އަޅުގަނޑާ މެދު އަމަލުކުރަނީ ސިޔާސީގޮތުން ކަތިލާ ކަންބަޅިއެއް ގޮތަށް: މަހްލޫފް

އެމްއެމްޕީއާރުސީގެ ހިޔާނާތުގެ މައްސަލައިގައި ޔޫތު މިނިސްޓަރު އަހުމަދު މަހުލޫފްއާ މެދު ޒާތީވެ، އަމަލުކުރަމުން އަންނަނީ "ސިޔާސީ ކަންބަޅިއެއް" ގޮތަށް ކަމަށް އޭނާ މިއަދު ވިދާޅުވެއްޖެ އެވެ.

މަހްލޫފްގެ މައްޗަށް ދައުވާ ކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕީޖީގެ އޮފީހަށް އިއްޔެ ފޮނުވުމާ އެކު މަސައްކަތުން އެކަހެރިކުރި އެވެ. މަހްލޫފް އޭނާގެ ފޭސްބުކްގައި ކުރެއްވި ޕޯސްޓެއްގައި ވިދާޅުވީ އެމްއެމްޕީއާރުސީގެ މައްސަލައިގައި ފެށުނީއްސުރެ އޭނާއާ މެދު އަމަލުކުރަމުން އަންނަނީ ޒާތީކޮށް ކަމަށެވެ. އެކަމަކީ ބަޔަކު އަޑީގައި ތިބެގެން އޭނާ މަގާމުން ވަކިކުރުމަށް ކުރަމުން އަންނަ މަަސައްކަތެއް ކަމަށް ވެސް މަހްލޫފް ވިދާޅުވި އެވެ. ނަމަވެސް މަގާމުގަައި "ބަގުޑިބައްދައިގެން" ހުންނަވަން ނޫޅުއްވާ ކަމަށް ވެސް އޭނާ ވިދާޅުވި އެވެ.

"ފެށުނީއްސުރެ ވެސް އެމްއެމްޕީއާރުސީ މައްސަލައިގަ އަޅުގަނޑާާމެދު އަމަލުކުރަމުން އަންނަނީ ޒާތީކޮށް، ސިޔާސީގޮތުން ކަތިލާ ކަންބަޅިއެއް ގޮތަށް. އެކަންކުރަނީ ސިޔާސީ ބަޔަކު އަޑީގަތިބެގެންކަން އެންމެ އިސްވެރިންނަށް އެނގިވަޑައިގަންނަވާ. ބޭނުމަކީ ހަމައެކަނި މަގާމުން ވަކިކުރުން." އޭނާ ވިދާޅުވި އެވެ.

"ކުރި ތުހުމަތު ވެސް ގޯސް. ތުހުމަތުކުރީ ސްޕެޝަލް އިކޮނޮމިކް ޒޯން ބިލަށް ވޯޓުދީގެން. ނަމަވެސް އޭރު އަޅުގަނޑަކީ ޕީޕީއެމްގެ މަޖިލިސް މެމްބަރެއް. ވޯޓު ދިނީ ތްރީލައިން ވިޕާ އެއްގޮތަށް."

މަހްލޫފް ވިދާޅުވީ އެ މައްސަލައިގައި އޭސީސީ އަށް ދައުވާ ކުރުމުގެ އެއްވެސް ގާނޫނީ ބާރެއް ނުލިބޭނެ ކަމަށެވެ. އެކަން އެސެޓް ރިކަވަރީ ކޮމިޝަން އުފައްދަވަން ރައީސް ނެރުއްވި ގަރާރުން އަދި ރިޔާސީ ކޮމިޝަންގެ ގާނޫނުން ވެސް ސާފުވާ ކަމަށް ވެސް ވިދާޅުވި އެވެ.

މަހްލޫފް ވިދާޅުވި ގޮތުގައި މީގެ ކުރިން އެ މައްސަލައާ ގުޅިގެން ދައުވާ އުފުލި އެންމެންގެ މައްސަލަަައް ވެސް ފޮނުވީ ކޮމިޝަނުންނެވެ. އޭނާ ވިދާޅުވީ ހެކި ކަމަށް ބުނެ ހޯދާފައިވާ ބައެއް ތަކެއްޗާއި ބަޔާނަކީ ގާނޫނާ ހިލާފަށް ހޯދައި އަދި ނަގާފައިވާ ތަކެތި ކަމަށާއި އެތަކެތި ކޯޓުން ވެސް ބަލައި ނުގަންނާނެ ކަމަށެވެ. އެކަމަކު އޭގެ ތަފްސީލެއް ހިއްސާއެއް ނުކުރައްވަ އެވެ.

"އަޅުގަނޑުގެ މައްސަލަ ވެސް ހަމަ ބަލަންވީ. އެކަމަކު އެކަން ކުރަންވާނީ ގާނޫނީ އިމުގެ ތެރެއިން ތަފާތުނުކޮށް. ސިޔާސީ ނުފޫޒުން ބައެއް ނަންތައް އުނިކުރުމަށް ފަހު ވެސް އެކުލަވާލާފައި އޮތް 300 މީހުންގެ ލިސްޓަކުން ވެސް ކޮމިޝަނަށް ތިން އަހަރު ވީއިރު ފެނުނީ އަޅުގަނޑުގެ ނަން އެކަނިތޯ،" އޭނާ އެއްސެވި އެވެ.

މަހްލޫފްް ވިދާޅުވީ އޭނާގެ މައްސަލަ އިންސާފުވެރިކަމާ އެކު ކުރިއަށް ގެންދާ ނަމަ، އެންމެ ދުވަހަކު ވެސް އެ މަގާމުގައި ނުހުންނަވާނެ ކަމަށެވެ.

ކަންބަޅިއެއްހެން ހަމައެކަނި އަޅުގަނޑު ކަތިލިޔަސް އެހިސާބުން އެމްއެމްޕީއާރުސީގެ މައްސަލަ ނިމުނީކަމަށް ރައްޔިތުން ދެކޭނެކަމަށް ހީކުރުމަކީ ގޯހެއް... ވަރުބަލިވެއްޖެ، އަޅުގަނޑަށް ވެސް އަބަދު އަނގަ ބަންދުކޮށްގެން ނުހުރެވޭނެ -- މަހްލޫފް

މީގެ ކުރިން ވެސް ތަކުރާރުކޮށް މަހްލޫފް ވިދާޅުވަމުން އައީ އޭނާގެ ނަން އޮތީ "ސިޔާސީ" ލިސްޓެއްގައި ކަމަށެވެ.

އެސްއޯއެފްްއާ އެކު ޑޮލަރުގެ މުއާމަލާތެއް ހިންގުމުން، މަހްލޫފްް އެންމެ ފުރަތަމަ ސަސްޕެންޑް ކުރީ ފެބްރުއަރީ 14، 2019 ގަ އެވެ. އެންޓި ކޮރަޕްޝަން ކޮމިޝަން (އޭސީސީ) ގައި މަހްލޫފްގެ މައްސަލައެއް ނެތުމާއި ބަލަން ޖެހޭ އިތުރު ކަންކަމަށް ބެލުމަށް ފަހު، މަހްލޫފްގެ ސަސްޕެންޝަން އުވާލީ، އޭގެ ދެ މަސް ފަހުން، 16 އޭޕްރީލްގަ އެވެ. މަހްލޫފް ސަސްޕެންޑްކުރީ އެސްއޯއެފުން ޑޮލަރު ޖަމާކުރި ފަރާތްތަކުގެ ތަފްސީލު ހިމެނޭ ރިޕޯޓް އޭސީސީން ނެރުމުން، މަހުލޫފްގެ މުއާމަލާތެއް ވެސް އޭގައި ހިމެނުމުންނެވެ. އެކަމުގައި މަހުލޫފް ވިދާޅުވީ އޭނާގެ އެކައުންޓަށް 33،000 ޑޮލަރު ވަދެފައި ވަނީ، ޑޮލަރު ގަތުމަށް ހިންގެވި ސައްހަ މުއާމަލާތެއްގެ ތެރެއިން ކަމަށެވެ. އަދި އެސްއޯއެފުން ބޭނުންކުރީ އެމްއެމްޕީއާރުސީގެ ފައިސާކަން އެނގިވަޑައިނުގަންނަވާ ކަމަށް ވެސް ވިދާޅުވެފައިވެ އެވެ. މަހުލޫފުގެ އެދިވަޑައިގަތުމަކަށް އޭނާގެ މައްސަލަ ބެލުމަށް ފަހު އޭސީސީން ވަނީ އެކަމުގައި އޭނާގެ ހިޔާނާތުގެ ކަމެއް ނެތް ކަމަށް ނިންމައިފަ އެވެ.

އެމްއެމްޕީއާރުސީގެ ހިޔާނާތުގެ ލިސްޓު މަޖިލީހުން އާންމުކުރިއިރު އޭގައި މި ސަރުކާރުގެ ވަޒީރުންގެ ތެރެއިން ނަން އޮތީ މަހްލޫފްގެ އެކަންޏެވެ. އޭރު މަހްލޫފް ވަނީ އޭނާގެ މައްޗަށް ދައުވާއެއް ކޮށްފި ނަމަ، މިނިސްޓަރުކަމުގެ މަގާމުގައި އެންމެ ދުވަހަކު ވެސް ނުހުންނަވާނެ ކަމަށް ވިދާޅުވެފަ އެވެ.