މިއަދު ބޭއްވި އާންމު ކޮމިޓީގެ ބައްދަލުވުން ކުރިއަށް ދަނީ: މި ކޮމިޓީގައި މެންބަރުންގެ މުސާރައާ ގުޅޭ ގޮތުން ވަނީ ޝަކުވާކޮށްފައި
11 އޯގަސްޓް 2025 - 16:11
ރައްޔިތުންގެ މަޖިލީހުގެ މެންބަރުންގެ ހައިސިއްޔަތުން އުފުއްލަވަން ޖެހޭ މަސްއޫލިއްޔަތުތަކާ އަޅާބަލާއިރު ލިބެނީ މާކުޑަ މުސާރައެއް ކަމަށް ވިދާޅުވެ، މަޖިލީހުގެ ބައެއް މެންބަރުން މިއަދު އާއްމު ކޮމިޓީގައި ޝަކުވާކުރައްވައިފި އެވެ.
މަޖިލީހުގެ އާންމު ކޮމިޓީގެ ބައްދަލުވުމެއް މިއަދު ބޭއްވީ މަޖިލީހުގެ ގަވައިދު އިސްލާހުކުރުމާ މެދު މެންބަރުންގެ ހިޔާލު ހޯދައި، އެކަމާ ގުޅިގެން މެންބަރުންގެ ހުރި ކަންބޮޑުވުންތައް ހިއްސާކުރުމަށެވެ. ގާތްގަނޑަކަށް 10 ވަރަކަށް މިނެޓަށް ކުރިއަށްދިޔަ ބައްދަލުވުމުގައި ގިނަ މެންބަރުން ފާހަގަކުރެއްވީ މުސާރައިގެ ކަންބޮޑުވުމެވެ.
އެ ބައްދަލުވުމުގައި ވާހަކަ ދެއްކެވި އަލިފުށީ ދާއިރާގެ މެންބަރު އަބްދުއްލަތީފް އަބްދުއްރަހުމާން ވިދާޅުވީ އާންމު ރައްޔިތުންނަށް ފެންނަ ގޮތުގައި މަޖިލީހުގެ މެންބަރެއްގެ މުސާރައަކީ 100،000 ނޫނީ 85،000 ރުފިޔާ ކަމަށްވީ ނަމަވެސް، ހަގީގަތުގައި މެންބަރެއްގެ މުސާރައަކީ 42،500 ރުފިޔާ ކަމަށެވެ.
މަޖިލީހަށް ހާޒިރު ނުވާ ދުވަހެއްގައި މުސާރަ ލިބުނަސް ކޮމިޓީ އެލަވަންސެއް ނުލިބޭ ކަމަށް ވިދާޅުވި އެވެ. އެހެންވެ، އެކަންކަމަށް ރިއާޔަތްކޮށްދޭން އޭނާ އެދިވަޑައިގަތެވެ.
ތިމަރަފުށީ ދާއިރާގެ މެންބަރު އަހުމަދު ރިޔާޒު ވެސް ވިދާޅުވީ މެންބަރުންނަށް ލިބެނީ ބޮޑު މުސާރައެއް ކަމަށް އާންމު ރައްޔިތުންނަށް ހީވެފައި އޮންނަ ކަމަށެވެ. އެކަމަކު، މަސް ނިމޭއިރު މެންބަރުން ވެސް ތިބެނީ އެކި ގޮތްގޮތަށް ހަރަދުތައް ކުރަން ޖެހި ނުތަނަވަސް ހާލަތެއްގައި ކަމަށް އޭނާ ވިދާޅުވި އެވެ.
ރިޔާޒު ވިދާޅުވި ގޮތުގައި މަޖިލީހުގެ މެމްބަރަކަށް އެލެވަންސްގެ ގޮތުގައި ލިބެނީ 20،000 ރުފިޔާ އެވެ. މާލެ ސަރަހައްދުގައި ކުއްޔަށް އުޅޭއިރު އެއީ ވަރަށް ކުޑަ އަދަދެއް ކަމަށާއި ތިން ކޮޓަރީގެ އެޕާޓްމެންޓެއް ވެސް ކުއްޔަށް ލިބެނީ 24،000 ރުފިޔާ އަށް ކަން އޭނާ ފާހަގަކުރެއްވި އެވެ.
"އާންމު ރައްޔިތުންނަށް ހީވެފައި އޮންނަނީ އަޅުގަނޑުމެން ހާޒިރު ނުވިޔަސް ބަރާބަރަށް މުސާރަ ވެސް ލިބެއޭ. މިއީ ހަމަ ރައްޔިތުންނަށް އޮޅިފައި އޮންނަ ބޮޑު އޮޅުމެއް. އެހެންވެ، މިކަމަށް ބަދަލު ގެންނަން މަސައްކަތް ކުރުމަކީ މަޖިލިސް މެންބަރުންގެ ޒިންމާއެއް ކަމަށް ދެކެނީ،" ރިޔާޒު ވިދާޅުވި އެވެ.
ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވީ މެންބަރުންގެ މުސާރައަކީ ވަރަށް ބޮޑު މުސާރައެއް ކަމަށް ރައްޔިތުންނަށް ގަބޫލުކުރެވޭ ކަމަށާއި ނަމަވެސް، މެންބަރެއްގެ އަސާސީ މުސާރައަކީ 42،500 ރުފިޔާ ކަމަށެވެ. އެއީ، މިނިސްޓަރެއްގެ މުސާރައަށް ވުރެ ވެސް ކުޑަ އަދަދެއް ކަން ފާހަގަކުރެއްވި އެވެ.
އިސްދޫ ދާއިރާގެ މެންބަރު އިސްމާއިލް ޝަފީއު ވެސް ވިދާޅުވީ މެމްބަރު ކަމަށް ނުކުމެވަޑައިގަތީ، "ކަނޑަށް ނުކުތީމަ ރާޅު ޖަހާނެ ކަން" ވެސް އެނގިވަޑައިގެން ކަމަށެވެ. ނަމަވެސް މަޖިލީހުން ނިންމާ ނިންމުންތަކާ ގުޅޭ ގޮތުން މީޑިއާތަކުން ހަބަރު ގެންނަނީ އޮޅޭ ގޮތަށް ކަމަށް ވިދާޅުވި އެެވެ.
އެކަމުގެ ސަބަބުން މަޖިލިސް މެންބަރުންނަށް ރައްޔިތުންގެ ޕްރެޝަރުތަކާ ކުރިމަތިލާން ޖެހޭތީ، މެންބަރުން ނިންމާ ނިންމުންތަކާ ގުޅޭ ސާފު ހަބަރުތައް މަޖިލީހުން ހާމަކުރަން ޖެހޭ ކަމަށް ވެސް އޭނާ ވިދާޅުވި އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ސަމްސިއްޔާ
14 August 2025
ކާކުތަ ބުނީ ކަލޭމެން ކައިރީގައި މަޖުލިހަށް ކުރިމަތިލާށޭ؟؟ މުސާރަ ނޭނގިތަ ކުރިމަތިލީ؟؟ އަހަރުމެންނަށް ހުވަފެން ދައްކައިގެން ވޯޓްހޯދައިގެން. އިސްތިއުފާދީބަލަ. ލިބޭ މުސާރައިން ދެކޮޅު ނުޖެހެންނާ ކިހިނެތް އުޅޭނީ. ދެން ކޮންމެވެސް ރަނގަޅު އެހެން ވަޒީފާއެއް ހޯދާނީ.
ކުޑަހުވާ
13 August 2025
އެހެން ވަޒީފާތަކާ ޚިލާފަށް ހަފްތާއަކު މަސައްކަތްކުރާ ދުވަސްތައް މަދު. ޗުއްޓީ ލިބޭލެއް ގިނަ. ތަޅުމުގައި މަސައްކަތެއް ނެތޭ ކިޔާ ބޭނުމިއްޔާ އެބަ ގަޑި ނިންމާލެވޭ. އެކަމުވެސް މުސާރަކުޑައޭ ކިޔަނީ
އައިމިނާ
12 August 2025
އަޅު މަޖިލީހުގަ ތިޔަ މަސައްކަތްކޮށްދީފާނަން ހިލޭ ސާބަހަށް. ހިލޭ ކާންލިބޭ ސައި ކޮފީލިބޭ. އިތުރު އެއްޗެއް ބޭނުންނުވޭ.
އައިމިނާ
12 August 2025
ރައްޔިތުންގެ ގެއޭ ކިޔާ މަޖިލީހުގެ މެންބަރުންނަށްވުރެ ވަކި ރައްޔިތުން ނުރުހޭ ހިތްހަމަނުޖެހޭ ބަޔަކު ނުތިބޭނެ. ވިސްނުންހުންނަނީ ޢިއްޒަތްތެރިންގެ ޖީބާހަމައިގަ އެއަށްވުރެ ދުރަކަށް ނުދޭ. ދެން ޢިއްޒަތްތެރިންގެ ފައިގެ ބޮޑުވާއިނގިއްޔާ ހަމައިގަ އެއަށްވުރެ ތިރިއަކަށްވެސް ދުރަށްވެސް ނުދާނެ.
ކާން ބޯން
12 August 2025
އެެހެންވީމާ ރައްޔިތުނަށް ހީވެފައިވާ މިންވަރަށް ބޮޑުކޮށްލާދޭންވީ ދޯ އެއް ލައްކައަށް؟ ބަލަ ކުޑައެއްނު ކުރަންވީ، ރައްޔިތުނަށް ނޯޅޭހެން؟ ދެން އަނެއްކޮޅުން ރައްޔިތުނާ ކޮން ކަމެއް ތިޔަ ބޭފުޅުންގެ މުސާރަޔަކާ؟ ރައްޔިތުންގެ ޚަރަދު ބަރަދު ބަލަހައްޓައިދެނީ މެންބަރުންތަ؟
ވޯލް
12 August 2025
ވަޒީފާގެ ޒިންމާ އަދާ ކުރަން ނުނިކުންނަ ދުވަަހަކަށް މުސާރަ ދޭކަށް ނުޖެހޭ ނޫންތޯ؟ ކޮމިޓީގައި މަސައްކަތް ނުކުރަންޔާ ކޮމިޓީ އެލަވެސްވެސް ނުލިބޭނެ ނޫންތޯ؟ މެމްބަރުންނަނާށް ހީވާކަހަލަ ހޮވުނީމަ މިއީ އަމިއްލަ ވިޔަފާރިއެއްގައޭ މިއުޅެނީ. ބަރާބަރަށް މަޖިލީހަށް ހާޒިރުވެ، ހުވާކޮށްގެން ހުރި ހުވަޔާ އެއްގޮތައް ވަޖީބު އަދާ ކުރީމަ ބަރާބަރު 85 ހާސް ލިބޭނެ، އެއި މާލެ ސަރަހައްދުގައި 2 ކުދިންގެ ހިމެނޭ އާއިލާއަކަށް އުޅެވޭ ވަރުގެ މުސަރައެއް.
އަލިބޭ
12 August 2025
ކޮންމެ ކުއްޖަކަށް ބްލޭންކް ޗެކެއް މަސް ނިމޭ ދުވަހު ދޫކުރަން އަޅުގަނޑު ހުށަހަޅަނީ
އަސްލީ
12 August 2025
މަޖްލިސް މެމްބަރުންގެ ލަދު ހަޔާތް ވެސް ނެތީ. ސިވިލް ސަރވިސްގައި މަސައްކަތް ކުރާ ގިނަ މުވައްޒަފުންނަށް މުސާރަ އާއި އިނާޔަތުގެ ގޮތުގައި ލިބެނީ 4465.00ރ ޕްލަސް 1500.00ރ ގެ ސަރވިސް އެލަވަންސްއަކާ އެކު 5965.00 ރުފިޔާ. މަޖްލިސްގައި ތިބި ގްރޭޑް 7 ގެ ފެންވަރު ނެތް މެމްބަރުންނަށް މަހަކު މަދުވެގެން 85000.00ރ ލިބޭ. އަދި އެތަށް އިނަޔަތެއް ލިބޭ.
އަފްލާތޫން
12 August 2025
ބަލަގަ 2 ލައްކަ ލިބުނަސް އަވަހަށް ހުސްކޮށްލީމަ ހުންނަންޖެހޭނީ ހުސްއަތާ. ކަކުނި ހޮރުކޮންނަންޖެހޭނީ އެކަކުންޏެއްގެ ސައިޒުން
ބީކޫ
12 August 2025
މަހުވޭ ހިތަށްއަރާ މިއޯމެންގެ މުސާރަ އެކަނިބާއޭ ކުޑައީ؟. މަ ހުވޭ މިހުއްޓޫ ހޭކުޑައިވެފަ.