ޚަބަރު / ރައީސް ޑރ. މުހައްމަދު މުއިއްޒު

ދޮންމަންމާފުޅު ދެއްކެވި ވާހަކަތަކަށް ރައީސް ފުރަތަމަ ފަހަރަށް ރައްދު ދެއްވައިފި

ރައީސް ޑރ. މުހައްމަދު މުއިއްޒު: ހަގީގަތާ ޚިލާފަށް ޑޮކިއުމެންޓްރީގައި ބަދުނާމު އެޅުވީ ސިޔާސީ ވިސްނުމެއްގައި ކަމަށް ރައީސް ވިދާޅުވި.

މިދިޔަ އަހަރުގެ ރިޔާސީ އިންތިހާބުގެ ދެވަނަ ބުރާ ދިމާކޮށް، ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާންގެ ވީޑިއޯ ޑޮކިއުމެންޓްރީއަކުން އެ މަނިކުފާނަށް އަމާޒު ކުރެއްވި ބޮޑެތި ތުހުމަތުތަކަށް ފުރަތަމަ ފަހަރަށް މިއަދު ރައްދު ދެއްވައިފި އެވެ.

ރައީސް ވިދާޅުވީ އެ ތުހުމަތުތަކުގައި އެއްވެސް ހަގީގަތެއް ނެތް ކަމަށެވެ. އެ ޑޮކިއުމެންޓްރީގެ ބޭނުމަކީ ސިޔާސީ ވިސްނުމެއްގައި އެ މަނިކުފާނު ބަދުނާމުކުރުން ކަމަށް ވިދާޅުވި އެވެ.

"އަދަދު" ނޫހުގެ އެ ޑޮކިއުމެންޓްރީގައި ރައީސް މުއިއްޒަށް ތުހުމަތު ކޮށްފައި ވަނީ، ބައްޕާފުޅު ޝައިހް އަބްދުއްރަހްމާން އަވަހާރަވުމުން ދޮންމަންމާފުޅު ނުހައްގުން ޑީޕޯޓް ކޮށްލެއްވި ކަމަށް ބުނެ އެވެ. އެ ޑޮކިއުމެންޓްރީގައި ސްކީލާން ގިނަ ވާހަކަތަކެއް ދައްކަވައި ވިދާޅުވެފައި ވަނީ ޓޫރިސްޓު ވިސާގައި ވެސް ރާއްޖެ އެތެރެ ނުވެވުނު ކަމަށެވެ.

ސްކީލާން ހުސެއިން އަކީ ސްރީ ލަންކާގެ ބޭކަނބަލެކެވެ. ކައިވެންޏަށް ފަހު ސްކީލާން ވެސް ދިރިއުޅުއްވީ މާލޭގައި ރައީސް މުއިއްޒުގެ އާއިލީ ގެކޮޅު، މ. ދިމްޔާތުގަ އެވެ. މުއިއްޒުގެ ބައްޕާފުޅު 2015 ވަނަ އަހަރު ހައްޖުގެ އަޅުކަމަށް ވަޑައިގެން އުޅުއްވަނިކޮށް މައްކާގައި އަވަހާރަވުމުން ސްކީލާން އެނބުރި ލަންކާ އަށް ވަޑައިގަތީ ތަރިކަ މުދާ ބެހުމުގެ މައްސަލަ ފެމިލީ ކޯޓުން ނިންމި ފަހުންނެވެ.

އަޅުގަނޑުގެ ބައްޕަ ނިޔާވީމަ ތަރިކަ ބެހުމުގެ ކަންތަކުގައި އެ އޮންނަ އުސޫލުން ކޯޓަށް ގޮސްގެން ހުރިހާ ކަމެއް އޮތީ ނިމިފައި. ރައީސް

އިންތިހާބުގެ ދުވަސްވަރު، ރައީސް މުއިއްޒަށް އަމާޒުކޮށް ނެރުނު މި ޑޮކިއުމެންޓްރީއާ ގުޅޭ ގޮތުން އެ މަނިކުފާނު މިހާތަނަށް އެއްވެސް ވާހަކަފުޅެއް ވިދާޅެއް ނުވެ އެވެ. އެކަމަކު އެ ތުހުމަތުތަކަށް މިއަދު ވާހަކަފުޅު ދެއްކެވީ، އެ ޑޮކިއުމަންޓްރީއަށް މޯލްޑިވްސް މީޑިއާ ކައުންސިލުންދޭ އިންވެސްޓިގޭޓިވް ދާއިރާގެ އެންމެ މޮޅު އޯޑިއޯ، ވީޑިއޯގެ އެވޯޑު ދީ، ތުހުމަތުތައް އެ މަނިކުފާނަށް އަލުން އަމާޒުކުރުމުންނެވެ.

ރާއްޖޭގެ ތަރައްގީއާ ގުޅޭ މާސްޓަ ޕްލޭން އިފްތިތާހް ކުރެއްވުމަށް ފަހު، ސޯޝަލް ސެންޓަރުން ނުކުމެވަޑައިގެން މިއަދު ނޫސްވެރިންނާ ބައްދަލުކުރެއްވުމުން "މިހާރު" އިން އެ ޑޮކިއުމެންޓްރީގެ ތުހުމަތާ ގުޅޭ ގޮތުން ސުވާލުކުރުމުން ރައީސް ވިދާޅުވީި އޭގައި ދައްކާފައި ވަނީ "އެއްވެސް ހަގީގަތެއް އޮތް ވާހަކަތަކެއް ނޫން" ކަމަށެވެ.

އެކަމަކު، ބޮޑެތި އިލްޒާމު އަޅުވައި އާއްމުކުރި ޑޮކިއުމެންޓްރީއާ ގުޅޭ ގޮތުން މިހާތަނަށް އެއްޗެއް ވިދާޅުވާން ބޭނުންފުޅު ނުވީ އެ މަނިކުފާނަކީ މީހުންގެ ވާހަކަ ދައްކަވާ ބޭފުޅަކަށް ނުވާތީ ކަމަށް ރައީސް ވިދާޅުވި އެވެ.

އެމަނިކުފާނު ވިދާޅުވީ، ވަކިން ޚާއްސަކޮށް އެއްވެސް މީހެއްގެ ޒާތީ މައުލޫމާތު ހިއްސާ ކުރައްވަން އުނދަގޫފުޅު ކަމަށެވެ. ޑޮކިއުމެންޓްރީއާ ގުޅޭ ގޮތުން އެއްޗެއް ވިދާޅުވާން ޖެހިވަޑައިގަތީ "އެކަން ބޮޑުވެފައި އޮތުމުން" ކަމަށެވެ.

ދެން މިހާ ބޮޑަށް މިކަން އޮޅުވާލައި އަޅުގަނޑުގެ އަގު ވައްޓާލަން އަޅުގަނޑު ގަބޫލުކުރަނީ، ސިޔާސީ ވިސްނުމެއްގައޭ މިކަން ކުރަނީ. އޭގައި ނޯންނާނެ އަޅުގަނޑު އިތުރަށް ކުރި ކަމެއް.

ރައީސް ވިދާޅުވި ގޮތުގައި ދޮންމަންމާފުޅާ ދޭތެރޭގައި ގޯހުން ކަމެއް ކުރައްވާފައެއް ނޯންނާނެ އެވެ. މުދާ ބެހުމުގައި ވެސް އަމަލުކުރެއްވީ، އެކަމަނާ އެދިވަޑައިގަތް ގޮތަށް ކަމަށް ވިދާޅުވެ ކޯޓުގެ ނިންމުންތަކުގެ ތަފްސީލްތައް މިއަދު ހިސާކުރެއްވި އެވެ.

ރައީސް ވިދާޅުވީ އެ މަނިކުފާނުގެ ބައްޕާފުޅު އަވަހާރަވުމުން، ފެމިލީ ކޯޓުން ތަރިކަ މުދާ ބެހިއިރު ބައްޕާޕުޅުގެ ހުރިހާ މުދަލަކާއި ފައިސާއެއް ދެއްވީ ދޮންމަންމާފުޅަށް ކަމަށެވެ.

އޭގެ އިތުރުން، ކޮލަމްބޯގައި ހުރި ދެ ގެއަކާއި ކޭންޑީގައި ހުރި ގެސްޓް ހައުސް ވެސް ދެއްވީ ދޮންމަންމާފުޅަށް ކަމަށް ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި ބައްޕާފުޅުގެ ލަންކާ އެކައުންޓުގައި ހުރި ހުރިހާ ފައިސާއެއް ވެސް ދެއްވީ ދޮންމަންމާފުޅަށެވެ.

"އަޅުގަނޑުގެ ބައްޕަ ނިޔާވީމަ ތަރިކަ ބެހުމުގެ ކަންތަކުގައި އެ އޮންނަ އުސޫލުން ކޯޓަށް ގޮސްގެން ހުރިހާ ކަމެއް އޮތީ ނިމިފައި. ބައްޕަގެ ގޯތި، ބިންތައް އޮތް ލަންކާގައި. ކޮލަމްބޯގައި ދެ ބިން، ކޭންޑީގައި ބިމެއް. މި ތިން ތަނުގައި ގޯތި އިމާރާތް ހަދާފައި ހުރީ. އެތަނުން އެއް ތަނުގައި ގެސްޓް ހައުސް ހަދާފައި ވިޔަފާރިކޮށްގެން އާމްދަނީ ހޯދޭނެ ގޮތަށް،" ތަރިކަ ބެހުމުގެ ކަންކަން ނިމުނު ގޮތް ހިއްސާ ކުރައްވަމުން ރައީސް ވިދާޅުވި އެވެ.

"އަޅުގަނޑު ނިންމީ ދޮންމަންމަ އަށް އެ ތަންތަން ދޭން ހިލޭ، ބަދަލެއް ނެތި، އަދި ބައްޕަގެ ލަންކާ އެކައުންޓުގައި ހުރި ހުރިހާ ފައިސާއަކާ އެކީގައި."

ރައީސް ވިދާޅުވި ގޮތުގައި އެ ހުރިހާ މުދަލެއް ދޮންމަންމާފުޅަށް ދެއްވުމުން، މާލޭގައި ހުރި ބައްޕާފުޅުގެ މުދާތައް އެ މަނިކުފާނަށް ދެއްވަން ނިންމެވީ ދޮންމަންމާފުޅު އަމިއްލައަށެވެ.

ރައީސް ވިދާޅުވީ މިހާ ތަފްސީލުކޮށް ޖަވާބު ދެއްވަން ޖެހިވަޑައިގަތީ "މިހާ ބޮޑަށް މިކަން އޮޅުވާލާފައި" އޮތުމުންނެވެ.

އެ މަނިކުފާނު ވިދާޅުވި ގޮތުގައި ކަމުގެ ހަގީގަތް އޮޅުވާލައި އެ މައުލޫމާތު ފަތުރަމުންދަނީ އަގު ވައްޓާލަން ސިޔާސީ ވިސްނުމެއްގަ އެވެ.

"ދެން މިހާ ބޮޑަށް މިކަން އޮޅުވާލައި އަޅުގަނޑުގެ އަގު ވައްޓާލަން އަޅުގަނޑު ގަބޫލުކުރަނީ ސިޔާސީ ވިސްނުމެއްގައޭ މިކަން ކުރަނީ. އޭގައި ނޯންނާނެ އަޅުގަނޑު އިތުރަށް ކުރި ކަމެއް. އެހެންވީމާ އަޅުގަނޑުގެ ބޮލުގައި ބަދުނާމު އަޅުވަން އެ ދައްކާ އިތުރު އެއްވެސް ކަމަކީ އަޅުގަނޑާ ގުޅޭ ކަމެއް ނޫން،" ރައީސް ވިދާޅުވި އެވެ. އެ ތުހުމަތުތަކަށް މިދިޔަ ރިޔާސީ އިންތިހާބު ތެރޭގައި ރައީސް ޖަވާބު ނުދެއްވި ނަމަވެސް، ކެމްޕެއިން ދުވަސްވަރު ރައީސްގެ އަނބިކަނބަލުން ސާޖިދާ މުހައްމަދު ވަނީ ކަން ހިނގި ގޮތް ސާފުކޮށްދެއްވައިފަ އެވެ.

ފަސްޓް ލޭޑީ ވިދާޅުވެފައިވާ ގޮތުގައި ދޮންމަންމާފުޅަށް މުއިއްޒު ވަރަށް ކަމޭހިތްތެވި އެވެ. ބައްޕާފުޅު އަވަހާރަވުމަށް ފަހު އެކަމަނާ އެދިވަޑައިގެންނެވި ހުރިހާ އެއްޗެއް ވެސް ދެއްވި ކަމަށް ސާޖިދާ ވިދާޅުވި އެވެ. އަދި ކޯޓުން މައްސަލަ ނިންމި ގޮތް ފެންނަން އޮންނާނެ ކަމަށާއި ހަގީގަތް އޮޅުވާ ނުލެވޭނެ ކަމަށް އެކަމަނާ ވެސް ވިދާޅުވެފައިވެ އެވެ.

އެކަމަނާ ވިދާޅުވެފައިވާ ގޮތުގައި، ސްކީލާން ރާއްޖެ ދޫކުރައްވައި އެނބުރި ލަންކާ އަށް ވަޑައިގަންނަވަން އުޅުއްވިއިރު ވެސް ވިސާގެ މައްސަލައެއް ދިމާވި އެވެ.

"އޭރު އަޅުގަނޑުމެންނަކަށް ވެސް ނޭނގޭ ހަގީގަތުގައި، މީހަކު ކައިވެނި ރޫޅުން ނުވަތަ މަރުވުމަށް ފަހު، ބޭރު މީހެއްގެ ވިސާ ވަކި މުއްދަތެއްގެ ތެރޭގައި ހަމަވާކަން ވެސް. ދެން އެހެން ނަމަވެސް، އޭނާގެ ވިސާ އެބައޮތް، އިތުރު މުއްދަތަށް އޮތީމަ [ރާއްޖޭގައި] ހުންނެވި ތިން ހަތަރު މަސް ވަންދެން، ހަމަ ކޯޓު ކޭސް ނިމެންދެން ހުންނެވި،" އޭރު ސާޖިދާ ވިދާޅުވި އެވެ. ކުރީގެ ސަރުކާރުގެ ފަހު ދުވަސްކޮޅު މި ޑޮކިއުމެންޓްރީ އާއްމުކުރުމުން، މި މައްސަލާގައި އިމިގްރޭޝަނުން ބުނެފައި ވަނީ، ޑޮކިއުމެންޓްތަކުން އެނގޭ ގޮތުގައި ސްކީލާން ރާއްޖެއިން ފުރާވަޑައިގަތުމާ އެކު، އެކަމަނާ އަށް ރާއްޖެ ވަޑައިނުގެންނެވޭ ގޮތަށް ހަދާފައި ވަނީ "އިލީގަލް ރެކްރޫމަންޓް" ނުވަތަ ގާނޫނާ ހިލާފަށް ރާއްޖޭން ބޭރުން މީހުން ގެންނަ ކަމަށް ތުހުމަތުވާ މައްސަލައެއްގައި ކަމަށެވެ. އެ މައްސަލަ ބަލާ ކަމަށް ބުނެ ސިޓީއަކުން ސްކީލާން އަށް ޖަވާބު ދީފައި ވިޔަސް އޭނާއާ ގުޅޭ އެފަދަ މައްސަލައެއް ބަލައިފައެއް ނެތެވެ.

އިމިގްރޭޝަނުން އޭރު ބުނެފައި ވަނީ ސްކީލަން ބްލެކް ލިސްޓްކުރީ ގާނޫނާއި ގަވާއިދާ ހިލާފަށް ކަމަށް މި ފަހުން އެ އިދާރާގެ ސަމާލު ކަމަށް އައިސްފައިވާ ކަމަށެވެ. އެހެންވެ، އެ މައްސަލަ ތަހުގީގު ކުރަމުން އަންނަ ކަމަށް ބުންޏަސް އޭގެ ފަހުން ތަހުގީގުގެ އެއްވެސް އަޕްޑޭޓެއް އެ އިދާރާ އިން ނުދެ އެވެ.

54 ކޮމެންޓް, 58 ރިއެކްޝަންސް

icon happy icon happy 5%
icon sad icon sad 5%
icon angry icon angry 29%
icon wow icon wow 2%
icon inlove icon inlove 59%
The name is already taken The name is available. Register?

ކޮމެންޓްތައް

އެންމެ ފަސް މަގުބޫލް

ޒުލްފާ

07 November 2024

މިކަހަލަ ކިތަންމެ ދޮގު ހަބަރުތަކެއް ޖަހައިގެން ވާހަކަ ފެތުރިޔަސް ރައީސް ހުންނާނީ ގަދަކޮށް. އަހަރެމެންގެ ގައުމު ހިންގުމުގައި ފަހަތަކަށް ނުދެވޭނެ.

The name is already taken The name is available. Register?

ހައްދުފަހަނައެޅި

07 November 2024

އެމްޑީޕީއަކީ ސިޔާސީ ގޮތުން ހައްދުފަހަނައަޅާ ގޮސް ޒާތީ ކަންކަމާ ބެހުން ހައްދުންނައްޓާ ބައެއް އެންމެ ކުރިއްސުރެވެސް. މީހުންގެ ޒާތީ ކަންކަމާ ބެހި ނަގާއިރު ރަގަޅަށް ނޭނގޭނެ ކަންކަންވެފަ އޮތް ގޮތެއްވެސް. ހަސަދައިން ފޯވެފަ ތިބޭ ބަޔަކު ދައްކާ ޒާތުގެ ވާހަކައިގަ ހިފައިގެން ކަން އޮތްގޮތް ރަގަޅަށް ނުބަލާ ތިބެ ދޮގު ވާހަކަ ފަތުރާނީ. އެންމެ ފަހުން މީހެއްގެ ޒާތީ ކަމަކާ ބެހޭ ޑޮކިއުމެންޓްރީއެއް ހެދީ ގޮތްހުސްވެގެން ވޯޓާ ދިމާކޮށް ހަދާނެ ގޮތެއް ނެތިގެން.

The name is already taken The name is available. Register?

ރާވެރިބެ

07 November 2024

ސިޔާސީ ބޭނުމަށް ރައީސްގެ އަގު ވައްޓާލަން ނެރެގެން އުޅޭ ފާޑެއްގެ ފުލޯކު ވާހަކަ އެއް. ލަންކާ މީހާއަށް ފައިސާ ދީގެން ބޭނުން ގޮތަކަށް އޭނަ ލައްވާ ދައްކާފަ އޮތް ވާހަކަ އެއް. އެހެން ނޫނަސް ތީ ދެން ކޯޗެއް. މަށަށް ދެރައީ ރަޢީސް މުއިއްޒު ތި ފޭކު "ޑޮކިއުމެންޓްރީ" އާ ބެހޭ ގޮތުން ވާހަކަ ދެއްކިކަން.

The name is already taken The name is available. Register?

ހަސަނު

07 November 2024

ވަރަށް ދެރަކޮށް ހިނގި ކަމެއް.. ކޮންމެ ގޮތެއްވިއަސް މިހާރު އެއީ ގައުމުގެ ރައީސް އަދި އެ ރިޕޯޓަކީ ވެސް މާކަ އޮއްޓަރެއް ހުރި އެއްޗެއްވެސްނޫން...

The name is already taken The name is available. Register?

އިހްސާސް

07 November 2024

ލަންކާ މީހުނާ މާބޮޑަށް ގުޅުން ބާއްވައިގެން އުޅެނީ ކޮންބައެއްކަން އަހަރެމެން ދަންނަމު. 3 ނޮވެމްބަރ 1988 އަކަށް ބަލާލިޔަސް އެކަން އެނގޭނެ. ވީއިރު ރައީސް މުއިއްޒުގެ އަބުރަށް ހުތުރުވާގޮތަށް ލަންކާ މީހަކުލައްވާ ނާޗަރަނގީ ކުޅުވިޔަސް އަހަރެމެން ރައީސް އަކަށް އެހުރީ މުއިއްޒު ހޮވާފަ.

The name is already taken The name is available. Register?

ބެއްޔާގެ ދަރި

07 November 2024

އެނގިފައިވާ ގޮތުގައި އަސްލު މިކަމުގައި ވިކްޓިމްއަކީ ރައީސް، ތިޔަބުނާ ދޮން މަންމަ ރައީސްގެ ދެކަނބަލުންނާ މެދު ކަންތައް ކުރެއްވީ ވަރަށް ނުބައިކޮށް ކަމަށް އެނގިފައި ވަނީ. ބައްޕާފުޅަކީ މުއްސަނދި ބޭފުޅެއް، ހުރި ހަމައެކަނި ދަރިފުޅު ނަމަވެސް ދޮން މަންމަގެ ސަބަބުން ރައީސް އަށް އުޅުއްވަންޖެހިވަޑައިގެންނެވީ އަބަދު ވެސް އާއިލާ އިން ބޭރުން ތަންތަން ކުއްޔަށް ހިއްޕަވައިގެން

The name is already taken The name is available. Register?

ައަދުރޭ

07 November 2024

ރައިސްގެ ބައްޕާފުުގެ ތަރިކައިގެ މައްސަލަ ނިންމިގޮތް ހޯދޭނެ ކޯޓުންވެސް، މަމޮޅު ނޫސްވެރިންނަށްވެސް. ވިސާގެ ކަންތައް އޮންނަގޮތް ފެންނަން ހުންނާނެ އިމިގްރޭޝަން ސައިޓުންވެސް. އެތަނަށް ލިޔުނަސް މައުލޫމާތުދޭނެ. އޮންފޮމޭޝަން ކޮމިޝަނޭ ކިޔާތަނެއް މެދުވެރިކޮށް. ކީއްވެ ނޫސްވެރިއަކަށްވަކި ނުލިބެންވީ. ގައިމު ރައީސްމީހާ ކާއެއްޗެހީގެ ހިސާބުވެސް އެބަހޯދާ. ތީ ޔަހޫދީ ނޫސްވެރިންތަ؟ ނޫސްވެރިއަކަށްވަނީ މީޙުންގެ މުޅަމަސް ކޭމަތަ؟

The name is already taken The name is available. Register?

ބަކުރުު

07 November 2024

އެކެއްގެ ވާހަކަތަކުގެ މައްޗަށް ބިނާކޮށްފައިއޮތް ޑޮކިޔުމެންޓެއް އެންމެ މޮޅުއެއްޗެއްގެގޮތުގައި ކަނޑައަޅާނި ފަނޑިޔާރުން ހާދަ މޮޅުވީމައޭ.

The name is already taken The name is available. Register?

ސާޖި

07 November 2024

އެބުނާ ޑޮކިއުމަންޓްރީއަކީ ހަމައެކަނި އެއްފަރާތުން ދައްކާފަ ހުރި ވާހަކަތަކެއް ހިމެނޭ، އަދި މީހެއްގެ މައްޗައް ތުހުމަތު ތަކެއް ކޮށްފައިވާ ޑޮކިއުމެންޓްރީ އަކަށް ވާއިރު، މޯލްޑިވްސް މީޑިއާ ކައުންސިލުންދޭ އިންވެސްޓިގޭޓިވް ދާއިރާގެ އެންމެ މޮޅު އޯޑިއޯ، ވީޑިއޯގެ އެވޯޑު އެ ޑޮކިއުމެންޓްރީ އަށް ދިން އިރު މީޑިއާ ކައުންސިލް އޮތީ މޮޔަވެފަތަ؟

The name is already taken The name is available. Register?

ހައިލަމް

07 November 2024

ހަގީގަތް އޮޅުވާލައި މިކަހަލަ ކަންތައް ހިންގުމުގެ އަޑީގައި އަބަދުވެސް ތި އެމްޑީޕީ އޮންނާނެ. މި ދޮގު ހަބަރެއް ފަތުރައިގެން މި މީހުންނަށް ލިބުނު ފައިދާއެއް ނެތް.

The name is already taken The name is available. Register?

އިތުރު ލިޔުންތައް

މަގްބޫލް ލިޔުންތައް

Daily News Digest

Deliver popular news headlines to your inbox!

Subscribe

Download Mihaaru News App

Offline Alerts

SMS 'sub mihaaru' to 5454