ދިވެހި ޖީޕީޓީ އެއް މިލިއަން ސުވާލުގެ ޖަވާބު ދީފި

ރާއްޖޭގައި ކުރިއަރަމުން އަންނަ ޓެކްނޮލޮޖީ ކުންފުނި "ޖަވާބު" ގެ ދިވެހި ޖީޕީޓީ އިން މިހާތަނަށް އެއް މިލިއަން ސުވާލުގެ ޖަވާބު ދީފައިވާ ކަމަށް އެ ކުންފުނިން މިއަދު ބުނެފި އެވެ.

އާޓިފިޝަލް އިންޓެލިޖެންސް ބޭނުންކޮށްގެން ދިވެހި ބަހުން ލިޔުމަށް އެހީތެރިވެދޭ އެޕްލިކޭޝަން "ޖަވާބު" ތައާރަފް ކުރީ 2023 ގަ އެވެ. އެ ކުންފުނިން ބުނީ މިދިޔަ ކުރު މުއްދަތުގައި 60،000 އަށް ވުރެ ގިނަ މީހުން ޖީޕީޓީގައި ރަޖިސްޓަރީ ވެފައިވާ ކަމަށެވެ. އަދި އެއް މިލިއަން ސުވާލަށް ޖަވާބު ދީފައި ވުމަކީ ދިވެހި ބަހުގެ ޓެކްނޮލަޖީ ދާއިރާ އަށް ލިބުނު މުހިންމު ކުރިއެރުމެއްކަން ވެސް އެ ކުންފުނިން ފާހަގަ ކޮށްފައި ވެ އެވެ.

ދިވެހި ޖީޕީޓީ އުފެދިގެން އައީ "ޖަވާބު" ގެ ސީއީއޯ އަރުޝަދު އަހުމަދު ހަފުތާ ބަންދެއްގައި ތަޖުރިބާކުރި ޕްރޮޖެކްޓެއްގެ ތެރެއިންނެވެ.

އެ ޕްލެޓްފޯމް ފުރަތަމަ ތަޢާރަފުކުރީ ހިލޭ ބޭނުން ކުރެވޭ އެޕްލިކޭޝަނެއްގެ ގޮތުގައި ނަމަވެސް ގިނަ ބަޔަކު ބޭނުންކުރަން ފެށުމާ އެކު، މިފަދަ އެޕްލިކޭޝަނަކަށް ޑިމާންޑު އޮތްކަން އެނގިގެން އެ އެޕްލިކޭޝަން ތަރައްގީކޮށް އޭއައި ބޭނުން ކުރެވޭ ގޮތަށް ފެށި އެވެ.

ދިވެހި ޖީޕީޓީން އުފައްދައިދޭ ލިޔުންތަކުގެ ތެރޭގައި:

1. ސިޓީ

2. މަޒުމޫނު

3. އެއްބަސްވުން

4. ތަގުރީރު

5. ވާހަކަ

6. ޅެން

7. ރައިވަރު

އެ އެޕްލިކޭޝަންއިން ލިބޭ އިތުރު ހިދުމަތްތަކުގެ ތެރޭގައި:

- ދިވެހިބަހުން ދިރާސާ ކުރުމާއި މައުލޫމާތު ހޯދުން

- ދިވެހި ލިޔުންތައް ހުލާސާކުރުން

- ދިވެހި ލިޔުންތަކުގެ އިބާރާތްކުރުން އިސްލާހުކުރުން

- ކޮންމެ ބަހަކުން ވެސް ދިވެހިބަހަށް ތަރުޖަމާކުރުން

ދިވެހި ބަހުން ދައްކާ ވާހަކަތައް އޮޓޮމެޓިކުން ލިޔުމަށް ބަދަލުކުރުމާއި ނެރޭޝަނަށް ބަދަލު ކުރުމާއި ދިވެހި ބަހުން ލިޔެފައިވާ ލިޔުންތައް ފޮޓޯ ނަގައިގެން ނުވަތަ ސްކޭން ކޮށްގެން ޓެކްސްޓް ފޯމެޓަށް ބަދަލު ވެސް ކުރެވޭނެ އެވެ.

"ޖަވާބު" ގެ މެނޭޖިން ޑިރެކްޓަރު މުހައްމަދު ޖައިލްމަ ވިދާޅުވީ ދިޗެހި ޖީޕީޓީގެ ހިދުމަތްތައް އިތުރަށް ރަނގަޅުކޮށް ފުޅާ ކުރުމަށް އިތުރު ކަންކަން ރާވާފައިވާ ކަމަށެވެ. ދިވެހިން ކުރާ ކަންކަން އޭއައި މެދުވެރިކޮށް ފަސޭހަކުރުން ހިމެނޭ ކަމަށް ވެސް އޭނާ ވިދާޅުވި އެވެ.