"ނީނާ" ގެ ރޯލެއް މަރަދޫ މަރިޔަމް ރަޝީދާ އަށް

ދިވެހި ސިނަމާ އިން އެންމެ ފުރަތަމަ ވިދައިލި ބަތަލާ މަރިޔަމް ރަޝީދާ އަހަރުތަކެއް ފަހުން އާ ފިލްމަކަށް ސޮއިކޮށް، އޭގެ މަސައްކަތް ފަށައިފި އެވެ.

އެކްޓަރު މުހައްމަދު ރަޝީދު (ދަރާ) އާ އެކު މަގުބޫލު ސްކްރީން ޖޯޑެއްގެ ގޮތުގައި މަޝްހޫރުވެގެން ދިޔަ ރަޝީދާ ސޮއިކޮށްފައި ވަނީ ލ. އަތޮޅުގައި މިހާރު ޝޫޓްކުރަމުން އަންނަ ޑައިރެކްޓަރު އިލްޔާސް ވަހީދު (އިއްލެ) ގެ ދެވަނަ ފިލްމު "ނީނާ" އަށެވެ.

އެ ފިލްމުގައި ރަޝީދާ ފެނިގެންދާ "ނީނާ" އިން ތައާރަފުކުރާ އާ އެކްޓަރު ޝަރަފު އަބްދުﷲ ގެ މަންމަ ލަތީފާގެ ރޯލުންނެވެ. ލަތީފާ އެ ނަމަކީ ރަޝީދާގެ އައިކޮނިލް ސްކްރީން ނަމެކެވެ. "ލަތީފާ" އަށް ކުރީގެ ބަތަލާ ހާޖަރާ ފިލްމުތަކުގައި ބަވައިލާ މަންޒަރުތައް ގިނަ ބައެއްގެ މެދުގައި ވަރަށް މަގުބޫލު ކަމަކަށްވެފައިވެ އެވެ. އެހެންވެ "ނީނާ" ގައި ރަޝީދާ ކެރެކްޓާ އަށް ލަތީފާގެ ނަން ދިނީ ޓްރިބިއުޓެއްގެ ގޮތުގައި ކަމަށް އެ ފިލްމުގެ ޓީމުން ބުންޏެވެ.

ރަންޒަމާނުގައި އޭނާ ވަނީ ފާހަގަކޮށްލެވޭ ފިލްމުތަކެއް ކުޅެފަ އެވެ. މީގެ 36 އަހަރު ކުރިން ރާއްޖޭގައި މަންޒަރުތަކެއް ނެގި މިސްރުގެ ފިލްމު "ޔޫސުފް އެންޑް ޒައިނަބު" އިން އެކްޓިން އަށް ނުކުތް ބަތަލާ ކުޅުނު ފިލްމުތަކުގެ ތެރޭގައި "ލޭކަރުނަ"، "ހާލި" އަދި "އިތުބާރު" ފަދަ ފިލްމުތައް ހިމެނެ އެވެ.

ރަޝީދާ ފަހުން ކުޅުނު ފިލްމުތަކުގެ ތެރޭގައި "ކަށްވަޅަށްދާންދެން" ހިމެނެ އެވެ. އަދި އައްޑޫގައި ވަރަށް ބޮޑު ބައި ޝޫޓްކުރި ކުރީގެ ޑައިރެކްޓަރު އަބްދުލް ފައްތާހްގެ ސިލްސިލާ "ރޭޝަމް" ގައި ވެސް ރަޝީދާ މަސައްކަތްކޮށްފައިވެ އެވެ.

"ނީނާ" އަކީ މިދިޔަ އަހަރު ގެނެސްދިން ކާމިޔާބު ފިލްމު "ބަވަތި" އަށް ފަހު އައި ފިލްމްސް ހަދާ ދެވަނަ ފިލްމެވެ. މީގެ ލީޑް ތަރިންނަކީ ނުޒުހަތު ޝުއައިބް (ނުޒޫ) އާއި ޝަރަފާއި ޖުމައްޔިލް ނިމާލެވެ.

މި އަހަރު "ނީނާ" ގެނެސްދޭން އަމާޒު ހިފާފައި އޮތަސް އަދި ވަކި ތާރީހެއް އިއުލާނެއްނުކުރެ އެވެ.