ފުލް ޓައިމް: ދިވެހިރާއްޖެ 1 - 2 ފިލިޕީންސް

ފިލިޕީންސް 2-1 އިން މޮޅުވެގެން މެޗު ނިމިއްޖެ.

ރާއްޖޭން ލަނޑެއް ޖަހައިފި. ދަގަނޑޭ ދިން ޕާހަކުން މި ގޯލް ޖެހީ ދާދު.

ރާއްޖޭގެ ކުރޯ އޭރިއާ ބޭރުން ފޮނުވާލި ބާރު ޝޮޓް ފިލިޕީންސްގެ ކުޅުންތެރިޔަކު ބްލޮކްކޮށް ފޮނުވާލުމުން ލިބުނީ ދަގަނޑޭ އަށް. އޭނާ ހަނި އޭންގަލުން އެ ބޯޅަ ޖެހުމުން ދިޔައީ ދަނޑި މަތިން.

ރާއްޖޭން ރިޒޭ ނުރައްކާތެރި ބޯޅައެއް ފޮނުވާލައިފި. ފޭދޫ އިއްބެ އަރިމަތިން އަރައި އޭރިއާ ތެރެއަށް ވަދެ ހުސްކޮށް ހުރި ރިޒޭ އަށް ޖައްސާލި ބޯޅަ އޭނާ ގޯލަށް އަމާޒުކޮށްލުމުން ފިލިޕީންސްގެ ކީޕަރު އެތެރިޖް ވަނީ މަތަކޮށްފައި.

ރާއްޖޭން ހައިޝަމްގެ ބަދަލުގައި އަހުމަދު ރިޒްވާން (ރިޒޭ) އަރުވައިފި. މިވަގުތު ރާއްޖޭގެ އެޓޭކްގައި ތިބީ ދަގަނޑޭ، ދާދު އަދި ރިޒޭ.

ރާއްޖޭގެ ހަމްޕު މެދުތެރެއިން ފިލިޕީންސް ކުޅުންތެރިއެއް އަތުން ބޯޅަ ހޯދައިގެން ކުރިއަށް ވަދެ އޭރިއާ ތެރެއިން ފިލިޕީންސްގެ އަލްވާރޯ ސިލްވާގެ ޕްރެޝަރުގައި ޖެހި ވެއްޓުނީ. ރާއްޖޭން ޕެނަލްޓީއަކަށް އެޕީލްކުރި ނަމަވެސް ރެފްރީ ނިންމީ ޕެނަލްޓީއެއް ނޫން ކަމަށް.

ފިލިޕީންސް އިން ދެ ވަނަ ލަނޑު ޖަހައި ލީޑު ފުޅާކޮށްފި. މި ގޯލް ޖެހީ ޖޯން ޕެޓްރިކް. ޑިފެންސް ލައިނުން ރާއްޖޭގެ ނޫމާން އަތުން ގެއްލުނު ބޯޅަ ފުރަތަމަ ގޯލަށް ފޮނުވާލީ ފިލިޕީންސްގެ ލޫކް ވުޑްލެންޑް. އެ ބޯޅަ ފައިސަލް އަތުގައި ޖެހިފައި ދަނޑީގައި ޖެހިފައި ކުޅުމުގެ ތެރެއަށް ނުކުތް ވަގުތު ޕެޓްރިކް އަލުން ފޮނުވާލި. މި ފަހަރު ދަނޑީގައި ޖެހިފައި ނުކުތް ވަގުތު ފިލިޕީންސްގެ ޖޯން ޕެޓްރިކް ވަނީ ގޯލް ތެރެއަށް ބޯޅަ ވައްދާލާފައި. ބޯޅަ ދެ ފަހަރު ކުޅުމުގެ ތެރެއަށް ނުކުތް ވަގުތު ވެސް އެ ބޯޅަ ސަލާމަތްކުރަން ރާއްޖޭގެ ޑިފެންސަށް މާބޮޑު ކަމެއް ނުކުރެވި ތިބީ ހުއްޓިފައި.

ރާއްޖޭގެ ސެންޓޭގެ ބަދަލުގައި ދާދު ކުޅެން އަރުވައިފި. އަދި އަސަދުﷲގެ ބަދަލުގައި ދަގަނޑޭ އަރުވައިފި.

ރާއްޖޭގެ މެދުތެރެއިން ދިފާއުނުކުރެވުނު ބޯޅައެއް ހޯދައި ފިލިޕީންސްގެ ކުޅުންތެރިޔަކު ޖައްސާލި ބޯޅައެއް ހޯދައި އިއައިން ރަމްސޭ އޭރިއާ ތެރެއަށް ވަދެ ފޮނުވާލި ބޯޅަ އަމާޒުކޮށްލީ ގޯލުގެ މަތީ ދާގަނޑަށް.

ފިލިޕީންސް އިން ލީޑު ނަގައިފި.

ރާއްޖޭގެ ފޭދޫ އިއްބެ އަށް ރަނުގެ ފުރުސަތެއް ލިބި ބޭކާރުވެއްޖެ. ކައުންޓާ އެޓޭކެއްގައި އޭނާ އެކަނިމާއެކަނި އަރައި ފިލިޕީންސް ޑިފެންޑަރު ކައިރިން ވެސް ދެމިގަނެ ޖަހަޖަހާ އޮއްވާ ފިލިޕީންސްގެ ގޯލްކީޕަރު ނީލް އެތަރިޖް ވަނީ އެ ބޯޅަ ބޭރުކޮށްލާފައި. އެތެރިޖަކީ އިނގިރޭސި ޕްރިމިއާ ލީގުގައި ކުޅެފައިވާ ކީޕަރެއް.

ރާއްޖޭގެ އެޓޭކިން ދެ ކުޅުންތެރިން ކަމަށްވާ ދަގަނޑޭ އާއި ދާދު އަންނަނީ ވޯމްއަޕްކުރަމުން. ބެލެވޭ ގޮތުގައި ވަރަށް އަވަހަށް އެ ދެ ކުޅުންތެރިން ކުޅެން އަރުވާނެ.

ދެ ވަނަ ހާފުގެ ކުޅުން ފަށައިފި.

ދެ ޓީމު 0-0 އެއްވަރުވެގެން ފުރަތަމަ ހާފު ނިމިއްޖެ. ފުރަތަމަ ހާފް ކޮންޓްރޯލްކޮށް ރަނގަޅަށް ކުޅުނީ ރާއްޖޭން. އެގޮތުން ރާއްޖޭގެ ކުޅުންތެރިން ވަނީ މެދުތެރެއިން ރަނގަޅު އުފެއްދުންތެރި ހަމަލާތަކެއް ފޮނުވާލާފައި. އެކަމަކު އެންމެ ހުސް ފުރުސަތުތަކަށް ބަލާއިރު ކުރި ލިބެނީ ފިލިޕީންސަށް. އެ ޓީމު ލިބުނު ޕެނަލްޓީ ރާއްޖޭގެ ކީޕަރު ފައިސަލް ވަނީ މަތަކޮށްފައި.

ފިލިޕީންސްގެ ޕެނަލްޓީ ޕެޓްރިކް ޖެހުމުން ރާއްޖޭގެ ގޯލްކީޕަރު ފައިސަލް މަތަކޮށްފި.

ފިލިޕީންސް އަށް ޕެނަލްޓީއެއް. މި ޕެނަލްޓީ އަކީ އޭރިއާ ތެރެއިން ރާއްޖޭގެ ނޫމާންގެ އަތުގައި ބޯޅަ ޖެހުމުން ރެފްރީ ދިން ޕެނަލްޓީއެއް.

ފިލިޕީންސް އިން ކައުންޓާ އެޓޭކެއްގައި އުފެއްދި ހަމަލާއެއްގައި ޕެޓްރިކް އޭރިއާ ތެރެއިން ހުހަށް ހުރެ ފޮނުވާލި ބޯޅަ ރާއްޖޭގެ އަކްރަމް ދިފާއުކޮށްފި.

ގަލޮޅު ދަނޑުގެ ސަހަރާ ފަޅި އާއި ބޮޑުގޭޓް ފަޅީގެ ސިޑިބަރި ބޭނުންކުރުން ސަލާމަތީ ގޮތުން ރައްކާތެރި ނޫން ކަމަށްވާތީ އެފްއޭއެމުން ޓިކެޓް ވިއްކާފާފައިވަނީ މަޖީދީ މަގު ފަޅި އާއި ރަސްމީ ގޮނޑި ބަރި ފަޅިން. އެކަމަކު ވިއްކަން ކަނޑައެޅި 3000 ޓިކެޓް ހުސްވި ކަމަށް ނުބެލެވޭ. ސަބަބަކީ މަޖީދީ މަގު ފަޅި ސިޑިބަރިން އަދިވެސް ހުސް ޖާގަތައް ފެންނާތީ.

ފިލިޕީންސްގެ ޖޯން ޕެޓްރިކް ބޯޅައިގައި ބޮލުން ޖަހަން އަރައަރާ ހުއްޓާ ރާއްޖޭގެ އަކްރަމް ފުންމައިގެން އަރައި އެ ބޯޅައިގައި ބޮލުން ޖެހި ވަގުތު އަކްރަމްގެ އަތުން ޖެހި ޕެޓްރިކްގެ ބޯ ފަޅައިގެންގޮސްފި. ރެފްރީ ވަނީ އަކްރަމަށް ރީނދޫ ކާޑެއް ދައްކާފައި.

ފިލިޕީންސް އިން ކައުންޓާ އެޓޭކުގައި ވަރަށް ނުރައްކާތެރި ބޯޅައެއް ފޮނުވާލައިފި. އެކަމަކު އަރިމަތިން މުޅިން ހުހަށް އަރައި ނެގި ހުރަހެއް އޭރިއާ ތެރެއިން ހުހަށް އެރި އެ ޓީމުގެ އިއައިން ރަމްސޭގެ ބޮލުގައި ލައްވައެއް ނުލި.

ރާއްޖޭން އަންނަނީ ހައި ޕްރެސިން ގޭމެއް ކުޅެ ފިލިޕީންސަށް ބާރުބޮޑުކުރަމުން. ފަހަތުން ބޯޅަތައް ހިފެހެއްޓުމުގެ ބަދަލުގައި ވީހާ ވެސް އަވަހަކަށް ކުރިއަށް ފޯރުކޮށްދީ އެޓޭކަށް އަންނަނީ ބަދަލުކުރަމުން.

ރާއްޖޭގެ ފަރާތުން ނުރައްކާތެރި ހަމަލާއެއް ފޮނުވާލައިފި. ފޭދޫ އިއްބެ އޭރިއާ ރޮނގު މަތިން ކަހަލަ ގޮތަކަށް ޖައްސާލި ބޯޅަ ހަމްޕު ބާރު ޝޮޓަކުން ގޯލަށް އަމާޒުކޮށްލުމުން ފިލިޕީންސް ކުޅުންތެރިޔެއްގެ ގައިގައި ޖެހިފައި ވަނީ ކޯނަރަކަށް ބޭރުވެފައި.

މެޗުގެ ކޮންޓްރޯލް އޮތީ ރާއްޖޭގެ އަތުގައި. މެދުތެރެއިން ރާއްޖޭން މެޗު ކޮންޓްރޯލް ކުރި ނަމަވެސް އޭރިއާ ތެރެއަށް ވަދެ އަދި ނުރައްކާތެރި ހަމަލާއެއް ނުއުފެއްދޭ. ފިލިޕީންސަށް ލިބުނު ހަމައެކަނި ފުރުސަތުގައި ފޮނުވާލި ހިލޭ ޖެހުން އޭރިއާ ތެރެއިން ރާއްޖޭގެ ކެޕްޓަން އަކްރަމް ވަނީ ބޮލުން ސާފުކޮށްލާފައި.

މެޗު ފަށައިފި.

މި މެޗުގެ ފުރަތަމަ އެގާރައިގައި، ޓީމުގައި ހިމެނޭ އެންމެ ހުނަރުވެރި އަދި އެންމެ ތަޖުރިބާކާރު ފޯވާޑް ދަގަނޑޭ ނުހިމެނޭ. ފޯވާޑް ލައިން ބަލަހައްޓާނީ އަސަދުﷲ އާއި ހަމްޕު އަދިސެންޓޭ. މެދުތެރެއަށް ކުޅޭނީ ފޭދޫ އިއްބެ އާއި އައިސަމް އަދި ނިހާޓް. ޑިފެންސް ބަލަހައްޓާނީ އަކްރަމާއި ހެލްމެޓާއި ކުރޯ އަދި ހައިޝަމް. ގޯލުގައި ހުންނާނީ ފައިސަލް.

ރާއްޖެ އާއި ފިލިޕީންސް ވަނީ 2014 ވަނަ އަހަރު ރާއްޖޭގައި އޮތް އޭއެފްސީ ޗެލެންޖް ކަޕުގެ ސެމީ ފައިނަލުގައި މާލޭގައި ވާދަކޮށްފައި. ވަރަށް ވާދަވެރި ކުޅުމަކަށް ފަހު އެ މެޗު 3-2 އިން ކާމިޔާބުކުރީ ފިލިޕީންސް. މިއީ އެ މެޗުގެ ބަދަލު ހިފަން ރާއްޖެ އަށް ލިބިފައިވާ ފުރުސަތެއް.

މިއީ 2022 ވަނަ އަހަރުގެ ވޯލްޑް ކަޕާއި 2023 ވަނަ އަހަރުގެ އޭޝިއަން ކަޕުގެ ކޮލިފައިންގެ ގްރޫޕް އޭ ގެ މެޗެއް. މި މެޗާ ކުރިމަތިލާއިރު ރާއްޖެ އޮތީ ތިން ޕޮއިންޓާ އެކު ހަތަރު ވަނައިގައި. ފިލިޕީންސް އޮތީ ހަތަރު ޕޮއިންޓާ އެކު ތިން ވަނައިގައި. މި ގްރޫޕުގެ އެއް ވަނަ އާއި ދެ ވަނަ މަގާމް ސީރިއާ އާއި ޗައިނާ އިން ހޯދާނެ ކަމަށް ބެލެވޭތީ ރާއްޖެ އާއި ފިލިޕީންސްގެ ލޯ ހުރީ ތިން ވަނަ މަގާމް ހޯދުމަށް. އެހެންވެ މި މެޗު ކާމިޔާބުކުރުން ދެ ޓީމަށް ވެސް ވަރަށް މުހިއްމު.