮތީ ހަންގަނޑު އޮމާން ކުރުމެވެ. މޮއިސްޗަރައިޒާއެއް ބޭނުން ކުރުމުގެ ކުރިން ހަނދާންކޮށް، ހަންގަނޑު ދޮވެ ސާފުކުރަން ހާއްސަ ސަމާލުކަމެއް ބަހައްޓަން ވާނެ އެވެ. މުޅި ހަށިގަނޑަށް ހުންނަ ކްރީމަކަށް ވުރެ ބޮޑަށް ފަޔަށް ހާއްސަ ކްރީމެއް ބޭނުން ކުރުން ރަނގަޅެވެ.

ހަންގަނޑުގެ އޮމާންކަމާއި ރީތިކަން ދެމެހެއްޓުން: ފައި ރީތިވުމުން އަދި އެ ހިސާބުން އަޅައިލުން ނިމުނީއެއް ނޫނެވެ. ދެން އޮތީ ފައިގެ މަޑުކަމާއި ރީތިކަން ދެމެހެއްޓުމެވެ. އެކަމަކު ކުރިން ކުރަން ޖެހުނު މަސައްކަތަށް ވުރެ ކުރަން މީ ފަސޭހަ ކަމެކެވެ. ނިޔަފަތިތައް މާ ދިގުވިޔަ ނުދީ އަބަދުވެސް ކަނޑާފައި ބަހައްޓާށެވެ. ފައި ހަޑިވިޔަ ނުދީ ސާފުކޮށް ބެހެއްޓުމާ އެކު މޮއިސްޗަރައިޒާއެއް އުނގުޅައި ހިކުނަ ނުދޭށެވެ. ފަޔަށް ހެޔޮވަރު ބޫޓު އަދި ފައިވާން ހިޔާރުކުރާށެވެ.

ގިނައިން ފެން ބުއިމަކީ ހަމާއި ހަށިގަނޑުގެ ހުރިހާ ކަމަކަށް ވެސް އެންމެ ބޮޑު އަސަރެއް ކުރާ ކަންތަކެވެ. ފެން މަދުވިޔަ ނުދީ އަބަދުވެސް ފެން ބޯން އާދަކުރާށެވެ.