"ވައްކަމާއި ހިޔާނާތާއި ނުފޫޒު ބޭނުންކުރައްވައިގެން ރައީސް އަބްދުﷲ ޔާމީން ހިންގެވި ކަމަށް ބުނާ "ޖަރީމާތަކު"ގެ މައްސަލަ ބަލައިދޭން އިދިކޮޅު އިއްތިހާދުން ފުލުހުންނަށް ހުށަހަޅާނެ ކަމަށް އެ އިއްތިހާދުގެ ނައިބު ލީޑަރު އަލީ ވަހީދު މިއަދު ވިދާޅުވެއްޖެ އެވެ.
އެމްޑީޕީގެ ޗެއާޕަސަން އަލީ ވަހީދު މިހެން ވިދާޅުވީ، ކުރީގެ ނައިބު ރައީސް އަދި މޯލްޑިވްސް ޔުނައިޓެޑް އޮޕޮޒިޝަންގެ ލީޑަރު މުހައްމަދު ޖަމީލް އަހްމަދާއި ރާއްޖެ ޓީވީގެ ޗެއާމަން އަކްރަމް ކަމާލުއްދީން ޕޮލިހަށް ހާޒިރުކުރުމުގެ މަސައްކަތް ކުރަމުން އަންނަ ކަމަށް ފުލުހުން މިއަދު ބުނެފައި ވަނިކޮށް ކުރެއްވި ޓުވީޓެއްގަ އެވެ. އެ ދެ ބޭފުޅުންގެ މައްޗަށް ތުހުމަތުކުރާ އެއް މައްސަލައަކީ ރައީސް ޔާމީން ހައްޔަރުކުރަން ސައްހަ ނޫން ކޯޓު އަމުރެއް ނެރުމުގައި ބައިވެރިވެވަޑައިގަތުން ކަމަށް ފުލުހުން ބުނެ އެވެ.
އަލީ ވަހީދު ވިދާޅުވީ އިއްތިހާދުން ފުލުހުންނަށް ހުށަހަޅާނީ ރައީސް ޔާމީނަށް ތުހުމަތުކުރެވޭ މައްސަލަތައް އެ މަނިކުފާނު ހައްޔަރުކޮށްގެން ތަހުގީގު ކޮށްދިނުމަށް ކަމަށެވެ.
Vakkamaa, Hiyaanaathaa Nufoozun Hingi Jareemaa Thakuge Thuhumathugai Raees Yameen Hayyarukoh Thahugeeg Kurumah MUOin Fuluhah Husha'alhaanan.
— Ali Waheed (@ali20waheed) June 19, 2016
ޖަމީލާއި އަކްރަމަށް ކޮށްފައިވާ ތުހުމަތާ ގުޅިގެން އަލީ ވަހީދު ވިދާޅުވީ އެ ދެ ބޭފުޅުން ހައްޔަރުކުރަން ކުރާ މަސައްކަތުން ހާމަކޮށްދެނީ ރައީސް ޔާމީންގެ ފިނޑިކަން ކަމަށެވެ. އެއީ، ނުވާނެ ކަމެއް ކަމަށް ވެސް އަލީ ވަހީދު ވިދާޅުވި އެވެ.
MUOge Leader @MJameelAhmed Adhi @Akramkdeen Hayyaru Kuran Kuraa Massaiykathun Haama Kohdhenee RaeesYameenge Findikan. Thikameh Nuves Vaane👌🏻
— Ali Waheed (@ali20waheed) June 19, 2016
ރައީސް ހައްޔަރުކުރަން ކޯޓު އަމުރު ނެރުނީ ޖަމީލް ވިދާޅުވެގެން ކަމަށް އެ މައްސަލައިގެ ޝަރީއަތުގައި ސިއްރުން ހެކި ބަސް ދިން ފުލުހުންގެ މީހަކު ކޯޓުގައި ބުނެފައިވެ އެވެ. އެކަމަކު ޖަމީލް ވަނީ އެކަން ދޮގުކުރައްވައިފަ އެވެ.
އަމުރު ނެރުނު މައްސަލާގައި ކުރީގެ ޕީޖީ މުހުތާޒު މުހުންސިންް އާއި މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާން ވަނީ 17 އަހަރަށް ޖަލަށް ލާން ހުކުމްކޮށްފަ އެވެ.
