ދުވަން މިލިއަނުން ކުރި ހަރަދު ކިޔަވަން ކުރެވެން އޮއްވައި ވެސް ކޯޗު ނަސީރު އިސްމާއިލް އިހްތިޔާރުކުރީ ގައުމަށް ރީތި ނަން ހޯދައިދިނުމެވެ. ހުރިހާ ހަކަތައެއް އެކަމަށް ހުސްކޮށްގެން ދެ ފަހަރެއްގައި އޮލިމްޕިކްސްގައި ބައިވެރިވެ، އަދި ގައުމީ ފެންވަރުގެ ރެކޯޑްތަކެއް ހެދި އެވެ. އޭގެ ތެރެއިން އެއް ރެކޯޑް އަދިވެސް އެހެން ދުވުންތެރިޔަކަށް މުގުރައެއް ނުލެވެ އެވެ.
ގައުމީ ފެންވަރުގެ ތަމްރީނުތަކުގެ ފުރުސަތު ނުލިބުނު ދުވަސްވަރު، ރާއްޖޭގައި އުފެދުނު އެންމެ މޮޅު ދުވުންތެރިޔާ ނަސީރު އިސްމާއިލް މިއަދު ވެސް އޭނާގެ ކާމިޔާބީގެ ވާހަކަ ދައްކަވަނީ ވަރަށް ފަޚުރުވެރިކަމާ އެކުގަ އެވެ.
ދިރާގާއެކު މިހާރު ބަދިގެއިން ބެލުންތެރިންނަށް މޯލްޓީޒާސް ޗީޒް ކޭކް ރެސިޕީއާ އެކު އޭނާގެ ދުވުމާއި ދިރިއުޅުމުގެ ބައެއް ވާހަކަތައް ފޮނިކޮށް ކިޔައިދެއްވި އެވެ.
ގިނަ އެތުލީޓުން ތަމްރީންކުރަމުން އަންނަ ނަސީރު މިހާރު ގެންދަވަނީ ކުޅިވަރުގެ ކޯޗިން އެންޑް ސައިންސުން މާސްޓާސް ޑިގްރީއަށް ކިޔަވަން ތައްޔާރުވަމުންނެވެ.
"އަޅުގަނޑު ކަނޑައެޅިން މީހަކާ އިންނާނީ ވެސް ރާއްޖެއަށް މެޑަލް ހޯދައިދީފައޭ. އެހެންވެ 30 އަހަރު ވަންދެން ހުރިން މީހަކާ ނީނދެ،" ނަސީރު ވިދާޅުވި އެވެ.
އެހެންވިޔަސް ނަސީރު ގަބޫލުކުރައްވާ ގޮތުގައި އޭނާއަށް ލިބުނު އުފާ މާބޮޑެވެ.
"އަޅުގަނޑު އެންމެ އުފާވަނީ 35 އަހަރުވަންދެން އަޅުގަނޑުގެ އަތުގައި އޮތް ރެކޯޑާ މެދު. ވަރަށް ޕްރައުޑްވޭ. އެ ރެކޯޑު އޮންނާތީ އާއި އަޅުގަނޑަކީ ދެ ފަހަރެއްގެ މަތިން އޮލިމްޕިކްސްގައި ބައިވެރިވެފައިވާ މީހަކަށް ވާތީ އެ ލިބޭ ފަހުރު. ދިވެހިރާއްޖޭގެ އެތުލީޓެއްގެ އަތުން ދުވަހަކު ވެސް ބަލިނުވެ އަދި ދުނިޔޭގެ ލެވެލްގައި ޓައިމްތަކެއް ހަދާފައިވާ ދެ މީހުންގެ ތެރެއިން އެކަކަށް އަޅުގަނޑުވާތީ. އަނެކަކީ ސާއިދު. ސާއިދުގެ އެޑްވާންޓޭޖަކީ މެޑަލް ލިބުން އަޅުގަނޑަކަށް މެޑަލް ނުލިބުނު."
މޯލްޓީޒާސް ޗީޒް ކޭކް
ބޭނުންވާ ތަކެތި
މާރީ ބިސްކޯދު މުގުރާފައި
300 ގްރާމް ބަޓަރު (މެލްޓްކޮށްފައި)
200 ގްރާމް ކްރީމް ޗީޒް
150 ގްރާމް މޯލްޓީޒާސް ސްޕްރެޑް
80 ގްރާމް އައިސިން ޝުގާ
400 މިލިލީޓަރު ޑަބަލް ކްރީމް
ގާނިޝްކުރަން
125 ގްރާމް މޯލްޓީޒާސް ސްޕްރެޑް (ކުޑަކޮށް ހޫނުކޮށްފައި)
100 ގްރާމް މޯލްޓީޒާސް ޗޮކްލެޓް
ތައްޔާރުކުރާނެ ގޮތް
ފުރަތަމަ ޗީޒް ކޭކްގެ ބޭސް ތައްޔާރުކުރަން 185 ގްރާމްގެ މާރީ ބިސްކޯދު ކުދިކޮށް މުގުރާލާށެވެ. ފުޑް ޕްރޮސެސަރެއް ބޭނުންކޮށްގެން ނުވަތަ ޒިޕް ކޮތަޅަކަށް އަޅާފައި ރޯލިން ޕިންއަކުން ފިއްތައިގެން ވެސް މިކަން ކުރެވިދާނެ އެވެ.
މުގުރި ބިސްކޯދުކޮޅު 300 ގްރާމްގެ ބަޓަރާ އެއްކޮށްލާށެވެ. މި ބިސްކޯދުކޮޅު ކޭކު އަޅަން ބޭނުންވާ ޓްރޭއަށް އަޅައި ތައްޓެއް ބޭނުންކޮށްގެން ނަމަވެސް އެއްވަރުކޮށްލާށެވެ.
ކޭކުގެ ފިލިން ތައްޔާރުކުރަން 200 ގްރާމްގެ ކްރީމް ޗީޒާއި 150 ގްރާމްގެ މޯލްޓީޒާސް ސްޕްރެޑް އަދި 80 ގްރާމްގެ އައިސިން ޝުގާ އެއްކޮށް ގިރާލާށެވެ. ވަކި ތައްޓެއްގައި ޑަބަލްކްރީމް ގިރާލާށެވެ. މި ކްރީމްކޮޅު, ކުރިން ތައްޔާރުކުރި ކްރީމް ޗީޒް މިކްސްޗާއަށް އަޅައި މަޑުމަޑުން އެއްކޮށްލާށެވެ.
ކުރިން ތައްޔާރުކުރި ބިސްކޯދު ލޭޔަރުގެ މައްޗަށް ޗީޒް ކޭކެ ފިލިން އަޅައި ސަމްސަލަކުން އޮމާންކޮށްލާށެވެ. ދެން އޭގެ މައްޗަށް އަޅާނީ ހޫނުކުރި 125 ގްރާމްގެ މޯލްޓީޒާސް ސްޕްރެޑެވެ. ބޭނުން ޑިޒައިނެއް ޖެއްސިދާނެ އެވެ. އޭގެ މަތީގައި މޯލްޓީޒާސް ޗޮކްލެޓް އަތުރާލާށެވެ.
ނަސީރަށް އެހާ ފޮނިކާއެއްޗެހި ކަމުނުދެ އެވެ. އެކަމަކު ބައެއް ފަހަރަށް އޭނާ ޓްރެއިންކުރާ ކުދިންނަށް ބަނާނާ ސްމޫތީ ކަހަލަ ހެލްތީ ބުއިންތައް ހަދައިދެ އެވެ. އެންމެ ކުރީއްސުރެ އޭނާގެ ފެވަރިޓަކީ ފިޝް އެންޑް ޗިޕްސް އެވެ.
ބޭރު ގައުމުތަކުގައި އެކި ކަހަލަ ކެއުންތަކުގެ ރަހަތަކަށް ޝައުގުވެރިވާއިރު ކޮންމެވެސް ގައުމަކުން ކެވުނު ވަރަށް މީރު ކޭކެއް މީރުވެގެން މާލެ އައިސް އެ ހަދަން އުޅުއްވި އެވެ. އެކަމަކު އެ ރަހަ ނުނެރެވުނު ކަމަށް ވިދާޅުވި އެވެ.
"އަޅުގަނޑުމެންގެ ރަހުމަތްތެރިޔާ އަށް ގުޅައިގެން ވެސް އެ ރެސިޕީ ދެތިން ދުވަހަކު ހެދިން. އެކަމަކު އެ ރަހައެއް ނުނެރެވުނު ހަމަ."