ޚަބަރު / ޑރ. މުހައްމަދު ޝަހީމް އަލީ ސައީދު (މިނިސްޓަރު)

ހާފިޒުން އުފެއްދުމުގެ ޕްރޮގްރާމްގައި 600 ބައިވެރިން

މާލޭގެ މިސްކިތެއްގައި މީހަކު ގުރުއާން ކިޔަވަނީ. ހާފިޒުން ތަމްރީނު ކުރުމުގެ ޕްރޮގުރާމެއް ހަފްތާ ބަންދުގައި ފެށުމަށް އިލްމު އިންސްޓިޓިއުޓުން ވަނީ ނިންމާފައި---ފޮޓޯ: ހުސެއިން ވަހީދު/މިހާރު

އާނިފާ ހުސެއިން ސިރާޖް، މިހާރު

05 ޑިސެމްބަރ 2021 - 12:42

ޒުވާނުންނަށް އަމާޒުކޮށްގެން، 100 ހާފިޒުން އުފެއްދުމަށް އިލްމު އިންސްޓިޓުޓް ފޯ އިސްލާމިކް ސްޓަޑީޒް އިން އަންނަ ހަފްތާ ބަންދުގައި ފަށާ ޕްރޮގްރާމްގައި މިހާތަނަށް 600 އަށް ވުރެ ގިނަ މީހުން ބައިވެރިވެފައިވާ ކަމަށާއި އަދިވެސް ބައިވެރިވާން ބޭނުންވާ މީހުން ތިބުމުން އަލުން ފުރުސަތު ހުޅުވާލާނެ ކަމަށް އެ އިންސްޓްޓިއުޓުން ބުނެފި އެވެ.

އިލްމު އިންސްޓްޓިއުޓްގެ ފަރާތުން ހާފިޒުން އުފެއްދުމުގެ ޕްރޮގުރާމްގައި ބައިވެރިވާން ހުޅުވާލީ މިދިޔަ އޮކްޓޯބަރު މަހު އެވެ.

އެ އިންސްޓިޓިއުޓްގެ ވެރިއެއްގެ ގޮތުގައި މިހާރު ހުންނެވި ކުރީގެ އިސްލާމިކް މިނިސްޓަރު ޑރ.ޝަހީމް އަލީ ސައީދު މިއަދު ވިދާޅުވީ އިލްމު އިންސްޓިޓިއުޓްގެ ފަރާތުން އިއުލާނުކުރި ހާފިޒުން އުފެއްދުމުގެ މަޝްރޫއުގެ 600 ދަރިވަރުންނާ އެކު މި ހަފްތާ ބަންދުގައި ފަށަން ނިންމާފައިވާ ކަމަށެވެ.

ކްލާސްތަކުން ޖާގަ ހޯދަން ގިނަ ފަރާތްތަކަކުން އަދިވެސް އެދެމުންދާތީ، ހެނދުނު ދަންފަޅިއަށް ހާއްސަކޮށް ރަޖިސްޓްރީވާން އަލުން ހުޅުވާލާނެ ކަމަށް ޝަހީމް ވިދާޅުވި އެވެ.

"ކުލާސްތައް ބޭއްވިގެންދާނީ ފުރިހަމަ މާހައުލެއްގައި. އޭސީ ކުރެވިފައިވާ ކުލާސްރޫމްތައް. އެއިން ކޮންމެ ކުލާސްރޫމެއްގައި ސްމާޓް ބޯޑު ބެހެއްޓިފައިވާނެ. އަދި ރާގު ދަސްކޮށް ގާރީންގެ ކިޔެވުން އަޑު އެހުމަށް ހާއްސަ ލެބެއް ގާއިމުކުރެވިފައިވާނެ. ހާއްސަ ލައިބްރަރީއެއް ވެސް ގާއިމުކުރެވިފައިވާނެ،" ޝަހީމް ވިދާޅުވި އެވެ.

މިއީ ހާފިޒުން އުފެއްދުމުގެ ޕްރޮގްރާމެއްގައި މިހާ ގިނަ އަދަދެއްގެ ދަރިވަރުން ބައިވެރިވާ ފުރަތަމަކަން އޭނާ ފާހަގަކުރެއްވި އެވެ.